1 Samwele 13 - Livulu lya Shukulu Kalunga

Nzita na vaFilisitiya

¹ Saulu wakele na myaka makumi atatu omo washangumukile kushwana, co washwanene mu Isalele myaka makumi awana na myaka ivali.

² Saulu waangwile vanalume 3,000 mu Isalele. Vanalume 2,000 vakele amo na Saulu ku Mikemashe mu lifuti lya malundu a ku Mbetele, co watumine vanalume 1,000 vaile na munendi Yonatana ku Ngimbeya, mu lifuti lya muyati wa Mbenjemani. Co vaje vasaleleo Saulu wavatumine munu na munu kuya ku mbalaka yendi.

³ Yonatana watsiile muka-kushika nzita ya Filisitiya mu Ngemba, voshe vaFilisitiya vazivile vyuma evi. Co Saulu watumine miluwa kusana vaHevelu ku nzita akwimba lupembo mu lifuti mwoshe.

⁴ Co vaIsalele voshe vavalekele ngwavo Saulu natsii muka-kushika nzita ya Filisitiya, ngeci vaFilisitiya vazindile Isalele. Co vanu vaile nakuliwana na Saulu ku Ngilingale.

⁵ Co vaFilisitiya valikungulwile kulinga nzita na vaIsalele, vakele na matemba 30,000, co vanu 6,000 vaka-kwendela a tuvalu, cooni vungi vwa mashwalale vwapwile ngwe lishen̄avu lya ku ngenge ya mema a kalunga. Vaile ku Mikemashe, mu ngangela ya Mbetevane, co vatungile cilombo cavo kuje.

⁶ VaFilisitiya valwisile vaIsalele manene, vavaakele mu vukalu vwakama. Co vamo va vaIsalele vavandele mu manzenzengoma a mamanya, na mu viteke, na mukati ka vimbulu vya mamanya, na mu masima.

⁷ Vamo vajavukile Ndonga ya Yondau vaile musambwa ku mafuti a Ngande, na Ngilyande. Oloni Saulu wakele ku Ngilingale, co vanu vaje vakele amo nendi vazivile lyova.

⁸ Saulu wavandamenene Samwele matangwa atanu na avali, ngwe mwamushikile Samwele kulingamo, oloni Samwele kezile vwasi ku Ngilingale. Co vanu vashangumukile kuseza Saulu,

⁹ co ikeye wendekele kuli vakevo ngwendi, “Njineneleni vin̄ombelo vya kwenyeka, na vin̄ombelo vya kulitombola.” Co wakombelelele n̄ombelo ya kwenyeka,

¹⁰ co acimanese ngacije, Samwele wetele. Co Saulu waile mukuliwana nendi nakumutambula,

¹¹ oloni Samwele wendekele kuli ikeye ngwendi, “Vika unalingi?” Co Saulu wamukumbulwile ngwendi, “Vanu vakele nakunjiseza, co yove lalo kuwezile vwasi ngwe muwendekele, co kuwezelelako lalo, vaFilisitiya valinakulikungulwila ku Mikemashe.

¹² Ngecivene, njayongwele ngwange, ‘VaFilisitiya vaija nakunjilwisa kuno ku Ngilingale, co kunjalombele ngozi ya Shukulu Kalunga.’ Ngecivene, njakombelelele n̄ombelo ya kwenyeka.”

¹³ Co Samwele wamukumbulwile ngwendi, “Eci cinapu cuma cavulema ciwunalingi. Kuwononokele lishiko lije lyakwanene Shukulu Kalunga Njambi yove. Nga unononokele, nga nakwasesa yove na vatekulwila vove kushwana Isalele myaka yoshe.

¹⁴ Oloni ololo kushwana kwove kukahwa. Omwo kuwamwononokele, Shukulu Kalunga akaliwanena munu wakumuya ku mbunge, co akamupwisa muka-kushwana vanu vendi.”

¹⁵ Ngecivene, Samwele watundile ku Ngilingale waile. Vanu voshe vaje vasaleleo vakavele Saulu omo waile nakuliwana na mashwalale vendi. Co vatundile ku Ngilingale vaile ku Ngimbeya mu lifuti lya Mbenjemani. Co Saulu walavele mashwalale vendi, vapwile vanalume 600.

¹⁶ Saulu, na munendi Yonatana, na vanu vavo, vakele mu Ngemba, mu lifuti lya Mbenjemani, co vaFilisitiya vatungilile cilombo cavo ku Mikemashe.

¹⁷ Mashwalale va vaFilisitiya vatundile mu cilombo cavo mu vimbunga vitatu, mbunga imo yakengeselele ku ngila ya ku Ofela mu lifuti lya Shuwale,

¹⁸ co ikwavo yakengeselele ku ngila ya ku Mbete Holone, co ikwavo lalo yaile ku nginga yakukengesa ku Cana ca Zemboime na ku mambo.

¹⁹ Mu Isalele kumwakele vaka-kufula omwo vaFilisitiya vavindikile vaHevelu kufula mikwale, na makunga.

²⁰ (VaIsalele vakele nakuya kuli vaFilisitiya nakwambatako matemo akulimisa na vingombe, na matemo, na vinjaviti, na vimoko vyakuvambuka,

²¹ fweto yakushemuna vinjaviti nakuvwaesa myumba yapwile yaindondo manene, co lalo vakele na fweto yakuvwaesa litemo lyakulimisa na vingombe, nambe matemo.)

²² Ngecivene, a litangwa lya nzita, naumo lishwalale wai wakele na mikwale, na makunga kuvanga lika Saulu na munendi Yonatana.

²³ Co vaFilisitiya vatumine mbunga ya mashwalale kukemana ku ngila ya ku Mikemashe.