1 Petulu 3 - Livulu lya Shukulu Kalunga

Vanakazi na vanalume

¹ Mu cifwa cimo vene, yeni vanakazi munapande kwononoka kuli vanalume veni, ngeci nga umo wavo kakulaela lijwi lya Njambi, vilinga vyeni vikavakokela kukukulaela,

² omwo vakamona kasingimiko keni na futisi yeni.

³ Kumwapandele kupangesa vyuma vya anja lika mukulivwaesa, nambe makwalale, nambe na tunzeya, nambe vuzalo vwa senga.

⁴ Oloni vuvwa vweni vunapande kupwa vwa vushunga vwa mukati, vuvwa vuje kuvwesi kuvola vwa lyovwa-ovwa na kwoloka kwa munzinzime, eci cikeco ca seo yakama manene ku mesho a Njambi.

⁵ Omwo vanakazi va ku laja vaje vaakele cinyangavili cavo muli Njambi valyongozwelele vakevo vavenya akwononoka kuli vanalume vavo.

⁶ Sala walingile eci, wononokele kuli Avilahama nakumutumbula shukulu yendi. Co yeni ololo munapu mu vana vendi va vanakazi nga mulinga mwamuvwa kujeneka kuzivila lyova cuma cimo.

⁷ Mu cifwa cimo vene, yeni vanalume lalo mukukala amo na vanakazi veni munapande kuzivisisa mwamuvwa ngweni vakevo vapwa vakuvotsiya ku cisemwa cavo. Pangeni navo na kasingimiko, omwo na vakevo lalo vakatambula amo neni vwana vwa Njambi vwa mwonyo. Lingeni ngeci kutewa cuma cimo cikatanganesa malombelo eni.

Kuyandela vushunga

⁸ Akukotoka, yeni voshe munapande kukala na kulitombola kumo na viyongola vimo, lizemeni umo na mukwavo, co kaleni na ngozi na kulikeesa ku umo na mukwavo.

⁹ Kesi mwilwisile vuvi ku vuvi nambe cisingo ku cisingo, oloni ilwisileni civezikiso, omwo civezikiso cikeco cakulaesele Njambi kumyanaco omo wamisanene.

¹⁰ Ngwe muvyendeka visoneka ngwavyo, “Nga munu ashaka mwonyo nakushaka kumona vyavivwa, kapandele kwendeka vyavivi co alikele kwendeka makuli.

¹¹ Napande kutunda ku vuvi nakulinga vyuma vyavivwa, napande kushakezeka kwoloka na mbunge yendi yoshe.

¹² Omwo Mwene akakenge ali vaka-vushunga, co akazivi malombelo avo, oloni akayeluwisa vaje vaka-kulinga vuvi.”

¹³ Iyajo akamivulumuna nga muli na cizango cakulinga vyavivwa?

¹⁴ Oloni nambe nga muyanda mukulinga vije vya vushunga, co vwaeleleni! Kesi muzivile lyova munu umo, co kesi mulishoshomwene.

¹⁵ Oloni komokeni Kilistu mu vimbunge vyeni, co musingimikeni ngwe Mwene. Visimbu vyoshe livwaeseleni kukumbulula munu woshe-iwoshe uje amihula mumunungulwile cinyangavili ceni cije mulinaco,

¹⁶ oloni cilingeni na lyovwa-ovwa na kasingimiko. Citaku-taku ceni cipwe cakutungukwa, ngeci omo vamishaula, co vaje vendeka vyavivi a futisi yeni yaivwa akupwa vaka-kukava Kilistu vazive shwamwa ali vije vendeka.

¹⁷ Omwo cinapu cacivwa kuyandela vushunga, nga eci cinapu cizango ca Njambi, kutuvakana kuyandela vuvi.

¹⁸ Omwo Kilistu watsililile vuvi lumo ku simbu yoshe, muka-vushunga kutsila vaka-vuvi, ngeci amitwamenene kuli Njambi. Ikeye vamutsiile ku muvila, oloni vamuyoyesele ku munzinzime,

¹⁹ co mu cifwa cendi ca munzinzime waile nakwambulula kuli minzinzime yakele mu kamenga.

²⁰ Eyi ikeyo minzinzime ya vaje vavyanene kwononoka Njambi omo wavandamenene na lukakateya a matangwa aje Nowa washongele vwato. Vanu vavandondo vaje vakele mu vwato, vapwile vatanu na vatatu, vakevo vovokele ku mema,

²¹ aje apwile cimweso cakwinika kumbwitika, cije ololo cinamyovola. Kesi kukusha mazilo a muvila embwe, oloni cikulaeso cakulomba kuli Njambi cakutunda ku citaku-taku cacivwa. Cinamyovola akusanguka kwa Yesu Kilistu,

²² uje nai mwilu, co ali ku livoko lya cilyo lya Njambi, alinakushwana akamwa ya tungelo voshe na vaka-moko na vaka-nzili mwilu.