1 Mizimbu 4 - Livulu lya Shukulu Kalunga

Naanga ya Yunda

¹ Ava vakevo vatekulwila va Yunda. Peleze, na Hezelone, na Kalemi, na Hule, na Shombale.

² Shombale wakitile Leaya, Leaya wakitile Njahate, Njahate wakitile Ahumai, na Lahande, vakevo vapwile vakukulwila va vanu vaje vakele mu Zola.

³ Hule ikeye wapwile ntwatwa ya Kalembi kuli munakazi wendi Efaleta, co vatekulwila vendi vakevo vatungile nganda ya Mbetelehema. Hule wakele na vana vatanu mazina avo, Etame, na Penwele, na Ezele. Co Etame lalo wakele na vana va vanalume vatatu mazina avo, Njezelele, na Ishema, na Indevashe, na mwana umo wa munakazi, Hazeleleponi.

⁴ Penwele ikeye watungile nganda ya Ngendole, co Ezele watungile nganda ya Husha.

⁵ Co Ashehule, ikeye watungile limbo lya Tekowa, wakele na vanakazi vendi vavali mazina avo, Hela, na Nala.

⁶ Co nendi na Nala vakitile vana vawana mazina avo, Ahuzame, na Hefele, na Temeni, na Hahashetali.

⁷ Ashehule, na Hela vakele na vana vatatu mazina avo, Zelete, na Izehale, na Etanane.

⁸ Koze ikeye wapwile ishe ya Anumbe, na Zombemba, kukulwila wa cikota ca Ahalehele muna Halume.

⁹ Njaveze vamusingimikile manene mu naanga yendi. Vaina vamulukile lizina lya Njaveze, omwo akumukita kwakele vukalu.

¹⁰ Co Njaveze walombelele kuli Njambi ya Isalele ngwendi, “Njivezikise, Njambi, kunjana lifuti lyakama. Kala nange, co njinyunge ku vuvi vuje vwasa kunjiyandesa.” Co Njambi wamwanene vije vyalombele.

Mikana ya naanga ikwavo

¹¹ Kalembi ndolome ya Shuha, wakele na mwana, lizina lyendi Mehile. Mehile ikeye wapwile ishe ya Eshetone,

¹² Eshetone wakele na vana vatatu mazina avo, Mbetelafa, na Paseya, na Tehina. Tehina ikeye watungile nganda ya Nahashe. Co vatekulwila va vanu ava vakele mu Leka.

¹³ Kenaze wakele na vana vavali mazina avo, Otenyele, na Selaya. Co Otenyele wakele lalo na vana vavali mazina avo, Hatate, na Meonotai.

¹⁴ Meonotai ikeye wapwile ishe ya Ofela. Co Selaya ikeye wapwile ishe ya Yowave, wawanene Cana ca Vaka-vutongwe, kuje vanu voshe valilongeselele vya vutongwe.

¹⁵ Kalembi muna Njefune wakele na vana vatatu mazina avo, Ilu, na Elahe, na Naame. Co Elahe ikeye wapwile ishe ya Kenaze.

¹⁶ Njehalele wakele na vana vawana mazina avo, Zifa, na Zife, na Tiliya, na Asalele.

¹⁷ Ezela wakele na vana vawana mazina avo, Njetele, na Melende, na Efele, na Njalone. Co Melende wambatele Mbitiya, muna mwene wa Ingito, co vakele na mwana wa munakazi lizina lyendi, Milyamu, na vana va vanalume vavali mazina avo, Shamai, na Ishemba. Co Ishemba ikeye watungile limbo lya Eshetemowa.

¹⁸ Co Melende wambatele lalo munakazi wa ku muyati wa Yunda, co vakele na vana vatatu mazina avo, Njelende, ikeye watungile limbo lya Ngendole, na Hevele, ikeye watungile limbo lya Soko, na Njekutiyele, ikeye watungile limbo lya Zanowa.

¹⁹ Co Hondiya wambatele ndokazi ya Nahame. Vatekulwila vavo vakevo vashangumukile cikota ca Ngalema, vaje vakele mu limbo lya Keila, na cikota ca Makate, vaje vakele mu limbo lya Eshetemowa.

