1 Petulu 4 - Livulu lya Shukulu Kalunga

Kuyoya kweni kutenguluke

¹ Ngecivene, ngwe omo Kilistu wayandele mu muvila, neni lalo munapande kulitakamesa yeni vavenya na viyongola vimo, omwo woshe uje ayanda ku muvila nalikela ku vuvi.

² Ngecivene, kutunda ano kutwala kulutwe, munapande kuyoya yoyesi yeni ya ano asi ku nzili ya vutumbe vwa cizango ca Njambi, kesi ku mashungu a vunu embwe.

³ Mwombilile simbu yakama kunima mukulinga vivakazeme kulinga vaje vaka-kujeneka kukulaela. Mwombilile kuyoya kweni mu vuvi na mu mashungu amavi na mukupenda na mukukina na mu vimunga vyakunwa na mu vunyengwe vwakulemesa tumponya.

⁴ Co ololo vaka-kujeneka kukulaela vanalikomokela omo kumwesi nakulipandakana navo mukuyoya kwa muuka na vunyengwe, co valinakumishaula.

⁵ Oloni vakalyambulwila vakevo vavenya kuli Njambi, uje akasompa vaka-kuyoya na vatsi.

⁶ Eci cikeco cuma vambulwilile Vin̄anda Vyavivwa kuli vatsi, kuli vaje vavasompele mukuyoya kwavo kwa muvila ngwe muje muvakasompo vanu voshe, vavambulwililevyo ngeci mukuyoya kwavo kwa minzinzime vayoye ngwe muje mwashaka Njambi.

Vaka-kupangesa vavavwa va mavwana a Njambi

⁷ Kukotoka kwa vyuma vyoshe kuli muyehi. Munapande kulinyunga nakukengelela, ngeci mwase kulombela.

⁸ Akamwa ya vyoshe evi, lizemeni umo na mukwavo na nzili, omwo cizemo cikafwiki vivi vyavingi.

⁹ Lijumbuleni umo na mukwavo kujeneka kungunguta.

¹⁰ Umo na umo, ngwe muka-kupangesa mwamuvwa vwana vwa Njambi vwakuliseza-seza, napande kupangesa vwana vwendi vwanatambula kuli Njambi mukukwasa vakwavo veka.

¹¹ Voshe vaje vambulula vanapande kwambulula lijwi lya Njambi, voshe vaje vapanga vanapande kupanga na nzili ije yanavana Njambi, ngeci mu vyuma vyoshe Njambi vamushangazale ali Yesu Kilistu, kuli ikeye kwakundama vumpau na nzili ku myaka yoshe. Ewa.

Kuyanda ngwe muka-Yesu

¹² Vasamba vange vanjazema, kesi mukomoke a ceseko ngwe ca tuhya cije mulinakuyanda naco, ngwe cikeco cinapu cuma cimo caciha cilinakulingiwa kuli yeni.

¹³ Oloni joleleni omwo mulinakulipangela tuyando twa Kilistu, ngeci mushule nakujolela omo vumpau vwendi vukasholoka.

¹⁴ Vwaeleleni omo vamishaula omwo munapu vaka-kukava Kilistu, eci cinalumbunuka ngeci Munzinzime wa vumpau, na Munzinzime wa Njambi, alinakuyoya amo neni.

¹⁵ Nga umo ayanda, kesi ayande omwo ikeye napu muka-kutsiya nambe omwo ikeye napu mwizi nambe omwo ikeye napu lipwepwe nambe omwo ikeye muka-kulyaka ku vin̄anda vya vakwavo.

¹⁶ Oloni nga uyanda omwo u muka-Yesu, kesi uzive shwamwa, oloni kandelela kuli Njambi ngeci unambata lizina lya Kilistu.

¹⁷ Simbu inete ngeci kusompa kushangumuke, co vanu va Njambi vakevo vakalivanga kuvasompa. Nga kushangumukila kuli yetu, vatijo cikafwa akukotoka kuli vaje kuvakulaela ku Vin̄anda Vyavivwa vyakutunda kuli Njambi?

¹⁸ Ngwe muvyendeka visoneka ngwavyo, “Nga cinapu cacikalu kuli vaka-vushunga kwovoka, co cikapwa vatijo kuli vaka-kushaula na vaka-vuvi?”

¹⁹ Ngecivene, vaje valinakuyanda ngwe ku cizango ca Njambi, a vilinga vyavo vyavivwa vanapande kulyana kuli Ishamatanga wavo, uje simbu yoshe akanyungu cikulaeso cendi.