1 Samwele 22 - Livulu lya Shukulu Kalunga

Saulu atsiya vaka-kukombelela

¹ Ndaviti watewele kutunda mu nganda ya Ngate, co waile ku linzenzengoma lya kuyehi na nganda ya Andulame. Omo vandolome vendi na naanga yoshe vazivile ngwavo ali kuje, co vaile nakuliwana nendi.

² Vanu vaje vavakele nakuyandesa, nambe vaje vakele na makongo, nambe vaje vakele nakulinyenga, vaile kuli ikeye, voshe amolika vapwile 400, ikeye wapwile ntwama yavo.

³ Kutunda aje, Ndaviti waile ku Mizipa ku Mowavi, co wendekele kuli mwene wa ku Mowavi ngwendi, “Shukulu, tava tate na vanana vaije nakutumbama amo nove noo njikawana vije Njambi akanjilingila.”

⁴ Ngecivene, Ndaviti wasezele visemi vendi kuli mwene wa ku Mowavi, co vakevo vakele kuje simbu yoshe ije yakele Ndaviti mu linzenzengoma lya mu limanya.

⁵ Co Ngande muka-kwimanena wezile kuli Ndaviti wendekele ngwendi, “Kesi utumbame kuno embwe, ya ano vene ku lifuti lya Yunda.” Co Ndaviti wakatukile waile mu shwata ya Helete.

⁶ Litangwa limo, Saulu wakele mu Ngimbeya, watumbamene mwisi ya muti wa tamalisiki a lilundu, na likunga lyendi mu livoko, co vamyata vendi vemanene nakumuzengeleka. Vamulekele ngwavo Ndaviti na vanu vendi vanavawana,

⁷ co ikeye wendekele kuli vamyata vendi ngwendi, “Tolilileni, eni vanalume vaMbenjemani! Kuma yeni muyongola ngeci muvavoshe Ndaviti akasa kumyana mahya, na vitungu vya mikolovozi ya vushuka vwa vinyu nakumipwisa vamyata mu nzita yendi ndi?

⁸ Kuma mukemwo mulinakunjilwisa? Naumo wai wa akati keni nanjileke ngeci munange nalikwata vusamba na Ndaviti. Naumo wai wa akati keni alinakunjizivilako mema ku mbunge, nambe anjilekeko vya Ndaviti, umo wa akati ka vanu vange, a simbu ino alinakushakezeka ngila yakunjitsiilamo, ikeye nashongangeya na munange!”

⁹ Ndoenge wemanene kuje amo na vamyata va Saulu, wendekele ngwendi, “Njamwene Ndaviti omo waile kuli Ahimeleki muna Ahitumbe mu Nombe.

¹⁰ Ahimeleki wehwile Shukulu Kalunga vije vyanapande kulinga Ndaviti, asinoni Ahimeleki waanene Ndaviti vyakulya, na mukwale wa Ngolyata kaFilisitiya.”

¹¹ Ngecivene, Mwene Saulu wasanene Ahimeleki muka-kukombelela muna Ahitumbe, na vavushoko vwendi voshe, vaje vapwile lalo vaka-kukombelela mu Nombe, vezile kuli ikeye.

¹² Saulu wendekele kuli Ahimeleki ngwendi, “Tolilila, Ahimeleki!” Co Ahimeleki wakumbulwile ngwendi, “Yange uno Shukulu.”

¹³ Saulu wamwihwile ngwendi, “Omo vikajo yove na Ndaviti muli na vutumbe vwakunjilwisa? Vika wamwanenene vyakulya, na mukwale, nakumwihwila kuli Njambi? Ololo nanjitengulukila nakunjilwisa, navandamena simbu yakunjitsiya!”

¹⁴ Ahimeleki wamukumbulwile ngwendi, “Ndaviti napu ntwama wa kulongwa manene kuli vantwama vove voshe! Ikeye ishomweno, muka-kupangesa vaka-kukunyunga, co ikeye wakala na kasingimiko kakama manene kuli munu na munu wa mu mbanja yove ya vumwene.

¹⁵ Kuma lelo njinashangumuka kumwihwila kuli Njambi ndi? Embwe mwane. Shukulu kuwapandele kunjihisa nambe umo wa ku naanga yange. Kunjizivuka cuma nacimo cai a n̄anda eyi!”

¹⁶ Mwene wendekele ngwendi, “Ahimeleki, yove na vavushoko vwove voshe munapande kutsa.”

¹⁷ Co wendekele kuli vaje vaka-kunyunga vemanene kuyehi nendi ngwendi, “Tsiyeni vaka-kukombelela va Shukulu Kalunga! Vakevo na Ndaviti valinakunjilwisa, co kuvanjilekele ngeci natewa, nameme voshe vazivukile.” Oloni vaka-kunyunga vavyanene kujundula livoko nakutsiya vaka-kukombelela va Shukulu Kalunga.

¹⁸ Ngecivene, Saulu wendekele kuli Ndoenge ngwendi, “Vatsiye!” Co Ndoenge wavatsiile voshe. A litangwa lije, watsiile makumi atanu na atatu na vanu vatanu vaka-kukombelela, vaje vapandelemo mukuzala tungamuna twa linyu.

¹⁹ Ngecivene, Saulu watapele lalo vanalume, na vanakazi, na vanike, na vimbututu, na vingombe, na vimulu, na vimanga, na voshe vaje vakele mu Nombe, nganda ya vaka-kukombelela.

²⁰ Oloni Aviyatale muna Ahimeleki, watewele, waile nakulipandakana na Ndaviti.

²¹ Walekele Ndaviti vati Saulu natsii vaka-kukombelela va Shukulu Kalunga.

²² Ndaviti wendekele kuli ikeye ngwendi, “Omo njamwene Ndoenge kuje a litangwa lije, njazivukile ngeci mwa vushunga akaleka Saulu. Ngecivene, njili na mulonga omwo kutsa oku kwoshe kwa vavushoko vwove.

²³ Kala kuno nange kesi uzive lyova embwe. Saulu ashaka kutsiya yove nange muvuvali vwetu, oloni yove ukakala nange.”