1 Samwele 2 - Livulu lya Shukulu Kalunga

Lilombelo lya Hana

¹ Hana walombelele ngwendi, “Mbunge yange ijolela muli Shukulu Kalunga, njavwaelela omwo a evi vyanalingi Shukulu Kalunga! Njilinakujola vitozi vange, njijolela manene omwo Njambi nanjikwasa!

² “Kukwesi umo wakujela wakulifwa ngwe Shukulu Kalunga, wai wakulifwa Nendi, kukwesi muka-kunyunga wakulifwa ngwe Njambi yetu.

³ “Kesi mwendeke majwi akulishasha, kesi mulyalese. Omwo Shukulu Kalunga ikeye Njambi azivuka, co asompa vyoshe vivalinga vanu.

⁴ “Mata a lusipa a mashwalale va nzili anapokoka, oloni vaka-kuzeya valinakukola na nzili.

⁵ “Vanu vaje valile mwamuvwa, ololo vanajeneka vyakulya, oloni vaje vakele na njala kuvesi lalo na njala. Mumba nakiti vana vatanu na vavali, oloni uje wakitile vavangi nasala mavoko-voko.

⁶ “Shukulu Kalunga atsiya, co ayoyesa, ikeye atwala vanu ku vukalo vwa vatsi, co avelwisa lalo.

⁷ “Ikeye autwisa vanu vamo, co vamo avafukisa, Ikeye akeesa vamo, co vamo avapwisa vakama.

⁸ “Ikeye atundisa tuutu mu likungu, co avakwasa mukujeneka kwavo. Akavapwisa vasamba va vimyene akavaka mu myela ya kasingimiko. Luvula lwa kaye lwapwa lwa Shukulu Kalunga, akeo natungila kaye.

⁹ “Ikeye anyunga myonyo ya vanu vendi va kulongwa, oloni vaka-vivi vanyonga mu lisusulungu, nzili ya munu kuyasa kumuhyanesa.

¹⁰ “Vitozi va Shukulu Kalunga vakavanyongesa, akavahyatwila mihyato mwilu. Shukulu Kalunga akasompa kaye koshe, ikeye akana nzili kuli mwene yendi, akahyanesa mwene uje yanalyangwila.”

¹¹ Asinoni Elekana welukile kwimbo lyendi ku Lama, oloni mwanike Samwele wasalele ku Shilo nakupangela Shukulu Kalunga, wakele ku mavoko a Eli muka-kukombelela.

Vana va Eli

¹² Vana va Eli vapwile vanu vavavi manene. Kuvakele na lyova kuli Shukulu Kalunga,

¹³ nambe ku mashiko aje anakundama ku vyuma vivashaka vaka-kukombelela kuli vanu. Oloni omo munu aija nakukombelela n̄ombelo yendi, co ngamba ya muka-kukombelela aija na cimbonde ca mishomo itatu cakutivisa situ. Simbu vacili nakuteleka situ,

¹⁴ co akovelesa cimbonde mu ndeo ije valinakuteleka, vyoshe vije citiva cije cimbonde ca mishomo, co vinapu vya muka-kukombelela. VaIsalele voshe vaje vezile ku Shilo mukukombelela vin̄ombelo, mukemwo muvakele nakuvalinga mu cifwa eci vene.

¹⁵ Nameme omo kanda vatundise mazi nakuwenyeka, co uje ngamba ya muka-kukombelela aija nakwendeka kuli uje alinakukombelela ngwendi, “Njaneko situ imo akoce muka-kukombelela, ikeye kashaka kulya situ yakuteleka, ashaka lika yaivishu.”

¹⁶ Nga uje munu amukumbulula ngwendi, “Ecela tai tucenyeke mazi, asinoni wambata viwushaka.” Co uje ngamba ya muka-kukombelela amukumbulula ngwendi, “Embwe! Njaneyo vene ololo! Nga kuushaka, co njilinonelayo mu nzili yange!”

¹⁷ Ovu vuvi vwa vana va Eli vwapwile vwakama manene ku mesho a Shukulu Kalunga, omwo vakele nakushaula manene vin̄ombelo vakele nakukombelela kuli Shukulu Kalunga.

Samwele ku Shilo

¹⁸ Mu simbu ije vene Samwele wakele nakupangela Shukulu Kalunga, co wazalele kangamuna ka linyu kakujela.

¹⁹ A mwaka na mwaka vaina vakele nakumutungila vuzalo vumo vwa vulaja, co vamutwalelelevwo omo vakele nakuya amo na munalume wendi nakukombelela n̄ombelo ya a mwaka na mwaka.

