1 Samwele 14 - Livulu lya Shukulu Kalunga

Vilinga vya Yonatana vyakusimpa

¹ Litangwa limo, Yonatana muna Saulu wendekele kuli mukwenje wambatele vitwa vyendi ngwendi, “Tujavuke tuye musambwa mu cilombo ca vaFilisitiya.” Oloni Yonatana kalekeleko ishe Saulu,

² ikeye watungile cilombo cendi mwisi ya muti wa lipomingilanete mu Mingelone, kesi kulyala na Ngimbeya, wakele na vanalume vakweta ku 600.

³ (Ahiya muka-kukombelela wazalele kangamuna, Ahiya wapwile muna ndolome ya Ikambonde, Ahitumbe, wapwile muna Finehase mutekulu wa Eli, muka-kukombelela wa Shukulu Kalunga mu Shilo.) Vanu kuvazivukile ngeci Yonatana nai ku cilombo ca vaFilisitiya.

⁴ Yonatana wetile mukati ka ngila ya ku Mikemashe, co wetele ku cilombo ca vaFilisitiya, kuje kwakele mamanya avali akushongomoka, limanya limo valyakele sambwa limo lya ngila, limanya likwavo valyakele sambwa likwavo lya ngila, valitumbwile ngwavo Mbozeze, co likwavo ngwavo Sene.

⁵ Limo lyakele ku mutambela wa kunto ya ngila, lyakengele ku Mikemashe, co limo lalo lyakele ku mutambela wa mu mbwela lyakengele ku Ngemba.

⁶ Yonatana wendekele kuli uje mukwenje wambatele vitwa vyendi vya nzita ngwendi, “Tujavuke tuye musambwa mu cilombo ca vaFilisitiya vaje vaka- kuli kukulaela Shukulu Kalunga. Amo Shukulu Kalunga akatukwasa, omwo kukwesi vimuvindika kutuhyanesa, nambe tunapu tuvavandondo lika.”

⁷ Co mukwenje wamukumbulwile ngwendi, “Linga vyoshe vili mu mbunge yove, nange njili amo nove, vyoshe vili mu mbunge yove, vikevyo vili mu mbunge yange lalo.”

⁸ Co Yonatana wendekele ngwendi, “Mwamuvwa. Tujavuke musambwa, tukalimwese kuli vaFilisitiya.

⁹ Nga vatuleka ngwavo tuvavandamene vaije kuli yetu, co tukemana ano atuli.

¹⁰ Oloni nga vatuleka ngwavo tuye kuli vakevo, co tukaya vene, omwo cije cikapwa cimweso vanatwana kuli Shukulu Kalunga cakuvafungulula.”

¹¹ Ngecivene, valimwesele kuli vaFilisitiya, co vaFilisitiya vendekele ngwavo, “Kengeni! VaHevelu vamo valinakutuuka mu viteke muje muvavandele!”

¹² Co vasanene Yonatana na uje mukwenje ngwavo, “Lamateleni kuno! Kuli vimo tushaka kumileka!” Co Yonatana wendekele kuli uje mukwenje ngwendi, “Njikave. Shukulu Kalunga naana nzili Isalele yakuvafungulula.”

¹³ Ngecivene, Yonatana walamatele oku akalava a mavuli, co uje mukwenje wamukavele. Yonatana walwisile vaFilisitiya nakuvawisila asi, co uje mukwenje wavatsiile.

¹⁴ Co a simbu yakulivanga, Yonatana na mukwenje vatsiile vanalume makumi avali mu kamutambela kakandondo lika.

¹⁵ Co vaFilisitiya voshe vaje vakelemo valijajelele manene, vaka-kupukula, na mashwalale mu cilombo, valijajelele manene omwo lyova, na livu lyajajele, co kwakele kuuya-uya kwakama.

VaIsalele vafungulula vaFilisitiya

¹⁶ Vanu va Saulu vaje vavandamenene ku Ngimbeya mu lifuti lya Mbenjemani vamwene vaFilisitiya vali na kuuya-uya nakushatozoka.

¹⁷ Ngecivene, Saulu wendekele kuli vanu vendi ngwendi, “Laveni mashwalale mumone iya waiko.” Valingile ngacije, co vawanene Yonatana na uje mukwenje muka-kumwambatela vitwa vya nzita vaiko.

