1 Mizimbu 23 - Livulu lya Shukulu Kalunga

¹ Omo Ndaviti wakuluvalele manene, co washwanesele munendi Solomoni kupwa mwene wa mu Isalele.

Vipangi vya vaLevi

² Mwene Ndaviti wakungulwile vantwama voshe va Isalele na vaka-kukombelela voshe amo na vaLevi.

³ Co walavele vanalume voshe va vaLevi vaje vakele na myaka makumi atatu nambe kutuvakana. Co voshe vapwile 38,000.

⁴ Mwene waangwile vanalume 24,000 kwendesa vipangi vya mu Njuvo ya Shukulu Kalunga, co vanu vakupwa 6,000 vapwile vaka-kunyunga mavulu nakusompa vin̄anda,

⁵ co ava 4,000 vapwile vaka-kunyunga ku vikolo, co vanu vakupwa 4,000 vapwile vaka-kushangazala Shukulu Kalunga na visanzi vije vyaanene Ndaviti ngeci vavipangese.

⁶ Co Ndaviti waangwile vaLevi mu vimbunga vitatu, ngwe ku vikota vyavo, Ngeleshone, na Kohate, na Melali.

⁷ Ngeleshone wakele na vana vavali mazina avo, Landane, na Shimei.

⁸ Landane wakele na vana vatatu mazina avo, Njehiyele, na Zetame, na Njwele,

⁹ ava vakevo vapwile vakulunu va vikota vije vyatundile kuli Landane. (Shimei wakele na vana vatatu mazina avo, Shelemote, na Haziyele, na Halane.)

¹⁰ Shimei wakele na vana vawana mazina avo, Njahate, na Zina, na Njeushi, na Mbeliya, ngwe ku myaka yavo,

¹¹ Njahate wapwile mukulunu, co Ziva wapwile wamucivali, oloni Njeushi, na Mbeliya kuvakele na vatekulwila vavangi, ngecivene, vavalavele kupwa cikota cimo.

¹² Kohate wakele na vana vawana mazina avo, Amelame, na Izehale, na Hevelone, na Uziyele.

¹³ Munendi wa ntwatwa lizina lyendi Amelame, ikeye ishe ya Alone, na Mosesa. (Co Alone na vatekulwila vendi vavaangunwine ngeci vakale na moko a vyuma vyakujela myaka yoshe nakwenyeka insense akulemesa Shukulu Kalunga, nakumupangela, nakuvezikisa vanu mu lizina lyendi.

¹⁴ Oloni vana va Mosesa, munu wa Njambi, vavakumbasanene amo na vaLevi.)

¹⁵ Mosesa wakele na vana vavali mazina avo, Ngeleshome, na Elyazale.

¹⁶ Co ntwama akati ka vana va Ngeleshome wapwile Shevwele.

¹⁷ Co Elyazale wakele na mwana umolika lizina lyendi Lehaviya, oloni Lehaviya wakele na vatekulwila vavangi.

¹⁸ Co muna Kohate wamucivali lizina lyendi, Izehale, wakele na mwana lizina lyendi, Shelomiti, ikeye wapwile mukulunu wa cikota.

¹⁹ Muna Kohate wamucitatu lizina lyendi Hevelone, wakele na vana vawana mazina avo, Njeliya, na Amaliya, na Njehaziyele, na Njekameame.

²⁰ Muna Kohate wamuciwana lizina lyendi, Uziyele, wakele na vana vavali mazina avo, Mika, na Isheya.

²¹ Melali wakele na vana vavali mazina avo, Maheli, na Mushi. Maheli wakele na vana vavali mazina avo, Elyazale, na Kishe,

²² oloni Elyazale watsile kakele na mwana wa munalume, kuvanga va vanakazi lika. Co vana vendi va vanakazi vashombokele kuli vashonyavo, vana va Kishe.

²³ Muna Melali wamucivali, Mushi, wakele na vana vatatu mazina avo, Maheli, na Endele, na Njelemote.

²⁴ Ava vakevo vatekulwila va Levi, ku vikota na mu naanga yavo, munu na munu walisonekesele lizina. Co munu na munu na vatekulwila vendi, kutunda ku myaka makumi avali nambe kutuvakana, vapangele vipangi vya mu Njuvo ya Shukulu Kalunga.

²⁵ Ndaviti wendekele ngwendi, “Shukulu Kalunga Njambi ya Isalele naana kwoloka ku vanu vendi, co ikeye vavenya akakala mu Yelusalema myaka yoshe.

²⁶ Ngecivene, vaLevi kuvapandele lalo kwambata Mbalaka Mwakuliwanena, na vyuma vyoshe vyakupangesa mukulemesa.”

²⁷ Ngecivene, ku majwi akumanesela a Ndaviti, vaLevi voshe vavasonekesele kupanga omo vanete ku myaka makumi avali,

²⁸ co vipangi vyavo vyapwile evi, kukwasa vaka-kukombelela vakutunda kuli Alone akulemesa kwa mu Njuvo ya Shukulu Kalunga, kuvwaesa mu vipango na milili yamwo, nakujelesa vyuma vyoshe vyakujela ngeci kesi vijwale,

²⁹ nakukala na moko ya a makende akukombelela kuli Njambi, na vunga vwakuseneta vwa n̄ombelo ya vyakulya, na makende akujeneka musima, na vin̄ombelo vyakwoca, na vunga vwa tiliku vwakukumbasana na mazi a olive, kupeselesa nakwesekesa vin̄ombelo vya mu Njuvo ya Shukulu Kalunga,

³⁰ co vakemana mutondo na mutondo, na cingwezi na cingwezi, mukushangazala namukwalesa Shukulu Kalunga,

³¹ omo vakombelela vin̄ombelo vya kwenyeka kuli Shukulu Kalunga a Litangwa Lyakuhwima, na a Ciwano ca Kutenama kwa Ngonde, na a viwano vikwavo lalo. Co kwakele mashiko akwinika ngeci vaLevi vanapande kulinga vipangi evi a simbu na simbu. Co vaLevi vavaanene vipangi vyakulemesa Shukulu Kalunga simbu yoshe.

³² Co vaLevi lalo vavaanene moko yakunyunga Mbalaka Mwakuliwanena na Njuvo ya Shukulu Kalunga, nakukwasa vavushoko vwavo vaka-kukombelela vakutunda kuli Alone, mu Njuvo ya Shukulu Kalunga a simbu yakulemesa.