1 Samwele 15 - Livulu lya Shukulu Kalunga

Nzita na vaAmaleke

¹ Samwele wendekele kuli Saulu ngwendi, “Shukulu Kalunga wanjitumine kukuvwavesa, ngeci upwe mwene wa vanu vendi vaIsalele. Ololo tolilila vyendeka Shukulu Kalunga Muka-nzili yoshe.

² Ikeye akanyanyamesa vanu va Amaleke omwo vakukulwila vavo vashawile vaIsalele omo vatundile ku Ingito.

³ Ngeci yeni mukalwise vaAmaleke, co mukanyongese vyuma vyoshe vije valinavyo. Kesi mukasezeo cuma cimo, oloni yeni mukatsiye vanalume voshe, na vanakazi, na vanike, na vimbututu, na vimanga, na tumelo, na vimulu.”

⁴ Saulu wasanene mashwalale vendi amolika, co wavelwile ku Teleme, kuje kwakele mashwalale vakupwa 200,000 ku Isalele, na mashwalale vakupwa 10,000 ku Yunda.

⁵ Asinoni Saulu na vanu vendi vaile ku nganda ya Amaleke, co vavandele mu cana.

⁶ Saulu wanangwile vaKeni, vaje vakukulwila vavo vakele na ngozi na vaIsalele omo vatundile ku Ingito ngwendi, “Teweni museze vaAmaleke, omwo kunjishaka kumitsiya amolika navo.” Ngecivene, vaKeni vatewele.

⁷ Co saulu wafungulwile vaAmaleke, kushangumukila ku Havila nakweta ku Shule, mu ngangela ya Ingito,

⁸ Ngecivene, wakwatele Mwene Angange wa Amaleke, co watsiile vanu voshe.

⁹ Oloni Saulu na vanu vendi vayoyesele Angange, co kuvatsiile lalo vimanga vavavwa, na vingombe, na vana va vingombe vavavwa, na vana va vimanga, na vyoshe vije vya seo.

Shukulu Kalunga avyana Saulu kupwa mwene

¹⁰ Shukulu Kalunga wendekele kuli Samwele ngwendi,

¹¹ “Njalisimoka omo njaakele Saulu a vumwene, ikeye nanjikengesa nima, navyana mashiko ange.” Co Samwele waluvalele, walililile kuli Shukulu Kalunga vutsiki vwoshe.

¹² Alikaki mutondo-tondo, Samwele waile nakushakezeka Saulu. Co wazivile ngwavo Saulu nai ku limbo lya Kalemele, kuje watungile limanya lyakulyanukilao ikeye vavenya, co watundile lalo kuje waile ku Ngilingale.

¹³ Samwele walamatele waile kuli Saulu, co Saulu wamukandelelele, wendekele ngwendi, “Shukulu Kalunga akuvezikise, Samwele! Njinononoka lishiko lya Shukulu Kalunga.”

¹⁴ Samwele wehwile ngwendi, “Omwo vikajo, njilinakuziva kutamuna kwa vingombe, nakuteta kwa vimanga?”

¹⁵ Saulu wamukumbulwile ngwendi, “Vanu vange vakevo vanavambatele kuli vaAmaleke. Vambateleko vimanga, na vingombe vavavwa ngeci vavikombelele kuli Shukulu Kalunga Njambi yove, co vaje vasaleleo twavanyongesele voshe njwa.”

¹⁶ Samwele wamulekele ngwendi, “Vandamena tai njikuleke evi vyananjileka Shukulu Kalunga ku vutsiki ovu vene.” Saulu wendekele ngwendi, “Njileke.”

¹⁷ Samwele wamulekele ngwendi, “Nameme waliyongola ngwove kuwesi na seo, oloni unapu u ntwama ya miyati ya Isalele. Shukulu Kalunga wakuvwavesele kupwa mwene ya Isalele,

¹⁸ co Shukulu Kalunga wakutumine nakukushika ngeci ukanyongese vaka-vuvi vanu va Amaleke. Wakulekele ukalwe noo unavanyongesa voshe.

