1 Samwele 26 - Livulu lya Shukulu Kalunga

Ndaviti ayoyesa mwonyo wa Saulu lalo

¹ Vanu vamo vatundile ku Zife vezile kuli Saulu ku Ngimbeya, vamulekele ngwavo Ndaviti navanda ku Munkinda wa Hakila walishungama na mambo ya Yundeya.

² Co aje vene Saulu waile na mashwalale va nzili vakupwa 3,000 va mu Isalele ku mambo ya Zife nakushakezeka Ndaviti,

³ co vatungile cilombo kumukulo wa ngila ku Munkinda wa Hakila. Ndaviti anga wakele mu mambo, oloni omo wanangukile ngeci Saulu alinakumushakezeka,

⁴ watumine vaka-kunenga vakawane nga mwa vushunga Saulu ali kuje.

⁵ Aje vene Ndaviti waile nakumona mwela kuje kuvalalele va Saulu, na Avinele muna Nele, muka-kushika nzita ya Saulu. Saulu walalele mukati ka cilombo, co vanu vendi vamuzengelekele.

⁶ Co Ndaviti wehwile Ahimeleki kaHiti, na Avishai ndolome ya Yowave (vaina vapwile Zeluya) ngwendi, “Iya umo akati keni aya nange ku cilombo ca Saulu?” Avishai wamukumbulwile ngwendi, “Yange njiya nove.”

⁷ Ngecivene, ku vutsiki vuje, Ndaviti, na Avishai vakovelele mu cilombo ca Saulu, vawanene Saulu nalala mukati ka cilombo, likunga lyendi lyashimbama asi kuyehi na mutwe wendi. Avinele, na mashwalale valalele oku vanamuzengeleka.

⁸ Co Avishai wendekele kuli Ndaviti ngwendi, “Njambi naaka citozi cove mu mavoko ove ku vutsiki vuno. Ololo njitave ngeci njimutive lumolika likunga lyendi limupulyasane na asi, kunjikamutivi luvali lalo embwe!”

⁹ Oloni Ndaviti wendekele kuli Avishai ngwendi, “Kesi umuvulumune! Shukulu Kalunga akahisa woshe uje avulumuna uje yanavwavesa.”

¹⁰ Co Ndaviti wendekele lalo ngwendi, “Ali Shukulu Kalunga wakuyoya, njazivuka ngeci Shukulu Kalunga ikeye vavenya akatsiya Saulu, nambe omo simbu yendi inete ya kutsa kalili, nambe ya kutsa mu nzita.

¹¹ Shukulu Kalunga anjivindike ngeci kesi njeseke kuvulumuna ou yanapwisa mwene! Twambate lika likunga lyendi, na njava yendi ya mema, co tuye.”

¹² Ngecivene, Ndaviti wambatele likunga, na njava ya mema ku mitwe ya Saulu, co ikeye, na Avishai vaile. Naumo wai wavamwene nameme kuvazivuka, co naumo wai watonene, voshe valalele tulo, omwo Shukulu Kalunga watumine tulo twakama ali vakevo voshe.

¹³ Asinoni Ndaviti waile musambwa ya cana, wemanene akamwa ya lilundu, apwile alyala kamandondo na cilombo,

¹⁴ co watambekele kuli mashwalale va Saulu, na kuli Avinele ngwendi, “Avinele! Wasa kunjiziva ndi?” Co Avinele wehwile ngwendi, “Iya owo alinakutambeka nakwindula mwene?”

¹⁵ Co Ndaviti wendekele ngwendi, “Avinele, kuma kesi yove munalume wakukomokesa mu Isalele ndi? Omwo vikajo kuwanyungile shukulu yove? Ololo vene mu cilombo ceni munakovelele munu ngeci atsiye shukulu yove.

¹⁶ Avinele! Unonwene kupanga cipangi cove, njalisingi ali Shukulu Kalunga wakuyoya ngeci yeni voshe mwapandele kutsa, omwo kumwasele kunyunga shukulu yeni, uje Shukulu Kalunga wamupwisile mwene. Kenga! Likunga lya mwene lilikuli? Co lalo njava ya mema ije inakele ku mitwe yendi ilikuli?”

¹⁷ Saulu wazivile lijwi lya Ndaviti, co wehwile ngwendi, “Yove munange Ndaviti ndi?” Co Ndaviti wamukumbulwile ngwendi, “Eyo, yange vene, shukulu.”

¹⁸ Wendekele lalo ngwendi, “Omo vikajo shukulu, ulinakukava ngamba yove? Vika njalingi? Mulonga uka unjinavulumuna?

¹⁹ Shukulu, tolilila evi njendeka. Nga cili Shukulu Kalunga ikeye nakuyongwesa ngeci unjilwise, co n̄ombelo injikamwana ikatengulwisa viyongola vyendi, oloni nga vanu valinakulinga eci, co cisingo ca Shukulu Kalunga ciije ali vakevo. Omwo vakevo vananjishekela anja kunjitundisa ku lifuti lya Shukulu Kalunga, kunjitwala ku lifuti kuje kunjikalemesela lika vinjambi veka.

²⁰ Ngecivene, kesi vakanjitsiile mu lifuti lya vungenzi, kulyala na Shukulu Kalunga. Omwo vikajo mwene wa mu Isalele aija nakutsiya yange wakufwa ngwe njandu? Vikajo alinakunjiyombela ngwe nji kazila?”

²¹ Co Saulu wamukumbulwile ngwendi, “Njalingi mwamuvi. Iluka, Ndaviti munange! Kunjikelukilamo lalo kukuvulumuna, omwo unamena mwonyo wange ku vutsiki vwa lelo. Njapwile nji cilema! Njinalingi cuma cacivi manene cakukomokesa!”

²² Co Ndaviti wamukumbulwile ngwendi, “Shukulu, likunga lyove eli. Tuma munu umo wa akati ka vanu vove alizile.

²³ Shukulu Kalunga akana cikandelela kuli vaka-kulongwa na vaka-vushunga. Ku litangwa lya lelo, ikeye nakwakele mu mavoko ange, oloni kunjavulumwine uje Shukulu Kalunga yanapwisa mwene.

²⁴ Ngwe omo nayoyesa mwonyo wove ku litangwa lya lelo, Shukulu Kalunga alinge muje lalo kuli yange nakunjamena ku tuyando twoshe!”

²⁵ Saulu wendekele kuli Ndaviti ngwendi, “Njambi akuvezikise munange! Ukapwa wakuvezika mu vyoshe ukalinga!” Ngecivene, Ndaviti waile mu ngila yendi, co Saulu lalo welukile kwimbo lyendi.