1 Mizimbu 29 - Livulu lya Shukulu Kalunga

Vwana vwakutungisa Njuvo ya Shukulu Kalunga

¹ Mwene Ndaviti walekele mbunga yoshe ngwendi, “Munange Solomoni ikeye yanaangula Njambi, oloni ikeye acili mwanike, kesi na mana manene. Vipangi evi vilingiwa vinapu vyakama manene, omwo Njuvo eyi kesi ya vanu embwe, oloni inapu Njuvo ya Shukulu Kalunga Njambi.

² Njinalingi na nzili yange yoshe kuvwaesa vyakupangesa Njuvo ya Shukulu Kalunga, ngolinde, na siliva, na vunengu, na vutale, na mavaya, na mamanya a seo yakama, na mamanya akwola, na mamanya akucakeya mweka na mweka, na mamanya amavala akusalimba asi.

³ Co lalo akamwa yevi vyoshe njinalingi, njinaana siliva na ngolinde vyakutunda ku vufuko vwange, omwo ya cizemo cange a Njuvo ya Shukulu Kalunga Njambi.

⁴ Vulemu vwa ngolinde yakujela injinaana vunatuvakana 100, na 240 ya vulemu vwa siliva yakujela yakucakeya a vivumbe vya Njuvo ya Shukulu Kalunga,

⁵ na vyuma vyoshe vije vivakalinga vaka-vutongwe. Co ololo iya ali na cizango cakwana vwana kuli Shukulu Kalunga?”

⁶ Asinoni vakulunu va vikota, na vamyata va miyati, na vaka-kushika nzita, na vaka-kwendesa vipangi vya mwene valyanene vakevo vavenya kwana vwana,

⁷ co vaanene vyuma evi ku vipangi vya Njuvo ya Shukulu Kalunga, vanenele ngolinde ya vulemu vwakupwa 170, na siliva ya vulemu vwakutuvakana 340, na vunengu vwa vulemu vwakupwa 620, co na vutale vwa vulemu vwakutuvakana 3,400.

⁸ Co vaje vakele na mamanya a seo yakama vaanene ku vufuko vwa mu Njuvo ya Shukulu Kalunga, vuje vwakele nakunyunga Njehiyele kaLevi wa ku cikota ca Ngeleshone.

⁹ Co vanu vaanene na cizango kuli Shukulu Kalunga, cavavwasele manene akumona ngeci vanana vyavingi. Co mwene Ndaviti lalo nendi wavwaelelele manene.

Ndaviti ashangazala Njambi

¹⁰ Co aje vene, kulutwe lwa mbunga yoshe, Mwene Ndaviti washangazalele Shukulu Kalunga, wendekele ngwendi, “Shukulu Kalunga Njambi ya kukulwila yetu Yakomba, vakushangazale ku myaka yoshe!

¹¹ Yove wapwa uwakama, wa nzili, na vumpau, na vuvwa, na vumwene vwove vwapwa vwakama. Vyuma vyoshe vya mwilu nevi vya asi vyapwa vyove, co yove wapwa mwene, yove wapwa muka-kushwana vyoshe.

¹² Vufuko vwoshe na kasingimiko vyatunda kuli yove, washwana vyuma vyoshe na nzili yove na vukama vwove, co yove wasa kupwisa munu woshe kupwa wakama na nzili.

¹³ Ngecivene, ololo Njambi yetu, tulinakukukandelela, nakushangazala lizina lyove lya vumpau.

¹⁴ “Nameme yange na vanu vange, kutwasa kukwana cuma cimo, omwo vyuma vyoshe vyapwa vwana vwakutunda kuli yove, co yetu tunakwilwisila lika vije vyapwa laja vyove.

¹⁵ Yove wazivuka, Shukulu Kalunga, mukuyoya kwetu yetu tunapu ngwe vindungo na vangenzi, ngwe muvapwile vakukulwila vetu. Matangwa etu anapu ngwe kwita kwa munzinze, co kutwasa kuputumuka ku kutsa.

