1 Samwele 12 - Livulu lya Shukulu Kalunga

Samwele ashika vanu

¹ Asinoni Samwele wendekele kuli vanu va Isalele ngwendi, “Njinalingi vije mwanjilombele, njinamyana mwene wakumishwana,

² co ololo mutambuleni amitwamenene. Ngeci mwange ni, njakuluvala, co vana vange vali amo neni. Njinamitwamenena kutunda ku vukwenje vwange kweta na ku simbu ino.

³ Yange uno. Nga kuli cuma cimo njamiviisilile, citumbuleni ololo ku mesho a Shukulu Kalunga na ku mesho a mwene ou yanaangula. Kwali munu umo injanyekele ngombe yendi wa lwavo nambe cimulu? Indi kwali munu umo injakwisile nambe injayandesele? Indi kwali munu umo injatavele kutambula vimbongo vya lizika-kanwa? Nga njalingileo cuma cimo, co njiilwise vije njatambwile.”

⁴ Co vanu vakumbulwile ngwavo, “Embwe, kuwatukwisile nambe kutuyandesa, nambe kwambata cuma kuli munu umo embwe.”

⁵ Samwele wavakumbulwile ngwendi, “Shukulu Kalunga na mwene ou yanaangula vanapu vakaleo ku litangwa lya lelo omwo munawana ngeci yange nji muka-kulongwa.” Co vakevo vakumbulwile ngwavo, “Eyo, Shukulu Kalunga napu mukaleo wetu.”

⁶ Co Samwele wendekele lalo ngwendi, “Shukulu Kalunga ikeye waangwile Mosesa, na Alone vaje vatundisile vakukulwila veni ku Ingito.

⁷ Ngecivene, ololo imaneni oho amuli, ngeci tulisompese ku mesho a Shukulu Kalunga akumyanukisa a vilinga vya nzili vije vyalingile mukwamena yeni na vakukulwila veni.

⁸ Omo Yakomba na naanga yendi vaile ku Ingito, co vaka-Ingito omo vavayandesele, vakukulwila veni valililile kuli Shukulu Kalunga ngeci avakwase, co ikeye wavatuminine Mosesa, na Alone, vakevo vavatundisile mu Ingito nakuvanena mu lifuti lino nakutungamo.

⁹ Oloni vanu vevalele Shukulu Kalunga Njambi yavo, co ikeye wavakundikile mu mavoko a vaFilisitiya, na kuli mwene wa Mowavi, na Sisela muka-kushika nzita ya mashwalale va mu nganda ya Hazole, valwile nzita na vakukulwila veni, co vavafungulwile.

¹⁰ Asinoni valililile kuli Shukulu Kalunga ngeci avakwase, co vendekele ngwavo, ‘Tunalingi vuvi, omwo tunakengesa nima Shukulu Kalunga, tunalemesa tumponya twa Mbale, na Asitalete. Twamene ku vitozi vetu, co tukakulemesa!’

¹¹ Co Shukulu Kalunga watumine Ngilyone, na Mbalake, na Njefeta, akukotoka watumine yange vene. Co yetu voshe twamyamenene ku vitozi veni, co mwakele mwamuvwa.

¹² Oloni omo mwamwene Mwene Nahashe wa vaAmoni ali muyehi nakumilwisa, co mwavyanene Shukulu Kalunga kupwa mwene yeni, mwendekele kuli yange ngweni, ‘Tushaka mwene atushwane.’

¹³ “Ololo kengeni mwene imunaangula ou, mwamulombele, ngeci ololo Shukulu Kalunga namyanaye.

¹⁴ Nga mukasingimika Shukulu Kalunga, nakumupangela, nakutolilila ku majwi endi, nakwononoka mashiko endi, co nga yeni, na mwene yeni uje amishwana mukakava Shukulu Kalunga Njambi yeni, co mwamuvwa.

¹⁵ Oloni nga kumutolilila ku majwi a Shukulu Kalunga, co kumwononoka mashiko endi, akamilwisa yeni na mwene yeni.

¹⁶ Ngecivene, imaneni oho muli, co mukamone cuma cakama cije cakalinga Shukulu Kalunga.

¹⁷ Simbu ino inapu ya malanga. Oloni njikalombela kuli Shukulu Kalunga, ngeci atume muhyato na nyonzi. Nga eci cilingiwa, co mukazivuka nakumona ngeci vuvi vweni vunaama manene ku mesho a Shukulu Kalunga, omo yeni mwamulombele mwene.”

¹⁸ Ngecivene, Samwele walombelele, co a litangwa lije vene Shukulu Kalunga watumine muhyato na nyonzi. Co vanu voshe vazivile lyova lya Shukulu Kalunga na Samwele,

¹⁹ co vendekele kuli Samwele ngwavo, “Shukulu, mwane, tulombeleleko kuli Shukulu Kalunga Njambi yove, ngeci kesi tutse. Omwo ku vuvi vwetu tunakumbasanako lalo vuvi vwakulomba mwene.”

²⁰ Samwele wakumbulwile ngwendi, “Kesi muzive lyova embwe. Nameme munalingi vuvi vwa cifwa cangacije, kesi mutenguluke mutunde kuli Shukulu Kalunga, oloni mupangeleni na mbunge yeni yoshe.

²¹ Kesi mukavangeye vinjambi va makuli, vaje kuvasa kumikwasa nambe kumyamena, omwo kesi va vushunga embwe.

²² Shukulu Kalunga nalisingi cikumiiyo ca cikulaeso, co kakamiseze embwe, omwo nayongola kumipwisa vanu vendi.

²³ Ngwe ali yange ni, cikale kulyala nange kesi njivulumune kuli Shukulu Kalunga, njilikele kumilombelela. Oloni, njikamilongesa vije vyavivwa vyakushungama.

²⁴ Ononokeni Shukulu Kalunga nakumupangela na kulongwa na mbunge yeni yoshe. Anukeni vyuma vyakama vyanamilingila.

²⁵ Oloni nga yeni mutwalao kulinga vuvi, co yeni na mwene yeni mukanyonga.”