²⁰ Co Shimone wakele na vana vawana mazina avo, Aminone, na Lina, na Mbenehanane, na Tilone. Co Ishi wakele na vana vavali mazina avo, Zohete, na Mbenezohete.

Vatekulwila va Shela

²¹ Co Shela wapwile mwana umo ku vana va Yunda. Vatekulwila vendi kupandakanako Ele, ikeye watungile limbo lya Leka. Co Laande, ikeye watungile limbo lya Malesha, cikota ca vaka-kutonga, vaje vakele mu limbo lya Mbete Ashevea.

²² Njokime na vanu vaje vakele mu limbo lya Kozemba, na Yowashe, na Salafe, vaje vambatele vanakazi vaMowavi, vatungile mu Mbetelehema. Eci capwile cisemwa calaja.

²³ Vakevo vapwile vaka-kushongela mwene vindeo, co vakele mu membo a Netaime, na Ngendela.

Vatekulwila va Simyoni

²⁴ Simyoni wakele na vana vatanu mazina avo, Nemwele, na Njamine, na Njalive, na Zela, na Shaulu.

²⁵ Muna Shaulu wapwile Shalume, co Mimbesamu ikeye wapwile mutekulyendi, Mishema ikeye wapwile mutekulyendi wa mukulunu.

²⁶ Co kutunda ali Mishema mukana watundile muli Hamwele, na Zakule, na Shimei.

²⁷ Co Shimei wakele na vana va vanalume likumi na vatanu na umo, va vanakazi vapwile vatanu na umo, oloni vavushoko vwendi vakele na vana vavandondo, co muyati wa Simyoni kuvakele na vanu vavangi ngwe muyati wa Yunda.

²⁸ Co kweta ku simbu ya Mwene Ndaviti vatekulwila va Simyoni vakele mu membo awa, Mbeleshemba, na Molanda, na Hazaleshuwale, na

²⁹ Mbileha, na Ezeme, na Tolande,

³⁰ na Mbetwele, na Holema, na Zikelange,

³¹ na Mbete Malekambote, na Hazalesusime, na Mbetevili, na Shalaime.

³² Co vakele lalo mu mitambela yeka itanu, Etame, na Aine, na Limone, na Tokene, na Ashane,

³³ na membo aje avazengelekele kweta na ku mbwela ya mu kangombe ka yambi na ku Mbalate. Eyi ikeyo mitambela ivakele, co vakele na mavulu a naanga yavo.

³⁴ Vanu ava vakevo vapwile vakulunu va cikota cavo, Meshombambe, na Njameleke, na Njoshahe, muna Amaziya,

³⁵ na Njwele, na Yehu muna Njoshiviya, muna Selaya, muna Asiyele,

³⁶ na Elyoenai, Yaakomba, na Yeshohaya, na Asaya, na Andiyele, na Yesimyele, na Mbenaya,

³⁷ na Ziza (muna Shifi, Shifi muna Alone, mutekulwila wa Yendaya, na Shimeli, na Shemaya).

³⁸ Omwo naanga yavo yatumine manene,

³⁹ co vaile mu kangombe ka yambi ku vukovelelo vwa ku Ngelale, ku mutambela wa cana ca mu ngangela, mukushakezeka mutambela wakulila vimuna vavo.

⁴⁰ Co vawanene lifuti lyalivwa lyakulila vimuna vavo, co lyapwile lyakama lya kwoloka. Co vanu vakele muje akulivanga vapwile vaHami.

⁴¹ A simbu ya Mwene Hezekiya wa mu Yunda, vanu ava vavasonekele mazina vaile ku Ngelale, vasiwile vimbalaka nakunyongesa vanu vaje vakele kuje. Co vashekele vanu vamwo nakutunga muje myaka yoshe, omwo kuje kwakele mutambela wakama wakulila vimuna vavo.

⁴² Co vanu vamo vaka-muyati wa Simyoni, vaile mu ngangela ku Endome, voshe vapwile 500. Vavatwamenenene kuli vana va Ishi mazina avo, Pelatiya, na Nealiya, na Lefaya, na Uziyele.

⁴³ Co kuje vakatsiile vaAmaleke vaje vasaleleo, tunde aje, vatungile nakukala mu mutambela uje.