1 Samwele 25 - Livulu lya Shukulu Kalunga

Kutsa kwa Samwele

¹ Samwele watsile, vaIsalele voshe vakungulukile nakumulila. Co vamutsindile mwimbo lyendi mu Lama. Munima yevi, Ndaviti waile mu mambo ya Palane.

Ndaviti na Avingaile

² Kwakele munalume umo wa ku cikota ca Kalembi, lizina lyendi Navale, wa ku nganda ya Mayone, co wakele na livu lyendi kuyehi na nganda ya Kalemele. Wapwile muka-kufuka manene, wakele na vimanga 3,000, na vimembe 1,000.

³ Munakazi wendi Avingaile wapwile wamuvwa, co lalo wakele na mana akuzivisisa, oloni munalume wapwile wakukaluwa manene, na vilinga vyendi vyapwile vyavivi. Navale wakele nakuteula vimanga vendi mu Kalemele.

⁴ Omo Ndaviti wakele mu mambo, wazivile ngeci Navale alinakutewisa vimanga vendi,

⁵ co Ndaviti watumine vakwenje likumi wavalekele ngwendi, “Yeni ku Kalemele kuli Navale ngeci mukamwindwise.

⁶ Wavashikile ngeci vakaleke Navale ngwavo, ‘Kwoloka kukale amo nove, co kwoloka kukale na naanga yove, co kwoloka kukale na vyoshe-ivyoshe ulinavyo.

⁷ Njinazivi uli na vaka-kuteula vimanga, tunyungi twove vanakele amo netu, co yetu kutwavavulumwine, lalo kuvajenekele vimo, simbu yoshe vakele mu Kalemele.

⁸ Ihula vakwenje vove, co vakevo vakakuleka. Ngecivene, nga citava, vakwenje vange vawane kutetela ku mesho ove, omwo tunaija a litangwa lya ciwano. Njilomba ngeci utwaneko vyoshe-ivyoshe viwulinavyo yetu vangamba vove na munove Ndaviti.’ ”

⁹ Co vakwenje va Ndaviti vetesele majwi awa kuli Navale mu lizina lya Ndaviti. Co vavandamenene.

¹⁰ Asinoni Navale wavakumbulwile ngwendi, “Ndaviti ikeye iyajo? Yange kanda njicimuzive! Simbu ino, lifuti linashulu na vindungo vakuvomboloka kuli vashukulu vavo!

¹¹ Kunjasa kwambata makende ange, na mema ange, na situ injinatsiila vaka-kuteula vimanga vange, njivane kuli vaje kunjizivuka noku vatunda!”

¹² Co vanu va Ndaviti velukile, vakalekele Ndaviti vije vyendekele NaVaLe

¹³ Ndaviti washikile ngwendi, “Shweleni mikwale yeni!” Co vakevo voshe valingile ngacije. Ndaviti lalo washwelele mukwale wendi, waile na vanu vendi vakupwa 400, co wasezele vanu 200 munima amo na vivala vyavo.

¹⁴ Co umo wa akati ka vangamba va Navale wendekele kuli Avingaile munakazi wa Navale ngwendi, “Unazivi evi vinalingiwa ndi? Ndaviti natumine miluwa kutunda mu mambo kwija nakwindwisa shukulu yetu, oloni ikeye navashaula.

¹⁵ Oloni vakevo vakele na cizemo kuli yetu, kuvatuyandesele embwe, omo twakele navo mu shwata, nacimo cuma cetu vevile cai.

¹⁶ Vakele nakutunyunga vutsiki na mutanya, simbu yoshe twakele amo navo nakunyunga matanga etu a vimanga.

¹⁷ Shukulu, yongolao mwamuvwa umone muulingila. Amo cuma eci cikanena vukalu kuli shukulu yetu amolika na naanga yendi yoshe. Omwo wapwa munu wakukaluwa mbunge, co kasa kutolilila kuli munu!”

¹⁸ Co vwasi-vwasi Avingaile wambatele mikasha ya makende yakupwa 200, na vinjeke vivali vya vilambu vyakushula na vinyu, na vimanga vatanu vakwoca, na mitonga likumi na ivali ya vimbuto vya vinona vyakwoca, na makasha-kasha 100 a mikolovozi ya vushuka vwa vinyu, na makende 200 amavwa a mikuyu akuma, wavilondekele a vimulu.

¹⁹ Asinoni wendekele kuli vangamba vendi ngwendi, “Twameni kulutwe, yange njimikava munima.” Oloni kendekele cuma cimo kuli munalume wendi.

²⁰ Omo wezile oku nalondo a cimulu cendi kuzinguluka ku lilundu, vwasi-vwasi waliwanene na Ndaviti na vanu vendi valinakwija kuli ikeye.

²¹ Co Ndaviti wendekele ngwendi, “Njalisini ngoco kunyunga vufuko vwou munu mu mambo, kukwakele cuma cimo civevile, co nanjiilwisila vuvi ku vuvwa.

²² Njambi anjihise nga kunjitsii vitozi vange omo kanda kucikye!”

