1 Samwele 21 - Livulu lya Shukulu Kalunga

Ndaviti atewa Saulu

¹ Ndaviti waile ku Nombe kuli Ahimeleki muka-kukombelela. Co Ahimeleki wajajele, akuliwana nendi, co wehwile Ndaviti ngwendi, “Vikajo unezila kuno ove lika?”

² Ndaviti wamukumbulwile ngwendi, “Njinaija kuno nakupanga vipangi vya mwene. Ikeye wanjilekele ngwendi, ‘Kesi utave munu umo azivuke evi njinakutumu, nevi njinakushiki.’ Co njinashiki vanu vange ngeci twakuliwanene ku mutambela uno.

³ Ngecivene, vyakulya muka ulinavyo? Njane mikasha ya makende itanu, nambe cuma cimo ceka ciwulinaco.”

⁴ Co muka-kukombelela wendekele ngwendi, “Kunjesi na makende angoco ayi kuvanga lika makende akujela, wasa kuwambata nga vanu vove vanalinyungu ku vanakazi simbu ino.”

⁵ Ndaviti wamukumbulwile ngwendi, “Mwa vushunga nacimo civanalingi cai. Vanu vange simbu yoshe vaka-kulinyunga ku futisi yakujela omo vaya mu vipangi vyangoco, co vationi a simbu ino omo tuli mu vipangi vyakama?”

⁶ Ngecivene, muka-kukombelela waanene makende a cizila kuli Ndaviti, omwo mikasha ya makende aje akele nawo apwile lika akukombelela kuli Njambi, mikasha ije ivatundisile ku mesa yakujela, co vengisilemo makende eka amaha.

⁷ (Mukulunu wa tunyungi twa Saulu lizina lyendi Ndoenge, kaEndome, wakele kuje a litangwa lije, omwo washakele kushulisa vya vuNjambi vwendi.)

⁸ Ndaviti wendekele kuli Ahimeleki ngwendi, “Uli na likunga nambe mukwale unjaneko? Omwo lishiko lya mwene lyanjikatwile vwasi, co kunjalivwaeselele kwambata mukwale nambe citwa cange cimo.”

⁹ Ahimeleki wamukumbulwile ngwendi, “Njili na mukwale wa Ngolyata uje kaFilisitiya iwatsiilile mu Cana ca Ela, ukewo uli munima ya kangamuna kange, wakuzengela a nanga. Nga uushaka, wambate, cikeco lika citwa cili kuno.” Ndaviti wendekele ngwendi, “Njanewo, omwo kukwesi mukwale wakuvambuka kutuvakana ou!”

¹⁰ Ngecivene, Ndaviti waile, kutewa Saulu, co waile kuli Mwene Akishe wa ku Ngate.

¹¹ Co vamyata va mwene vendekele kuli Akishe ngwavo, “Ou kuma kesi Ndaviti, mwene wa lifuti? Ou ikeye munalume uje vembile vanakazi mukulisamba kwavo ngwavo, ‘Saulu natsii 1,000, oloni Ndaviti ikeye natsii 10,000.’ ”

¹² Majwi avo avavalesele manene mbunge ya Ndaviti, co wazivile lyova kuli Mwene Akishe.

¹³ Ngecivene, Ndaviti watengulwile vilinga vyendi, walipwisile ngwe wa mana, co walingile ngwe wakuzaluka, omo vesekele kumunyunga, co ikeye wakele nakusoneka a vikolo vya mu nganda nakujejela a munjezi wendi.

¹⁴ Ngecivene, Akishe wendekele kuli vamyata vendi ngwendi, “Kengeni! Ou munu wakuzaluka! Vika munamunenela kuli yange?

¹⁵ Kuma ava vakuzaluka njilinavo kuvapwilemo ndi? Omwo vika lalo munena mukwavo kuno ku njuvo yange akunjiyandese na vilinga vyendi vyakuzaluka?”