1 Mizimbu 26 - Livulu lya Shukulu Kalunga

Vaka-kunyunga Njuvo ya Shukulu Kalunga

¹ Evi vikevyo vingila vivaanene kuli vaLevi vaje vapangele vipangi vyakunyunga Njuvo ya Shukulu Kalunga. Ku cikota ca Kola kwakele Meshelemiya, muna Kole, wa ku naanga ya Asafe.

² Ikeye wakele na vana vatanu na vavali, vavasonekele ngwe ku myaka yavo, mazina avo, Zekaliya, na Njendiyele, na Zevandiya, na Njatenyele,

³ na Elame, na Njehohanane, na Elyehoenai.

⁴ Co lalo kwakele Ovende Endome, uje yavezikisile Njambi nakumwana vana vatanu na vatatu, co vavasonekele ngwe ku myaka yavo, mazina avo, Shemaya, na Yehozavande, na Yowahe, na Sakale, na Netanela,

⁵ na Amiyele, na Isakale, na Peuletai.

⁶ Co Ovende Endome wakele na mwana lizina lyendi Shemaya. Shemaya wakele na vana, vaje vapwile vakulunu mu naanga yavo omwo vapwile vanu vaka-mana nakupanga na nzili.

⁷ Ava vakevo vana va Shemaya, mazina avo, Otengi, na Lefaele, na Ovende, na Elezavande, na Elihu, na Shemakiya. Elihu na Shemakiya muvuvali vwavo vakele na mana.

⁸ Mu naanga ya Ovende Endome mwakele vanu vakupwa makumi atanu na limo na vanu vavali vaka-kulilongesa manene a vipangi evi.

⁹ Mu naanga ya Meshelemiya mwakele vanalume vaka-kulilongesa manene va cifwa eci lalo vakupwa likumi na vatanu na vatatu.

¹⁰ Ku cikota ca Melali kwakele Hosa, uje wakele na vana vawana, mazina avo, Shimeli, (ishe wamupwisile ntwama, nameme ikeye kapwile mwana wa ntwatwa),

¹¹ na Hilikiya, na Tevaliya, na Zekaliya. Co voshe vapwile likumi na vatatu va ku naanga ya Hosa vaje vapwile vaka-kunyunga Njuvo ya Shukulu Kalunga.

¹² Vaka-kunyunga Njuvo ya Shukulu Kalunga vavaangunwine mu vimbunga, ngwe mu naanga yavo, co vavaanene vipangi vya mu Njuvo ya Shukulu Kalunga, ngwe muvalingile vakwavo vaLevi.

¹³ Naanga yoshe, yaindondo nambe yakama, vatele n̄ela ngeci vamone cikolo muka cije vanapande kunyunga.

¹⁴ Co n̄ela ya ku cikolo ca mu ngangela yawililile Shelemiya, vatele n̄ela lalo ali munendi Zekaliya muka-kunangula na mana, co n̄ela yawililile ku cikolo ca ku kunto.

¹⁵ Co n̄ela ya Ovende Endome yawililile ku cikolo ca mu mbwela, n̄ela ya vana vendi yawililile kukunyunga milili ya vinjuvo vyakutulikila vivala.

¹⁶ Co n̄ela ya Shupime, na Hosa yawililile ku cikolo ca mu kangombe ka yambi, na Cikolo ca Shalekete ku vulamatelo vwa ngila. Vaka-kunyunga vakele nakulyakula kupanga.

¹⁷ Co mu ngangela vaka-kunyunga vatanu na umo vakele a vipangi a litangwa na litangwa, co ku kunto kwakele vaka-kunyunga vawana, co ku mbwela kwakele vaka-kunyunga vawana. Co vaka-kunyunga vawana vakele nakunyunga milili ya vinjuvo vyakutulikila a litangwa na litangwa, vavali ku mulili na mulili.

¹⁸ Co ku nginga ya ku mutambela wa mu kangombe ka yambi, kwakele vaka-kunyunga ku ngila vawana, co vavali vanyungile ku nginga.

¹⁹ Evi vikevyo vipangi vyakunyunga vivapangelele ku cikota ca Kola, na Melali.

Vipangi vikwavo vya mu Njuvo ya Shukulu Kalunga

²⁰ Co ku vaLevi Ahiya wakele nakunyunga vufuko vwa mu Njuvo ya Shukulu Kalunga, na milili yakutulikila vwana vuje vuvakundikile kuli Njambi.

²¹ Co Landane, muna Ngeleshone, wapwile kukulwila ya naanga yaingi, amo na naanga ya munendi Njehiyele.

²² Co vana vavali va vana va Landane mazina avo, Zetame, na Njwele, vakele nakunyunga vufuko vwa mu Njuvo ya Shukulu Kalunga na mu milili yakutulikila.

²³ Co vatekulwila va Amelame mazina avo, Izehale, na Hevelone, na Uziyele, navo vavapangelele vipangi.

²⁴ Shevwele, wa ku cikota ca Ngeleshone muna Mosesa ikeye wapwile mwata wakama wakunyunga vufuko vwa mu Njuvo ya Shukulu Kalunga.

²⁵ Co Elyazale ndolome ya Ngeleshone, ikeye wapwile kavushoko ka Shelomiti. Elyazale wapwile ishe ya Lehaviya, ishe ya Njeshiya, ishe ya Njolame, ishe ya Zikeli, ishe ya Shelomiti.

²⁶ Shelomiti na vanu va mu naanga yendi vakele nakunyunga vwana vwoshe vuje vwakundikile kuli Njambi Mwene Ndaviti, na vakulunu va mu naanga, na vantwama va vimbunga vya mu vikota, na vamyata va nzita.

²⁷ Co vambateleko vufuko vumo vuvapukwile mu nzita nakuvukundika ngeci vavupangese mu Njuvo ya Shukulu Kalunga.

²⁸ Co Shelomiti na naanga yendi vakele nakunyunga vyuma vyoshe vije vivakundikile ngeci vavipangese mu Njuvo ya Shukulu Kalunga, kuwezelelako na vwana vuje vwanenele muka-kwimanena Samwele, na Mwene Saulu, na Avinele muna Nele, na Yowave muna Zeluya.

Vipangi vya vaLevi vakwavo

²⁹ Co akati ka vatekulwila va Izehale, akele Kenaniya, na vana vendi vavaanene vipangi vyakunyunga visoneka vya mu mavulu nakusompa vin̄anda vya vanu va Isalele.

³⁰ Co akati ka vatekulwila va Hevelone, akele Hashaviya na vavushoko vwendi vakupwa 17,000, voshe vapwile vanu vakusimpa, vavaanene moko yakwendesa vipangi vyoshe vya vuNjambi na vin̄anda vyakusompa mu Isalele ku mutambela wa mu kangombe ka yambi ku Ndonga ya Yondau.

³¹ Co Njeliya ikeye wapwile ntwama ya vatekulwila va Hevelone. Mu mwaka wamumakumi awana uje Ndaviti wapwile mwene, kwakele kushakezeka mu naanga ya vatekulwila va Hevelone, co vawanenemo mashwalale vakusimpa, vaje vakundamene ku naanga ije vakele ku Njazele mu mutambela wa Ngilyande.

³² Co Mwene Ndaviti waangwile vakulunu va mu naanga vakupwa 2,700, vakusimpa vavushoko vwa Njeliya, co vavaanene moko yakwendesa vipangi vyoshe vya vuNjambi, na vin̄anda vyakusompa mu Isalele ku mutambela wa mu ngangela ku Ndonga ya Yondau na mu mutambela wa Luvena na Ngande na litambelo lya muyati wa Manase wa mu ngangela.