1 Mizimbu 20 - Livulu lya Shukulu Kalunga

Ndaviti afungulula Lamba

¹ Akushangumuka mwaka, a simbu ije vakai vimyene mukulwa nzita, Yowave watwamenenene mashwalale kukalwisa lifuti lya vaAmoni, oloni Mwene Ndaviti wasalele mu Yelusalema. Co vazengelekele nganda ya Lamba, vailwisile, nakuyinyongesa.

² Co kamponya ka vaAmoni Moleki kakele na cilongo ca ngolinde, co akucipeselesa capwile makilo makumi atatu na awana. Co mukati kaco mwakele limanya lya seo yakama, lije Ndaviti walinonele nakulyaka mu cilongo cendi. Co lalo wambatele vije vyapukwile mu nganda.

³ Wambatele vanu vaje vakele muje mu nganda nakuvaka ku vipangi vyakuselala, vamo ku matemo, vakwavo ku vinjaviti. Co walingile cuma eci kuli vanu voshe va mu membo eka a vaAmoni. Asinoni ikeye na vanu vendi velukile ku Yelusalema.

Vinzita vyakulwisa makisi-kisi a vaFilisitiya

⁴ Munima yevi, nzita yakatukile lalo na vaFilisitiya ku Ngezele. Eci capwile ngeci omo Simbekai wa ku Husha watsiile likisi-kisi lizina lyendi Sipai, co vaFilisitiya vavafungulwile mu nzita ije.

⁵ Co kwakele lalo nzita ikwavo na vaFilisitiya, Elehanane muna Njaile watsiile Lahemi, shongo ya Ngolyata wa ku Ngate, muyunda wa likunga lyendi wapwile ngwe mukambo wa muka-kutunga vinanga.

⁶ Co lalo kwakele nzita ikwavo ku Ngate, kwakele likisi-kisi wakele na milavo itanu na umo ku livoko limo na limo, na milavo itanu na umo ku cilyato cimo na cimo. Ikeye wapwile kukulwila wa makisi-kisi va ku san̄ulu.

⁷ Ikeye wayeluwisile vaIsalele, co Yonatana, muna Shamema, ndolome ya Ndaviti wamutsiile.

⁸ Ava makisi-kisi vatatu, Ndaviti wavatsiile na vanu vendi, vakevo vapwile vatekulwila va makisi-kisi va ku Ngate.