1 Samwele 24 - Livulu lya Shukulu Kalunga

Ndaviti amena mwonyo wa Saulu

¹ Omo Saulu welukile nakulwa na vaFilisitiya, co vamulekele ngwavo Ndaviti ali mu mambo ya Engendi.

² Co Saulu waile na mashwalale 3,000 va nzili va mu Isalele, vaile nakushakezeka Ndaviti na vanu vendi mu ngangela ku Mamanya a Makunda.

³ Saulu wetele ku limba lya vimanga kumukulo wa ngila, kwakele linzenzengoma, wakovelelemo nakuhwiminamo. Kuma Ndaviti na vanu vendi vakele mukati-kati ka linzenzengoma.

⁴ Co vanu va Ndaviti vendekele kuli ikeye ngwavo, “Kenga, eli likelyo litangwa lyatumbwile Shukulu Kalunga ngwendi, ‘Njikaka citozi cove mu mavoko ove, ukasa kulinga nendi mwoshe muushakela.’ ” Co Ndaviti wakalavele waile wakavatwile nanga ku mukundwilo wa cikoveyo ca Saulu kwakujeneka Saulu kuzivuka.

⁵ Oloni Ndaviti wakele na citaku-taku omwo wavatwile nanga ya ku mukundwilo wa cikoveyo ca Saulu,

⁶ co Ndaviti wendekele kuli vanu vendi ngwendi, “Shukulu Kalunga anjivindike kulinga cuma cakuvulumuna shukulu yange, ou yanavwavesa kupwa mwene! Yange kunjapandele kumuvulumuna nambe kamandondo, omwo napu mwene wakuvwavesa kuli Shukulu Kalunga!”

⁷ Ngecivene, Ndaviti wavindikile vanu vendi kuvulumuna Saulu. Co Saulu wakatukile, watundile muje mu linzenzengoma, waile mu ngila yendi.

⁸ Co Ndaviti watuukile lalo, wamukavele munima, wamusanene ngwendi, “Shukulu!” Co Saulu watengulukile nakukenga kunima, co Ndaviti watsikamene asi nakulemesa,

⁹ co wendekele ngwendi, “Omwo vika ulinakutolilila ku majwi a vanu valinakwendeka ngwavo, ‘Ndaviti alinakushaka kukuvulumuna?’

¹⁰ Kenga, litangwa lya lelo mesho ove analimwena ngeci, muje mu linzenzengoma Shukulu Kalunga nakukundikile mu mavoko ange. Co vanu vange vamo vanjilekele ngeci njikutsiye, oloni yange njakuzivilile mema ku mbunge. Co njinendekele ngwange, ‘Kunjapandele kuvulumuna uje yanavwavesa Shukulu Kalunga.’

¹¹ Tate, kenga nanga ya ku mukundwilo wa cikoveyo cove eyi injinakwata! Njapandele kukutsiya, oloni njavatula lika nanga ya ku mukundwilo wa cikoveyo cove. Co eci cilinakukumwesa ngeci yange kunjesi na vutumbe vwakuyongola kukulwisa nambe kukuvulumuna. Yove ulinakunjiyomba ngeci unjitsiye, yange kunjalingile cuma cimo cacivi kuli yove.

¹² Ngeci Shukulu Kalunga asompe akati ketu tuvavali iya umo naviisa! Ngecivene, ikeye akunyanyamese a vilinga vyove vyakunjilwisa, omwo yange kunjikakuvulumuna embwe.

¹³ Uzivuka visimutwiya vya va san̄ulu ngwavo, ‘Vuvi vakavulingi lika vanu vaje vaka-vuvi.’ Ngecivene, yange kunjikakuvulumuna embwe.

¹⁴ Mwene wa mu Isalele alinakweseka kutsiya iya? Kenga uje yalinakusheka! Katali wa kutsa? Indi njandu wangoco?

¹⁵ Ngecivene, Shukulu Kalunga atusompe, awane akati ketu iya umo naviisa. Shukulu Kalunga akenge a n̄anda eyi, nakunjamena, nakunjovola kuli yove.”

¹⁶ Omo Ndaviti wamanesele kwendeka, co Saulu ngwendi, “Mwa vushunga, yove munange Ndaviti vene ndi?” Co Saulu washangumukile kulila.

¹⁷ Asinoni Saulu wendekele kuli Ndaviti ngwendi, “Yove unalingi mwamuvwa, yange njalingi mwamuvi manene! Yove uli na mema ku mbunge ali yange, oloni yange njakulingi mwamuvi manene.

¹⁸ Ku litangwa lya lelo unamwesa vuvwa vwove kuli yange, omwo kuwanjitsiile, nameme Shukulu Kalunga nanjikundikile mu mavoko ove.

¹⁹ Visimbu vingaijo munu akwata citozi cendi, co amwecela aliile ngoco? Shukulu Kalunga akuvezikise a vyuma evi unalingi kuli yange ku litangwa lya lelo!

²⁰ Ololo njazivuka ngeci ukapwa mwene wa mu Isalele, na vumwene vukatwalao mukushwana kwove.

²¹ Oloni likumiiye kuli yange mu lizina lya Shukulu Kalunga ngeci yove ukamene vatekulwila vange, ngecivene, lizina lyange, na lizina lya naanga yange, kesi likanyonge.”

²² Co Ndaviti walikumiiye ngeci akacilinga. Asinoni Saulu welukile kwimbo, co Ndaviti na vanu vendi velukile ku mwela wavo wavuvandelo.