1 Samwele 10 - Livulu lya Shukulu Kalunga

¹ Ngecivene, Samwele wanonele lilulu lya mazi a olive waetilile a mutwe wa Saulu, wamutsembele, co wendekele ngwendi, “Shukulu Kalunga nakuvwavesa mazi kupwa muka-kushwana vanu vendi va Isalele. Ukashwana vanu vendi nakuvanyunga ku vitozi vavo voshe. Co ovu vukevwo vukaleo vwove ngeci Shukulu Kalunga nakwangula kupwa muka-kushwana vanu vendi.

² Omo tulyangunuka lelo, ukaliwana na vanalume vavali kuyehi na mbumbo ya Lakele ku Zeleza mu lifuti lya Mbenjemani. Vakakuleka ngwavo vaje vimulu unashakezekele vanavawana, co isho kesi nakulinyenga a vimulu embwe, oloni alinakulinyenga ali yove, simbu yoshe alinakwihula ngwendi, ‘Njilinga vati ali munange?’

³ Co kutunda aje, ukaya kulutwe noo uketa ku muti wakujela ku Tambole, co ukaliwana na vanalume vatatu valinakuya ku Mbetele nakukombelela n̄ombelo kuli Njambi. Umo natwameka vimembe vatatu vamivamba, mukwavo nambata mikasha itatu ya makende, mukwavo wamucitatu nambata njeke ya cilambu yakushula ya vinyu.

⁴ Vakakukandelela, co vakakwana mikasha ya makende ivali, ukaitambula.

⁵ Asinoni ukaya ku Lilundu lya Njambi ku Ngimbeya, kukekwo kuli cilombo ca vaFilisitiya. Co omo uketa ku vukovelelo vwa nganda, ukaliwana na mbunga ya vaka-kwimanena vashelumuka kutunda ku mutula a lilundu, valinakwimba na tulyalya, na vingoma, na vimbendo, na visanzi. Vakambulula vuka-kwimanena.

⁶ Co Munzinzime wa Shukulu Kalunga ukaija na nzili ali yove, ukambulula vuka-kwimanena amo navo, co ukafwa ngwe munu weka.

⁷ Omo evi vikalingiwa, co yove linga vyoshe vije vyakutwamenena Njambi.

⁸ Ukatwama kulutwe ku Ngilingale, co njikaliwana nove nakukombelela vin̄ombelo vya kwenyeka, na vin̄ombelo vya kulitombola. Co ukanjivandamena kuje matangwa atanu na avali noo njikaija nakukuleka vika viwukalinga.”

⁹ Omo Saulu watengulukile ngeci aseze Samwele, Njambi waanene Saulu viyongola vyaviha. Co vyuma vyoshe vije vyamulekele Samwele vyalingiwile a litangwa lije vene.

¹⁰ Omo Saulu na ngamba yendi vetele ku Ngimbeya, waliwanene na mbunga ya vaka-kwimanena. Co vwasi-vwasi Munzinzime wa Njambi wezile na nzili ali ikeye, co nendi wambulwile vuka-kwimanena akati kavo.

¹¹ Vanu vaje vamuzivukile akulivanga, omo vamumwene alinga ngacije, valihwile umo na mukwavo ngwavo, “Vika vinawana muna Kishe? Kuma na Saulu napu muka-kwimanena ndi?”

¹² Co munalume wakele muje mu nganda wehwile ngwendi, “Vati ali ava vaka-kwimanena vakwavo? Vaishavo vapwa veya?” Omu mukemwo vendekele ngwavo, “Kuma na Saulu napu muka-kwimanena ndi?”

¹³ Omo Saulu wamanesele kwambulula vuka-kwimanena, waile ku mutula a lilundu.

¹⁴ Co shongo ya ishe wamwene Saulu na uje ngamba, wavehwile ngwendi, “Munakele kulijo?” Co Saulu wamukumbulwile ngwendi, “Tunakele nakushakezeka vimulu. Co omo kutwavawanene, twaile kuli Samwele.”

¹⁵ Shongo ya ishe wavehwile lalo ngwendi, “Vika namilekele?”

¹⁶ Co Saulu wakumbulwile shongo ya ishe ngwendi, “Watulekele ngwendi vimuna vanavawana.” Oloni Saulu kalekele shongo ya ishe vije vyamulekele Samwele vyakupwa mwene.

Saulu vamutava kupwa mwene

¹⁷ Samwele wasanene vanu valikungulwile amolika kuli Shukulu Kalunga ku Mizipa,

¹⁸ co wendekele kuli vakevo ngwendi, “Shukulu Kalunga, Njambi ya Isalele, nendeka ngwendi, ‘Yange njamitundisile ku Ingito, njamipatwile kuli vaka-Ingito na kuli vanu voshe vaje vakele nakumiyandesa.

¹⁹ Yange Njambi yeni, uje wamipatwile ku tuyando tweni twoshe nakukukaluwa kweni kwoshe, oloni ku litangwa lya lelo munanjivyana, co munanjilombo ngeci njimyane mwene. Mwamuvwa, ngecivene, likungululeni ku mesho a Shukulu Kalunga mu miyati yeni na mu vikota vyeni.’ ”

²⁰ Asinoni Samwele wasanene muyati na muyati kulutwe, co Shukulu Kalunga waangwileo muyati wa Mbenjemani.

²¹ Co Samwele wasanene naanga ya muyati wa Mbenjemani vaye kulutwe, co waangwileo lalo muyati wa Mateli. Co vanu va naanga ya Mateli vezile kulutwe, co vaangwileo Saulu muna Kishe, oloni omo vamushakezekele, kuvamuwanene,

²² co vehwile kuli Shukulu Kalunga ngwavo, “Kuma kukwesi weka ndi?” Co Shukulu Kalunga wavakumbulwile ngwendi, “Kwali kuje navanda mu vivala.”

²³ Ngecivene, vashatukilileko, co vanenele Saulu kuli vanu, co omo wemanene akati ka vanu, vamwene ngeci ikeye wamulaja manene kutuvakana vanu voshe.

²⁴ Co Samwele wendekele kuli vanu ngwendi, “Ou ikeye munu yanamyangwila Shukulu Kalunga! Co kukwesi wakufwa ngwe ikeye akati keni.” Co vanu voshe vatambekele ngwavo, “Mwene ayoye myaka yoshe!”

²⁵ Samwele wanungulwilile kuli vanu moko na vipangi vya mwene, co wavisonekele mu livulu, walitulikile mu mwela wakujela. Asinoni munu na munu welukile kwimbo lyendi.

²⁶ Co Saulu nendi welukile ku Ngimbeya. Co mashwalale vamo, vaje Njambi wasindiiye vimbunge vyavo, vaile amo nendi.

²⁷ Oloni vikolokomba vamo vendekele ngwavo, “Munu ou akatwamena vatijo?” Co vamuyeluwisile kuvamuneneleleko vwana. Oloni Saulu wolokele kuluu.