1 Mizimbu 22 - Livulu lya Shukulu Kalunga

¹ Ngecivene, Ndaviti wendekele ngwendi, “Kuno kukekwo vakatungila Njuvo ya Shukulu Kalunga Njambi. Oku kukekwo ku mutula kuje vanu va Isalele vakakombelela vin̄ombelo vya kwenyeka.”

Ndaviti alivwaesela kutunga Njuvo ya Shukulu Kalunga

² Mwene Ndaviti waanene lishiko kuli vaka-kwija vaje vakele mu lifuti lya Isalele ngeci vakunguluke, co wavanene vipangi. Vamo vapwile vaka-kushonga mamanya akutungisa Njuvo ya Shukulu Kalunga.

³ Co wanenele vutale vwavungi ngeci vafule vimbambo vya ku mapito a ku vikolo, na vikuvo vyakunungilisa, na vunengu lalo vwavungi vuje naumo wai wasele kuvupeselesa.

⁴ Co Ndaviti walizivasanene na vanu va ku Tile na ku Sindone kumunenela viti vya kendale vyavingi.

⁵ Ndaviti wayongwele ngwendi, “Njuvo ya Shukulu Kalunga ije yakatunga munange Solomoni, inapande kupwa yalutsimo na vumpau mu lifuti mwoshe. Oloni ikeye acili mukwenje kanda acikale na mana, ngecivene, njinapande kuvwaesela cimweja vyayo.” Ngecivene, Ndaviti wavwaeselele cimweja vyuma vyoshe vije vivakatonda simbu kanda atse.

⁶ Wasanene munendi Solomoni, wamushikile kutungila Njuvo Shukulu Kalunga, Njambi ya Isalele.

⁷ Co Ndaviti wendekele kuli ikeye ngwendi, “Munange, njashakele kutunga Njuvo ya Shukulu Kalunga mukusingimika Shukulu Kalunga Njambi yange.

⁸ Oloni Shukulu Kalunga wanjilekele ngeci njinatsii manene vanu vavangi, co lalo njinalu vinzita vyavingi manene. Ngecivene, omwo a vanu vanjinatsii, co kanjitavesele kumutungila Njuvo.

⁹ Nameme ngoco, ikeye wanjikulaesele ngwendi, ‘Ukakala na mwana uje akashwana mu kwoloka, omwo njikamwana kwoloka kuli vitozi vendi voshe. Lizina lyendi likapwa Solomoni, omwo a simbu yakushwana kwendi njikana Isalele kwoloka nakukala mwamuvwa.

¹⁰ Ikeye akanjitungila Njuvo. Akapwa munange, co nange njikapwa nji ishe. Co mutekulyendi umo akashwana mu Isalele myaka yoshe!’ ”

¹¹ Ndaviti wendekele ngwendi, “Munange, ololo, Shukulu Kalunga Njambi yove akale amo nove, anyunge cikulaeso cendi cakukulingisa kuya kulutwe akumutungila Njuvo.

¹² Shukulu Kalunga Njambi yove akwane kuzivisisa na mana, ngeci wase kushwana Isalele ngwe ku lishiko lyendi.

¹³ Nga wononoka mashiko oshe aje aanene Shukulu Kalunga kuli Mosesa ali Isalele, co ukavezika. Pwa muka-kukolesa nakusimpa, co kesi utave cuma cimo cikuzivise lyova.

¹⁴ Ngwe a Njuvo, akuundangana kwange njinakungulula ngolinde yakupwa 3,400, na siliva yakupwa 34,000 vyakupangesa akuyitunga. Kuwezelela ku vyuma vyoshe evi, kuli lalo vunengu, na vutale vwavungi manene. Co lalo njinavwaesela cimweja mavaya na mamanya, oloni unapande kuwezelelako lalo.

¹⁵ Uli na vaka-kupanga vavangi manene, co kuli vanu vaka-kupanga ku citapu ca mamanya, kuli vaka-kutunga, na vaka-kushonga, kuli vanu vavangi vaka-vutongwe vakuliseza-seza vaje vasa kupanga

¹⁶ na ngolinde, na siliva, na vunengu, na vikuvo. Ololo shangumuka oni vipangi, Shukulu Kalunga akale amo nove.”

¹⁷ Ndaviti washikile vantwama voshe va Isalele kukwasa Solomoni.

¹⁸ Co wendekele ngwendi, “Shukulu Kalunga Njambi yeni nakala amo neni, co namyana kwoloka ku mitambela yoshe. Co Shukulu Kalunga natavele ngeci njihyane vanu voshe vaje vakele mu lifuti lino, ololo lifuti lino linapu lyeni, co lalo linapu lifuti lya Shukulu Kalunga.

¹⁹ Ololo pangeleni Shukulu Kalunga Njambi yeni na vimbunge vyeni vyoshe, na mwonyo weni woshe. Shangumukeni kutunga Njuvo ya Shukulu Kalunga, ngeci mwakemo Cikasa ca Cikumiiyo ca Shukulu Kalunga, na vyuma vyoshe vyakujela vyakupangesa akumulemesa.”