1 Mizimbu 27 - Livulu lya Shukulu Kalunga

Vamyata va mu vumwene

¹ Ou ukewo mukana wa vakulunu va mu naanga ya vaIsalele na vantwama va vikota na vamyata vavo vaje vatwamenenene vipangi vya vumwene. A ngonde na ngonde, a mwaka uje vene, munga yeka ya vanalume vakupwa 24,000 vakele na kulyakula-akula vipangi mwisi ya muka-kushika wa mu ngonde ije.

² Ku ngonde yakulivanga, Njashombeyame muna Zambendiyele ikeye wapwile mukulunu wa mbunga, mu mbunga yendi mwakele vanalume vakupwa 24,000.

³ Wapwile mutekulwila wa Peleze, co wapwile mukulunu wa voshe vaka-kushika nzita ku ngonde yakulivanga.

⁴ Mu ngonde yamucivali, Ndondai, mutekulwila wa Ahohi (Mikelote wapwile mukulunu wa mbunga yamucivali.)

⁵ Co ku ngonde yamucitatu, Mbenaya muna Yehoyanda muka-kukombelela, ikeye wapwile mukulunu, co mu mbunga yendi mwakele vanalume vakupwa 24,000.

⁶ Ou ikeye Mbenaya ntwama ya vaje “Makumi Atatu,” (co munendi Amizavande ikeye wapwile mukulunu wa mbunga yendi.)

⁷ Ku ngonde yamuciwana, Asahele, ndolome ya Yowave. (Munendi Zevandiya ikeye wamushwanene,) co mu mbunga yendi mwakele vanalume vakupwa 24,000.

⁸ Mu ngonde yamucitanu, Shamehute mutekulwila wa Izehale, ikeye wapwile mukulunu, co mu mbunga yendi mwakele vanalume vakupwa 24,000.

⁹ Mu ngonde yamucitanu na imo, Ila muna Ikesha wa ku Tekowa, mu mbunga yendi mwakele vanalume vakupwa 24,000.

¹⁰ Mu ngonde yamucitanu na vivali, Heleze, kaPelone wa ku vana va Efalime, mu mbunga yendi mwakele vanalume vakupwa 24,000.

¹¹ Mu ngonde yamucitanu na vitatu, Simbekai, wa ku Husha (ikeye wapwile umo wa ku cikota ca Zela, wa ku muyati wa Yunda.) Mu mbunga yendi mwakele vanalume vakupwa 24,000.

¹² Mu ngonde yamucitanu na viwana, Aviyezele wa ku Anatote mu lifuti lya muyati wa Mbenjemani. Mu mbunga yendi mwakele vanalume vakupwa 24,000.

¹³ Mu ngonde yamulikumi, Mahalai, wa ku Netofa. (Ikeye wapwile wa ku cikota ca Zela.) Mu mbunga yendi mwakele vanalume vakupwa 24,000.

¹⁴ Mu ngonde yamulikumi na imo, Mbenaya wa ku Pilatone mu mutambela wa muyati wa Efalime. Mu mbunga yendi mwakele vanalume vakupwa 24,000.

¹⁵ Mu ngonde yamulikumi na vivali, Helendai wa ku Netofa. (Ikeye wapwile mutekulwila wa Otenyele.) Mu mbunga yendi mwakele vanalume vakupwa 24,000.

Vantwama va miyati ya Isalele

¹⁶ Ava vakevo vantwama va miyati ya Isalele. Ku muyati wa Luvena kwakele, Elyazale, muna Zikeli, ku muyati wa Simyoni kwakele, Shefatiya muna Maka,

¹⁷ ku muyati wa Levi kwakele, Hashaviya muna Kemwele, ku muyati wa Alone kwakele, Zandoke,

¹⁸ ku muyati wa Yunda kwakele, Elihu ndolome ya Ndaviti, ku muyati wa Isakale kwakele, Omeli muna Mikaele,

¹⁹ ku muyati wa Zembuloni kwakele, Ishemaya muna Ovandiya, ku muyati wa Nafetali kwakele, Njelemote muna Azelyele,

²⁰ ku muyati wa Efalime kwakele, Hosheya muna Azaziya, ku muyati wa Manase wa mu kangombe ka yambi kwakele, Njwele muna Pendaya,

²¹ ku muyati wa Manase wa mu ngangela kwakele, Indo muna Zekaliya, ku muyati wa Mbenjemani kwakele, Njasiyele muna Avinele,

²² ku muyati wa Ndani kwakele, Azalele muna Njeholame.

²³ Mwene Ndaviti kalavele vanu vaje vakele na myaka makumi avali kutwala kwisi, omwo Shukulu Kalunga wakulaesele ngeci akatumisa vanu va Isalele ngwe vingongonosi vya mwilu.

²⁴ Yowave muna Zeluya ikeye washangumukile kulava vanu, oloni kamanesele kuvalava. Co vukalu vwa Njambi vwezile a Isalele, omwo akulava oku, ngecivene, vungi vwavo kuvavasonekele mu mavulu a Mwene Ndaviti.

Vantwama va vufuko vwa mwene

²⁵ Ou ukewo mukana wa vaje vakele nakukenga a vufuko vwa mwene, Azemavete muna Andiyele ikeye wakele nakukenga a milili yakutulikila vufuko vwa mwene. Co Yonatana muna Uziya ikeye wakele nakukenga a vufuko vwa mu mahya na mu membo akama nawa amandondo na mu vinjuvo.

²⁶ Ezeli muna Kelumbe ikeye wakele nakukenga a vipangi vyakulima,

²⁷ Shimei wa ku Lama ikeye wakele nakukenga a vipangi vya mu mahya a mikolovozi ya vushuka vwa vinyu, Zavendi wa ku Shefame ikeye wakele nakukenga a vipangi vya mu mahya a mikolovozi ya vushuka vwa vinyu na a vipangi vya vinjuvo vyakutulikila mikolovozi ya vushuka vwa vinyu.

²⁸ Mbale Hanane wa ku Ngendele ikeye wakele nakukenga a miti ya olive na mikuyu ije yakele mu lifuti lya ku vushelumukilo vwa malundu lya mu kangombe ka yambi, Yowashe ikeye wakele nakukenga a vinjuvo vyakutulikila mazi a olive.

²⁹ Shiletai wa ku Shalone ikeye wakele nakukenga a vingombe vakele mu cana ca Shalone. Shafate muna Andelai ikeye wakele nakukenga a vingombe vakele mu vyana.

³⁰ Ovile kaIshimela ikeye wakele nakukenga a tumelo, co Njehendeya wa ku Melonote ikeye wakele nakukenga a vimulu.

³¹ Njazize kaHangeli ikeye wakele nakukenga a vimanga, na vimembe.

Vaka-kunangula Mwene Ndaviti

³² Yonatana, inanu ya Mwene Ndaviti, wapwile muka-kunangula wa mana na muka-kulilongesa. Ikeye, na Njehiyele muna Hakemone vakele na moko ya a vilongesa vya vana va mwene.

³³ Ahitofele wapwile muka-kunangula mwene, co Hushai kaAleki wapwile musamba wa mwene na muka-kusimutwiya na vanu.

³⁴ Omo Ahitofele watsile, co Aviyatale, na Yehoyanda muna Mbenaya vapwile vaka-kunangula mwene. Co Yowave ikeye wapwile muka-kushika nzita ya mwene.