²³ Omo Avingaile wamwene Ndaviti, washulukile vwasi a cimulu cendi, walyumbilile asi

²⁴ ku mendi a Ndaviti, wendekele kuli ikeye ngwendi, “Shukulu, mwane, njitolilileni! Njalimono njili na mulonga.

²⁵ Shukulu, kesi umbe mbunge kuli Navale, omwo ikeye kesi na seo! Mwa vushunga vene ikeye nalifu ngwe kununguluka kwa lizina lyendi lya Navale ‘Cilema!’ Kunjakeleko omo vangamba vove vezile, mwane.

²⁶ Shukulu Kalunga ikeye nakuvindika kulinga shambandinga nakutsiya vitozi vove. Co ololo njilisinga kuli yove a lizina lya Shukulu Kalunga, wakuyoya ngwange vitozi vove, na voshe vaje vashaka kukuvulumuna, vakavahisa ngwe NaVaLe

²⁷ Shukulu, mwane, tambula vwana ovu njinakunenela, ngeci uvwane kuli vanu vove.

²⁸ Shukulu, njisambeseni, mwane, ku vuvi vwoshe vunjinalingi. Shukulu Kalunga akakupwisa mwene, na vatekulwila vove, omwo ulinakulwa vinzita vyendi, vuvi navumo vwai vukalingiwa kuli yove a simbu yakuyoya kwove.

²⁹ Nga munu akulwisa nakweseka kukutsiya, Shukulu Kalunga Njambi yove akakwamena, ngwe munu anyunga vufuko vwa seo. Oloni ali vitozi vove, ikeye akavombila kuti, ngwe munu asha limanya mu cipapa cendi ca kenya.

³⁰ Omo Shukulu Kalunga nalingi vyuma vyoshe vyavivwa vije vyakukulaesele, co nakupwisa lalo mwene wa mu Isalele,

³¹ eci kucikapu citanukiso kuli yove nambe kukwana cishoti, akutsiya vukaleo vwavuvwa nambe kulinga shambandinga. Co omo Shukulu Kalunga nakuvezikisa, shukulu, kesi ukanjivale embwe.”

³² Ndaviti wendekele kuli Avingaile ngwendi, “Wakushangazala Shukulu Kalunga, Njambi ya Isalele, ou nakutumu kuliwana nange ku litangwa lya lelo!

³³ Kandelela kuli Njambi omwo mana ove, na evi unalingi ku litangwa lya lelo, nakunjinyunga ku mulonga wakutsiya, nakulilingila shambandinga yange vavenya.

³⁴ Shukulu Kalunga nanjinyungu kukukuvulumuna. Oloni njilisinga mu lizina lya Njambi ya Isalele wakuyoya ngwange nga kuwazambwile kwakuliwana nange, nga vanu va Navale voshe vanatsi ku mutondo!”

³⁵ Asinoni Ndaviti watambwile vije vyamunenelele Avingaile, co wendekele kuli ikeye ngwendi, “Iluka mwamuvwa kwimbo, kesi ulinyenge. Njikalinga vije vyoshe viwushaka.”

³⁶ Avingaile welukile kuli Navale, ikeye wakele nakulinga ciwano mu njuvo yendi, ngwe ciwano ca mwene. Navale wavwaelelele manene omo wapendele, ngecivene, Avingaile kamulekele cuma cimo noo alikaki mutondo.

³⁷ Ngecivene, omo vyuma vije vinahu, Navale wakele mwamuvwa omo vwala vwamutundile, co Avingaile wamulekele vyuma vyoshe. Co Navale wezukile mbunge, wapwile muka-kalepa.

³⁸ Omo matangwa likumi ahwile, Shukulu Kalunga wahisile Navale, co watsile.

³⁹ Omo Ndaviti wazivile ngeci Navale natsi, co wendekele ngwendi, “Wakushangazala Shukulu Kalunga! Nalingi shambandinga ali Navale omwo wanjishawile, oloni navindika yange ngamba yendi kulinga mwamuvi. Shukulu Kalunga nahisa Navale omwo vuvi vwendi.” Asinoni Ndaviti watumine lijwi lyakwihula Avingaile ngeci akapwe munakazi wendi.

⁴⁰ Co omo vangamba vaile kuli Avingaile ku Kalemele, vendekele kuli ikeye ngwavo, “Ndaviti natutumu ngeci tuye nove ukapwe u munakazi wendi.”

⁴¹ Avingaile watsikamene a mavuli nakulemesa, co wendekele ngwendi, “Yange ngamba yendi, njinalivwaesela cimweja kujwelesa mendi a vangamba va shukulu yange.”

⁴² Co wakatukile vwasi walondele a cimulu cendi. Waile amolika na vangamba vendi va vanakazi vatanu, amo na vangamba va Ndaviti, co wapwile munakazi wa Ndaviti.

⁴³ Ndaviti wambatele lalo Ahinowame wa ku Njezelele, Avingaile lalo wapwile munakazi wendi.

⁴⁴ Saulu washombwesele munendi Mikale, uje wapwile munakazi wa Ndaviti, kuli Paliti muna Laishe, wa ku limbo lya Ngalime.