1 Samwele 27 - Livulu lya Shukulu Kalunga

Ndaviti akati ka vaFilisitiya

¹ Co Ndaviti walyendekesele mu mbunge yendi ngwendi, “Litangwa limo Saulu akanjitsiya. Cuma njinapande kulinga eci, mwamuvwa njitewele ku lifuti lya vaFilisitiya. Co Saulu akajuka kunjishakezeka mu Isalele, co njikakala mwamuvwa.”

² Ngecivene, Ndaviti na vanu vendi vakupwa 600 aje vene vaile kuli Akishe muna Maoke, mwene wa ku Ngate.

³ Ndaviti na vanu vendi amo na naanga yavo vaile nakutunga kuje ku lifuti lya ku Ngate. Ndaviti wakele na vanakazi vendi vavali, Ahinowame wa ku Njezelele, na Avingaile fwile ya Navale, wa ku Kalemele.

⁴ Omo Saulu wazivile ngeci Ndaviti natewela ku Ngate, co walikelele kumushakezeka.

⁵ Ngecivene, Ndaviti wendekele kuli Akishe ngwendi, “Nga unapu musamba wange, njaneko limbo limo lyalindondo njikatungemo. Omwo kucitava mwane, yange ngamba yove njikale nove mu nganda imo embwe.”

⁶ Ngecivene, Akishe wamwanene limbo lya Zikelange, co tunde aje, Zikelange yapwa ya vimyene va Yunda na lelo lino.

⁷ Ngecivene, Ndaviti wakele mu lifuti lya vaFilisitiya vingonde likumi na vitanu na imo.

⁸ Co tunde a simbu ije, Ndaviti na vanu vendi vaile nakulwisa vaNgeshule, na vaNgilezi, na vaAmaleke, vaje vakele muje simbu yakama manene. Ikeye wakele nakulwisa lifuti lyavo kweta ku Shule, co kutunda kuje nakweta ku Ingito,

⁹ wakele nakutsiya vanalume voshe, na vanakazi, nakwambata vimanga, na vingombe, na vimulu, na tumelo, na vuzalo. Co welukile ku Akishe.

¹⁰ Omo Akishe wamwihwile ngwendi, “Lelo unalu na veya?” Co Ndaviti wamulekele ngwendi, “Njinakalwila ku mbwela ya lifuti lya Yunda, na ku lifuti lya cikota ca Njelahemele, na ku lifuti lije livakele vaKeni.”

¹¹ Ndaviti watsiile voshe, vanalume, na vanakazi, ngecivene, naumo wai welukile ku Ngate nakwambulula vukaleo vya vyuma vije vyalingile Ndaviti na vanu vendi. Eci cikeco calingile Ndaviti a simbu ije wakele mu Filisitiya.

¹² Oloni Akishe wakulaelele Ndaviti, co walyendekesele mu mbunge yendi ngwendi, “Ou munu vamuzinda manene vavushoko vwendi vaIsalele, cooni akanjipangela a simbu yakuyoya kwendi kwoshe.”