1 Petulu 1 - Livulu lya Shukulu Kalunga

¹ Mukanda wakutunda kuli yange Petulu, muluwa wa Yesu Kilistu. Kuli vanu va Njambi vakwangula vaje valinakuyoya ngwe vangenzi mu mafuti oshe a Pontase na Ngalatiya na Kapandosiya na Asiya na ku Mbitaniya.

² Yeni vamyangwile ku cizango ca Njambi Tatetu, co vamijelesele na Munzinzime wendi ngeci mwononoke kuli Yesu Kilistu nakumijelesa na maninga endi. Kutetela na kwoloka vikale amo neni.

Cinyangavili cakuyoya

³ Tukandeleleni kuli Njambi na Ishe ya Mwene yetu Yesu Kilistu! Omwo a mema ku mbunge endi akama manene, natwana mwonyo wauha akusangula Yesu Kilistu ku vatsi. Eci cikeco citushulisa na cinyangavili cakuyoya,

⁴ co yetu tulinakukengelela kulutwe tukafuke vufuko vwa vivezikiso vije Njambi natulikila vanu vendi. Namitulikilavyo mwilu, kuje kuvyasa kusosonyoka nambe kuviya nambe kupiluka.

⁵ Vinapu vyeni, akukulaela vanaminyungilavyo mwamuvwa na nzili ya Njambi yakwovoka ije inalivwaesela kusholoka a simbu yakukotoka.

⁶ Pweni vaka-kuvwaelela a cuma eci, nambe cinapu mwamuvwa yeni kukala na vusiwa kasimbu kakandondo lika omwo muli na vyeseko vyavingi vije mulinakuyanda navyo.

⁷ Vutumbe vwa vyeseko evi vunapu kumwesa vukaleo ngeci kukulaela kweni kunapu kwa vushunga. Nambe ngolinde yasa kunyonga, vakayeseka na tuhya, kukulaela kweni lalo kuje kuli na seo yakama manene kutuvakana ngolinde, vanapande kuceseka ngeci kukakateye. Asinoni mukatambula cishangala na vumpau na kasingimiko a Litangwa lije omo Yesu Kilistu akasholoka.

⁸ Yeni mwamuzema, nambe kumwamumwene, mwamukulaela, nambe a simbu ino kumwamumwene. Ngecivene, mulinakujolela na mbwase yakama ya vumpau ije kutwasa kuyitumbula,

⁹ omwo mulinakutambula kwovoka kwa myonyo yeni, kukekwo kwapwa vutumbe vwakukulaela kweni.

¹⁰ Vyakwovoka oku vaka-kwimanena vacitonenenene nakucishakezeka, co vambulwile vuka-kwimanena vwa vivezikiso vije vikasholoka kulutwe vije vyakamyana Njambi.

¹¹ Vesekele manene kuzivuka simbu mukajo vikalingiwa na vatijo vikaija. Eyi ikeyo simbu ije yemikile Munzinzime wa Kilistu uje wakele muli vakevo, mukwambulula vya n̄avava ije Kilistu akayanda na vumpau vuje vukakavako.

¹² Njambi washolwele kuli ava vaka-kwimanena kuvalipangelele vakevo vavenya embwe, oloni vapangelele yeni, omwo vendekele a vyuma vije yeni munalizivila kuli vangamba vaje vambulwile Vin̄anda Vyavivwa a nzili ya Munzinzime Wakujela uje uvatumine kutunda mwilu. Evi vikevyo vyuma vije nameme tungelo vashaka kuzivisisa.

Vanamisana ngeci muyoye vuyoye vwakujela

¹³ Ngecivene, livwaeseleni cimweja mu viyongola vyeni. Kengeleleni, co akeni cinyangavili ceni a vivezikiso vije vivakamyana omo Yesu Kilistu akasholoka.

¹⁴ Pweni vaka-kwononoka kuli Njambi, co kesi mutave kuyoya kweni vacendese ku vizango vije mwakele navyo omwo mwakele ku nzimba.

¹⁵ Oloni, pweni vakujela mu vyoshe mulinga, ngwe Njambi uje wamisanene wapwa wakujela.

¹⁶ Visoneka vyendeka ngwavyo, “Pweni vakujela omwo yange njapwa wakujela.”

¹⁷ Mulinakumusana ngweni Tate, omo mulombela kuli Njambi, uje muka-kusompa vanu voshe na seteko imolika, kupwisa ngwe ku vije vyanalingi munu na munu, ngecivene, munapande kumukomoka mukuyoya kweni kwoshe kwa ano asi.

¹⁸ Omwo mwazivuka ndando ije ivamipatwile nayo mukumitundisa ku mwonyo wangoco uje mwatambwile kuli vakukulwila veni. Kucapwile cuma cije casa kunyonga ngwe siliva nambe ngolinde,

¹⁹ oloni vamipatwile na n̄ombelo ya ndando yakama ya Kilistu, uje wapwile ngwe muna manga wakujeneka livala nambe kapenga.

²⁰ Njambi wamwangwile simbu kanda vatange kaye, co vamusholwele mu matangwa ano akukotoka omwo yeni.

²¹ Ali ikeye munakulaela kuli Njambi, uje wamusangwile ku vatsi nakumwana vumpau, ngeci kukulaela kweni na cinyangavili ceni munavyaka ali Njambi.

²² Ololo munalijelesa akwononoka ku vushunga, co muli na cizemo cacivwa kuli vasamba veni vaka-kukulaela, lizemeni umo na mukwavo na vimbunge vyeni vyoshe.

²³ Omwo a lijwi lya Njambi lyakuyoya lije lya myaka yoshe munasemuka luvali ngwe vana va cisemi uje muka-kuyoya simbu yoshe, kesi uje asa kutsa.

²⁴ Ngwe muvyendeka visoneka ngwavyo, “Vanu voshe vanapu ngwe mwila, co vumpau vwavo vwoshe vunapu ngwe vishani. Mwila ujujwama na vishani vitotomoka,

²⁵ Oloni lijwi lya Mwene lyakala myaka yoshe.” Lijwi eli likelyo Vin̄anda Vyavivwa vije vivambulwile kuli yeni.