1 Mizimbu 21 - Livulu lya Shukulu Kalunga

Ndaviti alava vanu

¹ Satana washakele kunena vukalu ali vanu va Isalele, co wasindiiye Ndaviti ngeci alave vaIsalele.

² Co Ndaviti waanene mashiko kuli Yowave na vamyata vakwavo ngwendi, “Yeni mu Isalele mwoshe, kutunda ku shongo imo ya lifuti kweta ku shongo ikwavo, co laveni vanu. Njishaka kuzivuka vungi vwavo muvanapu.”

³ Co Yowave wamukumbulwile ngwendi, “Shukulu Kalunga atumise manene vanu va Isalele visimbu 100 kuhyana muvanapu ololo! Shukulu, voshe vanapu vangamba vove. Oloni omwo vikajo shukulu ushaka kulinga ngacije wane mulonga ku lifuti lyoshe lya Isalele?”

⁴ Oloni mwene washikile Yowave kwononoka lishiko. Co Yowave waile, wetanganene mu lifuti lyoshe lya Isalele, asinoni welukile ku Yelusalema.

⁵ Co wanenele vukaleo kuli Mwene Ndaviti vwa vungi vwa vanu voshe vaje vapandele kukovela vipangi vya vushwalale mu Isalele, vapwile 1,100,000, co mu Yunda vapwile 470,000.

⁶ Omwo Yowave katavele lishiko lya mwene, co kalavele miyati ya Levi, na Mbenjemani.

⁷ Oloni Njambi kavwaelelele na vije vyalingiwile, ngecivene, wahisile Isalele.

⁸ Co Ndaviti wendekele kuli Njambi ngwendi, “Njinavulumuna manene akulinga cuma eci! Shukulu njisambese. Njinalingi mwa vulema.”

⁹ Asinoni Shukulu Kalunga wendekele kuli Ngande, muka-kwimanena wa Ndaviti ngwendi,

¹⁰ “Ya ukaleke Ndaviti ngwove Shukulu Kalunga nendeka ngwendi akwana vyuma vitatu angulao cuma cimo ngeci acilinge kuli yove.”

¹¹ Co Ngande waile kuli Ndaviti, nakumuleka vije vyendekele Shukulu Kalunga, co wamwihwile ngwendi, “Waangulao cuma cika?

¹² Myaka itatu ya njala? Nambe vingonde vitatu vyakutewa vitozi vove? Nambe matangwa atatu aje Shukulu Kalunga akalwa nove na mukwale wendi, co akatuma mushongo wakulitambwisa mu lifuti lyove, akapangesa kangelo kendi kunena kutsa mu Isalele mwoshe? Yongolao a vyuma evi, co njileke cikumbululo cije cinjikaleka Shukulu Kalunga.”

¹³ Ndaviti wakumbulwile Ngande ngwendi, “Njili mu vukalu vwakama! Oloni mwamuvwa njiwile mu livoko lya Shukulu Kalunga, omwo ikeye muka-mema ku mbunge, oloni kesi njiwile mu livoko lya munu embwe.”

¹⁴ Ngecivene, Shukulu Kalunga watumine mushongo wakulitambwisa ali vanu va Isalele, co vanu vakupwa 70,000 vatsile.

¹⁵ Asinoni Shukulu Kalunga watumine kangelo ngeci anyongese Yelusalema, oloni watengulwile viyongola vyendi, co wendekele kuli kangelo ngwendi, “Likele! Wapwisamo!” Kangelo wakele ku mutambela wa lijungwilo lya Alauna, kaNjevushi.

¹⁶ Co Ndaviti wandwile mesho endi wamwene kangelo nemana a vukambwila, najundula livoko lyendi lije lyakele na mukwale ngeci anyongese Yelusalema. Asinoni Ndaviti na vantwama va vanu, vaje voshe vazalele vikeleya, vatsikamene, vakengesele vihanga vyavo asi.

¹⁷ Co Ndaviti walombelele ngwendi, “Shukulu Njambi, yange vene njili na mulonga. Yange vene njashikile kulava vanu. Indi ava vanu vayanda vanalingi vikajo? Shukulu Kalunga, Njambi yange, njihise yange na naanga yange, co amena vanu vove.”

¹⁸ Co kangelo ka Shukulu Kalunga walekele Ngande aleke Ndaviti aye nakutungila Shukulu Kalunga mutula ku mutambela wa lijungwilo lya Alauna.

¹⁹ Co Ndaviti wononokele lishiko lya Shukulu Kalunga, waile ngwe muje mwamulekele Ngande.

²⁰ Kuje ku mutambela wa lijungwilo, Alauna na vana vendi vawana vakele nakujungula tiliku, omo vamwene kangelo, vatewele nakukavanda.

²¹ Co omo Alauna wamwene Mwene Ndaviti alinakwija, watundile kuje ku mutambela wa lijungwilo watsikamene, wakengesele cihanga cendi asi.

²² Co Ndaviti wendekele kuli ikeye ngwendi, “Njilandese mutambela wa lijungwilo lyove, ngeci njitungileo mutula wa Shukulu Kalunga, ngeci mushongo wakulitambwisa uhwe ku vanu. Njikufweta ndando yaivwa.”

²³ Co Alauna wakumbulwile Ndaviti ngwendi, “Wambate ngano shukulu, ngeci ulingileo vyoshe ushaka. Co lalo vingombe ava wenyekele a mutula kupwa n̄ombelo, na vimandauluwa vyavo evi amolika na mavaya akujungwila ngeci vipwe vitale, co lalo tiliku eyi ipwe n̄ombelo ya vimbuto. Vyoshe evi njinakwana.”

²⁴ Oloni mwene wamukumbulwile ngwendi, “Embwe, njikufweta vene ndando yaivwa. Kunjasa kukombelela kuli Shukulu Kalunga vin̄ombelo vya kulanda embwe.”

²⁵ Co wafwetele Alauna mavundungulu 600 a ngolinde vyakulanda uje mutambela wa lijungwilo.

²⁶ Asinoni watungile mutula wa Shukulu Kalunga kuje, co walambwile milambu ya kwenyeka, na milambu ya kulitombola. Ndaviti walombelele, co Shukulu Kalunga wamukumbulwile watuma tuhya twa mwilu, co twenyekele vin̄ombelo vije vyakele a mutula.

²⁷ Shukulu Kalunga walekele kangelo kushomeka mukwale wendi mu cindalo cawo, uje kangelo wononokele.

²⁸ Co Ndaviti wamwene ngeci Shukulu Kalunga nakumbulula lilombelo lyendi, ngecivene, wakombelelele vin̄ombelo a mutula ku mutambela wa lijungwilo lya Alauna.

²⁹ A simbu ije Mbalaka Mwakuliwanena ije yalingile Mosesa mu mambo, na mutula uje wakwenyekela vin̄ombelo, anga vene vyakele ku mwela wakulemesela ku Ngimbiyone,

³⁰ oloni Ndaviti kasele kuya kuje mukulemesa Njambi, omwo wakele na lyova lya mukwale wa kangelo ka Shukulu Kalunga.