¹⁸ Co Saulu wendekele kuli Ahiya muka-kukombelela ngwendi, “Nena Cikasa ca Cikumiiyo kuno.” (A litangwa lije Ahiya wambatele Cikasa ca Cikumiiyo kulutwe lwa vanu va Isalele.)

¹⁹ Omo Saulu wacikele nakwendeka na muka-kukombelela, kuuya-uya kuje kwakele mu cilombo ca vaFilisitiya anga kwasholokele manene, co Saulu wendekele kuli ikeye ngwendi, “Ololo kukwesi simbu yakwihula Shukulu Kalunga!”

²⁰ Co Saulu na vanu vendi vakovelele mu nzita nakulwisa vaFilisitiya, vaje vakele nakulilwisa vakevo vavenya na kuuya-uya.

²¹ Co vaHevelu vamo, vaje vakele ku mutambela wa vaFilisitiya vavaile navo ku cilombo, vatengulukile nakulipandakana na vaIsalele ku mutambela kuje kwakele Saulu, na Yonatana.

²² Co vaIsalele vamo, vaje vavandele mu malundu a Efalime, vazivile ngeci vaFilisitiya valinakutewa, co na vakevo lalo valikumbasaneneko na vakwavo kulwisa vaFilisitiya.

²³ A litangwa lije Shukulu Kalunga wamenene Isalele, co valwile nzita vatuvakanene Mbetevane.

Vije vyasholokele omo nzita yahwile

²⁴ A litangwa lije vaIsalele vazeyele na njala, omwo Saulu walisingile cisingo, co washikile ngwendi, “Cisingo cikale ali munu woshe uje alya vyakulya lelo simbu kanda njilinge shambandinga vitozi vange.” Ngecivene, naumo wai walile cuma litangwa lyoshe.

²⁵ Co vanu vaile mu shwata, co vawanene vuki asi.

²⁶ Co omo vanu vetele mu shwata, vuki vwakele nakundweka, oloni naumo wai wavulile, omwo vatewele cisingo ca Saulu.

²⁷ Oloni Yonatana kazivileko omo ishe wasingile cisingo ku vanu, ngecivene, wakovelesele ku mako shongo ya mulamu wakwatele mu livoko lyendi, waukovelesele a ngenga ya vuki, co walileko tumo tuvuki. Co aje vene wazivileko mwamuvwa.

²⁸ Oloni umo wa ali vaje vanalume wamulekele ngwendi, “Tuvavoshe tunazeye omwo njala, oloni isho nasingile cisingo ngwendi, ‘Cisingo cikale ali woshe uje akalya vyakulya ku litangwa lya lelo.’ ”

²⁹ Yonatana wamukumbulwile ngwendi, “Tate nalingi cuma cakukaluwisa manene vanu vetu! Kengeni, ololo njaziviko mwamuvwa omwo njinalile tumo tuvuki!

³⁰ Vika vinekulingiwile, nga vanu vetu vanalile vyakulya vije vambatele omo vafungulwile vitozi. Kesi nga vaFilisitiya vavangi vanatsi?”

³¹ A litangwa lije vaIsalele vafungulwile vaFilisitiya, vavalwisile ngila yoshe kutunda ku Mikemashe nakweta ku Ainjalone. A simbu ije vaIsalele vazeyele manene na njala.

³² Co vashatukilile ku vije vapukwile kuli vitozi, vambatele vimanga, na vingombe, vavatsiilile aje vene, co valile situ na maninga ayo.

³³ Saulu vamulekele ngwavo “Kenga, vanu vove vanalingi vuvi ku mesho a Shukulu Kalunga akulya situ na maninga ayo.” Saulu watambekele ngwendi, “Eni vaka-vungungu! Andumwineni limanya olyo lyakama kuno kuli yange.”

³⁴ Co Saulu wavalekele ngwendi, “Yeni kuli vanu voshe mukavaleke ngeci vanene vingombe, na vimanga vavo kuno. Vakuvatsiile kuno nakuvalilako, kuvapandele kulinga vuvi ku mesho a Shukulu Kalunga akulya situ na maninga ayo.” Ngecivene, ku vutsiki vuje, voshe vanenele vingombe vavo nakuvatsiila kuje.

³⁵ Saulu watungilile Shukulu Kalunga mutula, ukewo mutula wakulivanga watungile.

