1 Samwele 18 - Livulu lya Shukulu Kalunga

¹ Omo Ndaviti wamanesele kwendeka na Saulu, co Yonatana wazemene manene Ndaviti ngwe mwalizema ikeye vavenya.

² Kutunda a litangwa lije, Saulu wakele amo na Ndaviti mu njuvo yendi, co kamutavesele lalo ngeci eluke kwimbo lyavo.

³ Co Yonatana walikumiiye cikumiiyo na Ndaviti omwo wamuzemene manene ngwe mwalizema ikeye vavenya.

⁴ Washulwile cikoveyo cendi cije cazalele, wacanene kuli Ndaviti, amo na vitwa vyendi, na mukwale wendi, na vuta vwa lusipa, na mwiva.

⁵ Co Ndaviti wakele nakuya kwoshe kuje kwakele nakumutuma Saulu, co Saulu wamupwisile mwata wa mbunga ya mashwalale vendi. Cifwa eci cavwaelelesele vanu voshe va Saulu, na vamyata vendi.

Saulu azivila Ndaviti lifuwa

⁶ Omo Ndaviti welukile kutunda kuje kwakatsiile Ngolyata, omo mashwalale lalo velukile kwimbo, vanakazi va mu vinganda vyoshe vya vaIsalele vezile nakushesha Mwene Saulu. Vembile myaso yakuvwaelela, nakukina, nakwimba tumbulumbumba, na visanzi.

⁷ Co omo vanakazi valisambele vembile ngwavo, “Saulu natsii 1,000, oloni Ndaviti ikeye natsii 10,000.”

⁸ Co Saulu kavwaelelele akulisamba kwavo, co waluvalele manene. Wendekele ngwendi, “Kuli Ndaviti vendeka ngwavo 10,000, oloni yange ngwavo 1,000 lika. Ololo cuma mukajo casalako kuli ikeye kuvanga kumupwisa mwene!”

⁹ Co tunde aje vene Saulu wakele na lifuwa ali Ndaviti.

¹⁰ Alikaki, munzinzime wauvi wakutunda kuli Njambi wakovelele muli Saulu, co ikeye wayambanganene mu njuvo yendi ngwe munu wakuzaluka, Ndaviti wakele nakwimba kalyalya, ngwe mwakele nakulinga a litangwa na litangwa, co Saulu wakwatele likunga mu livoko lyendi.

¹¹ Saulu wendekele mu mbunge yendi ngwendi, “Njikamupameyeya kumo na civumbe.” Co wamwashele likunga luvali, oloni a simbu na simbu Ndaviti lyamulojele.

¹² Saulu wakele na lyova ali Ndaviti, omwo Shukulu Kalunga wakele amo na Ndaviti, oloni ikeye Saulu Shukulu Kalunga wamujenjukile.

¹³ A cifwa cangacije, Saulu watundisile Ndaviti mu njuvo yendi, co wamupwisile muka-kushika vanu 1,000. Ndaviti watwamenenene vanu vendi mu nzita,

¹⁴ ku vyuma vyoshe vyalingile Ndaviti, wavilingile mwamuvwa, omwo Shukulu Kalunga wakele amo nendi.

¹⁵ Omo Saulu wamwene ngeci Ndaviti wakele nakulinga vyuma vyoshe mwamuvwa, co wamutewele manene kutuvakana akulivanga.

¹⁶ Oloni munu woshe wa mu Isalele na mu Yunda, wazemene manene Ndaviti omwo wapwile ntwama wakuhyana.

Ndaviti ambata muna Saulu

¹⁷ Asinoni Saulu wendekele kuli Ndaviti ngwendi, “Ambata munange wa mukulunu Melambe. Njikwanaye apwe munakazi wove, co yove ukapwa u lishwalale lyange wakusimpa na kulongwa, nakulwa vinzita vya Shukulu Kalunga.” (Saulu wayongwele ngwendi vaFilisitiya vakatsiya Ndaviti, omwo Saulu ikeye kasele kucilinga.)

¹⁸ Ndaviti wamukumbulwile ngwendi, “Yange iyajo, co lalo naanga ya tate yapwa ikajo mu Isalele, ngeci njipwe ishemweno ya mwene?”

¹⁹ Oloni omo simbu yetele ngeci Melambe ashomboke kuli Ndaviti, co Saulu washombwesele Melambe kuli munalume weka lizina lyendi Andelyele wa ku Mehola.

²⁰ Oloni Mikale muna Saulu, wazemene manene Ndaviti, omo Saulu wazivile ngacije, wavwaelelele manene.

²¹ Co wendekele mu mbunge yendi ngwendi, “Njikashombwesa Mikale kuli Ndaviti, njikamupangesa ngeci akamunzonge-nzonge, co vaFilisitiya vakamutsiya.” Ngecivene, Saulu wendekele simbu yamucivali kuli Ndaviti ngwendi, “Litangwa lya lelo upwa u tolomweno.”

²² Saulu washikile vamyata vendi vendeke kuli Ndaviti mu vushweke ngwavo, “Mwene alinakuvwaelela nove na vamyata vendi voshe vakuzema, ngecivene, upwe ishemweno ya mwene.”

²³ Ngecivene, vambulwile majwi aje kuli Ndaviti, co ikeye wakumbulwile ngwendi, “Cinapu cuma cakama ca kasingimiko kupwa ishemweno ya mwene, cuma cakama manene kuli kautu wa seo ngwe yange.”

²⁴ Co vaje vamyata valekele Saulu vije vyendekele Ndaviti,

²⁵ co Saulu wavashikile valeke Ndaviti ngwavo, “Cashaka lika mwene kuli yove kupwa vyonda cuma ceka cai kuvanga vikonde vya vaFilisitiya 100 va kutsa, ngwe shambandinga kuli vitozi vendi.” (Ovu vukevwo vutumbe vwatumbile Saulu ali Ndaviti ngeci Ndaviti vamutsiye vaFilisitiya.)

²⁶ Vamyata va Saulu valekele Ndaviti majwi a mwene, co Ndaviti wavwaelelele manene a viyongola vyakupwa ishemweno ya mwene. Omo litangwa lya vulo kanda lyete,

²⁷ Ndaviti na vanu vendi vaile nakutsiya vaFilisitiya 200. Co Ndaviti watwalele vikonde vyavo kuli mwene, co wavilavele ku mesho a mwene, ngeci ikeye apwe ishemweno. Ngecivene, Saulu waanene munendi Mikale kuli Ndaviti apwe munakazi wendi.

²⁸ Co Saulu wamwene mwamuvwa ngeci Shukulu Kalunga ali amo na Ndaviti, co lalo munendi Mikale wazemene manene Ndaviti.

²⁹ Ngecivene, Saulu wazivile manene lyova ali Ndaviti. Co wapwile citozi cendi mukuyoya kwendi kwoshe.

³⁰ Co mbunga ya mashwalale va vaFilisitiya vakele nakwija nakulwa, oloni mu nzita yoshe Ndaviti wakele nakuhyana kutuvakana vamyata va Saulu, co a cuma cangacije, Ndaviti watsimanene manene.