²⁰ Co Eli wavezikisile Elekana na munakazi wendi, wendekele kuli Elekana ngwendi, “Shukulu Kalunga akakwane vana veka lalo kuli munakazi ou omwo a lilombelo lije lyalombelele kuli Shukulu Kalunga.” Omo vamanesele vyoshe evi, velukile kwimbo.

²¹ Co Shukulu Kalunga wavezikisile Hana, wakele lalo na vana vatatu va vanalume, na vana vavali va vanakazi. Samwele wakolele nakupangela Shukulu Kalunga.

Eli na vana vendi

²² Eli wakuluvalele manene. Wakele nakuziva vyoshe vije vakele nakulinga vana vendi kuli vaIsalele voshe, co lalo vakele nakulala na vanakazi vaje vakele nakupanga ku cikolo ca Mbalaka Mwakuliwanena.

²³ Ngecivene, Eli wendekele kuli vakevo ngwendi, “Omwo vikajo mulinakulinga vyuma evi? Vanu vavangi valinakunjileka a vuvi vweni vumulinakulinga.

²⁴ Embwe vana vange, likeleni! Vyuma evi vinapu vyakukomokesa vivalinakwendeka vanu va Shukulu Kalunga.

²⁵ Nga munu avulumwina mukwavo, Njambi amwamena, oloni nga munu avulumwina Shukulu Kalunga, iyajo amwamena?” Oloni kuvatolililile ku majwi a ishavo, omwo Shukulu Kalunga te nayongola laja kuvatsiya.

²⁶ Oloni Samwele wakolele, co wawanene kasingimiko ku mesho a vanu na ku mesho a Shukulu Kalunga.

Vuka-kwimanena vwa a naanga ya Eli

²⁷ Muka-kwimanena wezile kuli Eli na majwi akutunda kuli Shukulu Kalunga ngwendi, “Omo kukulwila yove Alone, na naanga yendi vapwile vinzinda va mwene wa Ingito, njasholokele kuli ikeye.

²⁸ Co ku miyati yoshe ya Isalele njaangwileko naanga yendi kupwa vaka-kukombelela vange, kupanga ku mutula nakwenyeka insense, nakuzala kangamuna ku mesho ange. Co njavanene moko yakunyunga mutambela wa vin̄ombelo vya kwenyeka a mutula.

²⁹ Ngecivene, omwo vikajo muli na cipululu a vyakukombelela na vin̄ombelo vinjishaka kuli vanu vange? Omwo vikajo Eli, ulinakusingimika vana vove kutuvakana yange akuvecelela valinunise vakevo na matambelo oshe amavwa a vin̄ombelo vivakanjikombelela vanu vange?

³⁰ Yange Kalunga Njambi ya Isalele, njakulaesele laja naanga yove na cikota cove ngeci vakanjipangela kupwa vaka-kukombelela. Oloni ololo njendeka ngwange kunjishaka lalo ngacije embwe! Oloni njikasingimika vaje vanjisingimika, co vaje vanjiyengula nange njikavashaula.

³¹ Kenga, simbu ilinakwija omo njikatsiya vakwenje voshe va mu naanga yove na mu cikota cove, ngecivene, munu naumo wai wa mu naanga yove akayoya ngeci akakuluVaLe

³² Ukakala mu tuyando, co ukakenga nakulinyenga a vivezikiso vyoshe vinjikana kuli vanu va Isalele, oloni ku naanga yove naumo wai akayoya ngeci akakuluvale manene.

³³ Oloni nameme ngoco njikayoyesa umo wa ali vatekulwila vove, co akanjipangela kupwa muka-kukombelela. Oloni ikeye akapwa kapuputwa, co akajeneka cinyangavili, co vatekulwila vove voshe vakatsa ku monde.

³⁴ Omo vana vove vavali Hofene, na Finehase vakatsa litangwa limolika, co eci cikakumwesa ngeci vyoshe vinjendeka vinapu vya vushunga.

³⁵ Njikaangula muka-kukombelela wa kulongwa ku mesho ange, ikeye akalinga vyuma vyoshe vinjishaka ngeci avilinge. Co njikamwana vatekulwila vaje vakapanga simbu yoshe ku mesho a uje mwene injinalyangwila.

³⁶ Mutekulwila wove woshe uje akayoya akaye kuli muka-kukombelela akamulombe vimbongo na vyakulya, co akalombe kukwasa vaka-kukombelela, ngeci akale na vyakulya vimo.”