¹⁹ Co omwo vikajo kuwononokele majwi a Shukulu Kalunga? Omwo vikajo washatukilile ku vyakupukula, co walingile vije kuvyavwaelelesele Shukulu Kalunga?”

²⁰ Co Saulu wamukumbulwile ngwendi, “Njinononokele majwi a Shukulu Kalunga. Njinaile ngwe mwanjilekele, njinanena Mwene Angange, co njatsiile vaAmaleke voshe.

²¹ Oloni vanu vange kuvatsiile vimanga, na vingombe vavavwa vaje vavafungulwile, oloni, vanavanena kuno ku Ngilingale nakukombelela n̄ombelo kuli Shukulu Kalunga Njambi yove.”

²² Samwele wendekele ngwendi, “Cuma muka nashaka Shukulu Kalunga? Vin̄ombelo vya kwenyeka indi kukombelela nakumwononoka? Mwamuvwa kumwononoka kutuvakana kumukombelela vimanga vavavwa. Cinapu cuma cacivwa kumwononoka kutuvakana kumukombelela mazi a majamba.

²³ Kumutengulukila kunapu ngwe vulozi, co kulyalesa kunapu ngwe vuvi vwakulemesa vinjambi veka. Omwo unavyana lishiko lya Shukulu Kalunga, co nendi lalo nakuvyana kupwa mwene wa mu Isalele.”

²⁴ Co Saulu wamukumbulwile ngwendi, “Eyo, njinalingi vuvi. Kunjononokele lishiko lya Shukulu Kalunga na majwi ove. Omwo njakele na lyova na vanu vange, co njalingile vije vivashakele.

²⁵ Oloni njilomba unjisambese ku vuvi vwange, co wiluke amo nange ngeci njikalemese Shukulu Kalunga.”

²⁶ Co Samwele wamukumbulwile ngwendi, “Kunjiiluka amo nove, omwo unavyana lishiko lya Shukulu Kalunga, co nendi lalo nakuvyana kupwa mwene wa mu Isalele.”

²⁷ Omo Samwele watengulukile ngeci aye, co Saulu wakwatele ku cikoveyo cendi, co catavukile.

²⁸ Samwele walekele Saulu ngwendi, “Ku litangwa lya lelo Shukulu Kalunga natundisa vumwene vwa Isalele kuli yove, co navwana kuli mukweni weka nakutuvakana.

²⁹ Njambi ya Isalele Muka-nzili yoshe kesi kwendeka makuli nambe kesi kutengulula viyongola vyendi embwe. Omwo ikeye kesi munu, ngeci atenguluke embwe.”

³⁰ Saulu wamukumbulwile ngwendi, “Njinalingi vuvi. Oloni njisingimikeko lika ku mesho a vantwama vange na kuli Isalele yoshe. Iluka amo nange ngeci njikalemese Shukulu Kalunga Njambi yove.”

³¹ Ngecivene, Samwele welukile amo nendi ku Ngilingale, co Saulu walemesele Shukulu Kalunga.

³² Ngecivene, Samwele washikile ngwendi, “Neneni Mwene Angange kuno.” Co Angange wezile kuli ikeye, nakujaja na lyova, co Angange walyendekesele ikeye vavenya ngwendi, “Kutsa capwa cuma cacikalu manene!”

³³ Samwele wendekele ngwendi, “Ngwe omo mukwale wove unalingisa vanakazi kujeneka kukala na vana, ngeci na vanyoko lalo kuvakakala na mwana.” Co wavatozwele Angange vipuka-vipuka kulutwe lwa mutula mu Ngilingale.

³⁴ Asinoni Samwele waile ku Lama, co Mwene Saulu waile kwimbo lyendi ku Ngimbeya.

³⁵ Samwele mukuyoya kwendi kwoshe kamwene lalo Saulu, oloni walinyengele ali ikeye. Co Shukulu Kalunga walisimokele omwo wapwisile Saulu mwene mu Isalele.