³⁶ Saulu wendekele kuli vanu vendi ngwendi, “Vutsiki vuno tushelumukeni tukalwise vaFilisitiya, nakupukula vyavo noo kukya, nakuvatsiya voshe.” Vanu vamukumbulwile ngwavo, “Linga mwoshe muunashaka.” Oloni muka-kukombelela wendekele ngwendi, “Twihuleni Njambi akulivanga.”

³⁷ Ngecivene, Saulu wehwile Njambi ngwendi, “Njasa kulwisa vaFilisitiya ndi? Ukavakundika mu mavoko a Isalele ndi?” Oloni Njambi kakumbulwile litangwa lije.

³⁸ Co Saulu wendekele kuli vantwama va vanu ngwendi, “Ijeni kuno tumone vuvi muka vutunavulumuna ku litangwa lya lelo.

³⁹ Njilisinga kuli Shukulu Kalunga wakuyoya, ou muka-kuhyanesa Isalele ngwange, woshe uje navulumuna vakamutsiye, nameme vene munange Yonatana.” Oloni naumo wai wendekele.

⁴⁰ Co Saulu wendekele kuli vakevo ngwendi, “Yeni voshe imaneni oko, co Yonatana nange tukemana kuno.” Vanu vakumbulwile ngwavo, “Mwamuvwa linga mwoshe muushaka.”

⁴¹ Saulu wendekele kuli Shukulu Kalunga, Njambi ya Isalele ngwendi, “Shukulu Kalunga, vikajo kuwanjikumbulwilile litangwa lya lelo? Shukulu Kalunga, Njambi ya Isalele, njikumbulule a mamanya akujela. Nga mulonga unapu wa Yonatana, nambe wange, kumbulula a Ulime, oloni nga unakundama ku vanu vove va Isalele, co kumbulula a Tumime.” Co kukumbulula cenikile ali Yonatana na Saulu, co vanu va Isalele vasambele.

⁴² Saulu wendekele ngwendi, “Ta n̄ela akati ka munange Yonatana nange.” Co n̄ela yawililile Yonatana.

⁴³ Co Saulu wehwile Yonatana ngwendi, “Vika unalingi?” Yonatana wamukumbulwile ngwendi, “Njamakelele tuvuki twatundondo ku shongo ya mulamu wange. Yange uno, njalivwaesela laja kutsa.”

⁴⁴ Saulu wendekele kuli ikeye ngwendi, “Njambi anjitsiye nga yove kuutsi!”

⁴⁵ Oloni vanu vendekele kuli Saulu ngwavo, “Kuma Yonatana, ou nahyanesa manene Isalele, vamutsiye ndi? Embwe! Tulisinga ali Shukulu Kalunga wakuyoya ngwetu, kakasa kuzimbalesa nameme cin̄ambu ca ku mutwe wendi. Eci canalingi ku litangwa lya lelo cinapu kukwasa kwa Njambi.” Ngecivene, vanu vaamenene Yonatana kukumutsiya.

⁴⁶ Munima yevi, Saulu walikelele kusheka vaFilisitiya, co velukile ku lifuti lyavo.

Kushwana kwa Saulu na naanga yendi

⁴⁷ Omwo Saulu napu laja mwene mu Isalele, walwisile vitozi vendi voshe mu mitambela yoshe, vanu va ku Mowavi, na vanu va ku Amoni, na vanu va ku Endome, na vimyene va ku Zomba, na vaFilisitiya. Kwoshe kuje kwalwililile, wahyanene.

⁴⁸ Walwile nakusimpa, co wafungulwile vanu va ku Amaleke. Ikeye waamenene vaIsalele voshe kukuvalwisa.

⁴⁹ Vana va Saulu vapwile, Yonatana, na Ishevi, na Malekishwa. Munendi wa mukulunu wa munakazi lizina lyendi Melambe, co mutinikila lizina lyendi Mikale.

⁵⁰ Munakazi wa Saulu wapwile Ahinowame, muna Ahimaza, co muka-kushika nzita yendi wapwile ndolome yendi Avinele, muna inanu yendi Nele.

⁵¹ Ishe ya Saulu Kishe, na ishe ya Avinele, Nele, vapwile vana va Aviyele.

⁵² Mukuyoya kwendi kwoshe, Saulu wakele nakulwisa vaFilisitiya na nzili manene. Ngecivene, oshe aje awanene munalume wa nzili nambe wakusimpa, co Saulu wamukovelesele mu mbunga ya mashwalale.