1 Petulu 5 - Livulu lya Shukulu Kalunga

Vutanga vwa Njambi

¹ Yange, akupwako nange lalo nji mukulunu, njilambelela vakulunu va cikungulukilo akati keni. Njinapu nji mukaleo wa tuyando twa Kilistu, co nange njikatambula mutambela wa vumpau vuje vukasholoka. Njimilambelela ngwange,

² pweni tunyungi va vutanga vuje vwanamyana Njambi, co vunyungeni na cizango cacivwa, ngwe mwanashaka Njambi ngeci mulingemo, kesi ngwe nakumisindiya. Lingeni vipangi vyeni, kesi ngwe omwo fweto embwe, oloni na cizango cacivwa cakupanga.

³ Kesi mweseke kushwana vaje vavanamyana ngeci muvanyunge, oloni pweni cimweso ku vutanga.

⁴ Co omo Kanyungi Wakama akasholoka, mukatambula cilongo ca vumpau cije kucikatsitsivala.

⁵ Mu cifwa cimo vene, yeni vakwenje munapande kwononoka kuli vakulunu. Co yeni voshe pweni vaka-kulikeesa, mukupangela umo na mukwavo, omwo visoneka vyendeka ngwavyo, “Njambi akavyana vaka-kulyalesa, oloni akamwesa kutetela kuli vaka-kulikeesa.”

⁶ Likeeseni yeni vavenya mwisi ya livoko lya nzili lya Njambi, ngeci amijundule a simbu yendi yaivwa.

⁷ Akeni vukalu vweni vwoshe ali ikeye, omwo ikeye alinakumilela.

⁸ Kesi mupende, pweni vaka-kukengelela! Citozi ceni Liyavola alinakwendangana nakwaana ngwe ndumba, ashakezeka umo ngeci amusanyozole.

⁹ Imaneni mbe mukukulaela kweni, co muvyaneni, omwo mwazivuka ngweni vaka-kukulaela veka mu kaye mwoshe valinakuyanda tuyando twa muyati ou vene.

¹⁰ Oloni omo munayanda kasimbu kakandondo lika, Njambi wa kutetela kwoshe, uje namisana mukulipangela vumpau vwendi vwa myaka yoshe muli Kilistu, ikeye vavenya akamijelesa nakumyana kwimana mbe na nzili na luvula lwaluvwa.

¹¹ Kuli ikeye kukale nzili ku myaka yoshe! Ewa.

Viindu vyakumanesela

¹² Njinamisonekela mukanda ou waundondo akukwasa kwa Silase, uje unjinakulaela ngwe ndolome mu vuka-Yesu. Njishaka kumitakamesa nakumyana vukaleo ngeci oku kukekwo kutetela kwa vushunga vwa Njambi. Imaneni mbe mu cikeco.

¹³ Cikungulukilo ca mu Mbambilone, navo vavaangwile kuli Njambi lalo, vanatumu viindu kuli yeni, na munange Mako lalo natumu viindu.

¹⁴ Liindwiseni umo na mu kwavo nakulitsemba ca cizemo ca vuka-Yesu. Kwoloka kukale neni muvavoshe mwakundama kuli Kilistu.