1 Mizimbu 5 - Livulu lya Shukulu Kalunga

Vatekulwila va Luvena

¹ Ava vakevo vatekulwila va Luvena, ntwatwa ya Yakomba. (Omwo walalele na lishano lya ishe lya mbanja, co wazimbalesele moko yendi ya vu ntwatwa, co moko ya vu ntwatwa vwendi vayanene kuli Yosefa.

² Wapwile muyati wa Yunda wa nzili kuje kwatundile muka-kushwana miyati yoshe.)

³ Luvena ntwatwa ya Yakomba, wakele na vana vawana mazina avo, Hanoki, na Palu, na Hezelone, na Kalemi.

⁴ Ava vakevo vatekulwila va Njwele kutunda ku cisemwa cimo nakweta ku cisemwa cikwavo vapwile, Shemaya, co Shemaya wakitile Ngonge, co Ngonge wakitile Shimei,

⁵ Shimei wakitile Mika, co Mika wakitile Leaya, co Leaya wakitile Mbale,

⁶ co Mbale wakitile Mbela ikeye ivatwalele ku vunzinda kuli Tingelate Pilesele mwene wa ku Silya. Mbela wapwile ntwama wa muyati wa Luvena.

⁷ Co vavushoko vwavo muvavasonekelele mu naanga yavo vapwile, Njeyele ikeye wapwile mukulunu wavo, na Zekaliya,

⁸ na Mbela, muna Azaze, na mutekulyendi Shema wa ku cikota ca Njwele, vanu vaka-cikota eci vakele mu Aloele na mu mutambela wakutunda ku kunto ku Nembo, na Mbale Meone.

⁹ Vakele na matanga amangi mu lifuti lya Ngilyande, ngecivene, vatungile mu lifuti lije nakweta mu ngangela mu mambo kweta ku Ndonga ya Yufuleti.

¹⁰ Co a simbu ya Mwene Saulu, muyati wa Luvena walwisile vaHangeli, nakuvatsiila mu nzita, co vatungile mu lifuti lyavo, mu mutambela wa mu ngangela ku Ngilyande.

Vatekulwila va Ngande

¹¹ Muyati wa Ngande vakele ku kunto ya Luvena mu lifuti lya Mbashane nakweta mu ngangela ku Saleka.

¹² Njwele ikeye wapwile ntwama wa cikota cakulivanga, co Shafane ikeye wapwile ntwama wa cikota camucivali cije capwile cikota ca vulemu manene. Co Njanai, na Shafate vakevo vapwile vakulunu va vikota vikwavo vya mu Mbashane.

¹³ Co vanu vamo va ku muyati ou, vapwile va ku vikota vitanu na vivali vakevo ava, Mikaele, na Meshulame, na Shemba, na Njolai, na Njakane, na Ziya, na Evele.

¹⁴ Vapwile vatekulwila va Avihaile muna Hule, vakukulwila vendi va ku laja vapwile, Avihaile, na Hule, na Njalowa, na Ngilyande, na Mikaele, na Njeshishai, na Njahendo, na Mbuze.

¹⁵ Ahi, muna Avendiyele mutekulu wa Nguni, vakevo vapwile vakulunu va vikota evi.

¹⁶ Co vakevo vakele mu mutambela wa Mbashane na Ngilyande, mu vindandanga vije vyakele kuje na mu mitambela mwoshe muje mwakulila vimuna va mu Shalone.

¹⁷ Vin̄anda evi vavisonekele a matangwa a Mwene Yotame wa mu Yunda na Mwene Yelovowame Wamucivali wa mu Isalele.

Mashwalale va miyati ya mu ngangela

¹⁸ Ku miyati ya Luvena, na Ngande, na litambelo lya Manase wa mu ngangela kwakele mashwalale vakupwa 44,760 vakusimpa, vaje vambatele vintelo, na mikwale, na mata a lusipa.

¹⁹ Co vaile ku nzita nakulwisa miyati ya vaHangeli na miyati ya Njetule, na Nafishe, na Nondave.

²⁰ Vakevo vakulaelele Njambi, nakulombela kuli ikeye ngeci avakwase, co Njambi wakumbulwile malombelo avo, wavahyanesele kuli vaHangeli na vaje vakwasele vaHangeli.

²¹ Co vafungulwile tumelo ku vitozi vakupwa 50,000, na vimanga vakupwa 250,000, na vimulu vakupwa 2,000, co vafungulwile vinzinda vakupwa 100,000.

²² Co vatsiile vitozi vavangi, omwo nzita yapwile ya cizango ca Njambi. Co vatwaleleleo kukala mwamuvwa mu mutambela uje noo ku simbu ya vundungo.

Vanu va Manase wa mu ngangela

²³ Vanu va Manase wa mu ngangela vatungile mu lifuti lya Mbashane, kutunda ku mutambela wa ku kunto kweta ku Mbale Helemone, na ku Senile, na ku Munkinda wa Helemone, co vatumine manene.

²⁴ Ava vakevo vakulunu va vikota vavo, Efele, na Ishi, na Elyele, na Azelyele, na Njelemiya, na Hondaviya, na Njahendiyele. Voshe vapwile mashwalale va moko va lutsimo, co vapwile vakulunu va vikota vavo.

Miyati ya vanu va mu ngangela vavasheka mu lifuti

²⁵ Oloni vanu kuvakulaelele kuli Njambi ya vakukulwila vavo, vamukengesele nima nakulemesa vinjambi va miyati ije yaashekele Njambi mu lifuti.

²⁶ Ngecivene, Njambi wasingile mwene Pule wa Asilya (uje lalo ivatumbwile Tingelate Pilesele) kulwisa lifuti lyavo. Ikeye washekele miyati ya Luvena, na Ngande, na Manase wa mu ngangela, nakuvaka mu Halahe, na mu Hambole, na mu Hala, na ku ngenge ya Ndonga ya Ngozane.