¹⁶ Shukulu Kalunga, Njambi yetu, tunanena amolika vufuko ovu vwoshe, mukutunga Njuvo yove, mukusingimika lizina lyove lyakujela, oloni vufuko vwoshe vwatunda kuli yove, co lalo vufuko vwoshe vwakundama kuli yove.

¹⁷ Njazivuka ngeci yove Njambi yange ukeseka mbunge ya munu na munu, co ukazivi kuvwaa na vanu vaje vaka-vushunga. Yange njinaana vyoshe evi kuli yove na cizango, co yange njinamono vanu vove ava vanakunguluka kuno vanaana nakuvwaelela kuli yove.

¹⁸ Yove Shukulu Kalunga Njambi ya vakukulwila vetu va Avilahama, na Isake, na Yakomba, nyunga viyongola vyakulinga ngeci mu vimbunge vya vanu vove na kwaka vimbunge vyavo kuli yove.

¹⁹ Ana munange Solomoni mbunge yakulumbunuka, ngeci anyunge vyuma vyoshe vije viwunamushiki, nakutunga Njuvo yove injinavwaesela cimweja vyuma vyakutungisa.”

²⁰ Asinoni Ndaviti washikile vanu ngwendi, “Shangazaleni oni Shukulu Kalunga Njambi yeni!” Co mbunga yoshe yashangazalele Shukulu Kalunga Njambi ya vakukulwila vavo, co vatsikamene nakulemesa, mukwana kasingimiko kuli Shukulu Kalunga na kuli mwene lalo.

²¹ Co alikaki mutondo vakombelelele vimuna, nakuvakundika kuli Shukulu Kalunga, asinoni vavaanene kuli vanu ngeci valye. Vakombelelele vingombe 1,000, na majamba a vimanga 1,000, na vana va vimanga 1,000, vaje vavenyekele voshe a mutula. Co lalo vanenele mulambu wa vinyu.

²² Ngecivene, a litangwa lije vavwaelelele manene omo valile nakunwa ku mesho a Shukulu Kalunga. Vendekele lalo simbu yamucivali ngeci Solomoni ikeye mwene. Mu lizina lya Shukulu Kalunga vamuvwavesele mazi, kupwa muka-kuvashwana, na Zandoke muka-kukombelela.

²³ Ngecivene, Solomoni washwanene a litanda lya ishe Ndaviti, lije lyamuvwaeselele Shukulu Kalunga. Co ikeye wapwile mwene wakuvezika, muyati woshe wa Isalele vamwononokele.

²⁴ Co vamyata voshe, na mashwalale, nameme vana va Ndaviti vakwavo vakulaesele ngeci vakononoka Solomoni akupwa mwene.

²⁵ Co Shukulu Kalunga waamesele manene Solomoni ku mesho a vaIsalele voshe, wamwanene vumpau vwa vumwene kuhyana vimyene vakwavo vaje vashwanene mu Isalele.

Kutsa kwa Mwene Ndaviti

²⁶ Co Ndaviti muna Njesi wapwile mwene mu Isalele mwoshe,

²⁷ myaka yashwanene yapwile makumi awana. Washwanene mu Hevelone myaka itanu na ivali, na mu Yelusalema myaka makumi atatu na itatu.

²⁸ Ikeye wakuluvalele manene omo watsile, co wakele na vufuko na kasingimiko, munendi Solomoni wamushwanene kupwa mwene.

²⁹ Vin̄anda vya Mwene Ndaviti kutunda kukushangumukila kutwala ku shongo vavisoneka mu mizimbu ya vaka-kwimanena vatatu, Samwele na Natane na Ngande.

³⁰ Visoneka evi vikevyo vituleka vati washwanene, nzili mukajo yakele nayo na vyuma vyoshe vije vyalingiwile kuli ikeye na kuli Isalele na kuli vaje vazengelekele vumwene.