1 Mizimbu 19 - Livulu lya Shukulu Kalunga

Ndaviti afungulula vaAmoni na vaSilya

¹ Omo kuneti simbu, Mwene Nahashe wa vaAmoni watsile, co munendi Hanune washwanene a vumwene.

² Co Mwene Ndaviti wendekele ngwendi, “Njinapande kusholola cizemo cacivwa kuli Hanune, ngwe muje mwalingile ishe Nahashe kuli yange.” Ngecivene, Ndaviti watumine miluwa mukumulilisa ku kutsa kwa ishe. Co omo vaje miluwa vetele mu Amoni kuli Hanune,

³ vantwama va vaAmoni vendekele kuli mwene ngwavo, “Kuma wayongola ngwove cinapu kasingimiko kuli isho omo Ndaviti natumu vanu vendi kuli yove nakukulilisa ndi? Kesi ngoco embwe! Navatumu kuno nakunenga nakwilula nganda, ngeci akatufungulule!”

⁴ Ngecivene, Hanune wakwatele vaje miluwa va Ndaviti, wavatewile minjezi yavo, co watavozwele vuzalo vwavo kuvupwisa a vinyonga, co wavashekele.

⁵ Vaje miluwa va Ndaviti vakele na shwamwa manene yakwiluka kwimbo. Omo Ndaviti wazivile vije vyalingiwile, co watumine majwi akuvavindika ngeci vakale ku Yeliko kesi veluke noo minjezi yavo inamene lalo.

⁶ Omo Mwene Hanune na vaAmoni vanangukile ngeci Ndaviti napu citozi cavo, ngecivene, vafwetele makilo 34,000 a siliva akukumuna matemba na vaka-kuwendesa va ku Masepotamya, na ku mafuti a vaSilya, Maka, na Zova.

⁷ Co matemba akupwa 32,000 avakumwine na mashwalale va mwene wa ku Maka, vezile nakutunga cilombo cavo muyehi na Mendeva. Co vaAmoni lalo vezile kutunda ku vinganda vyavo nakulivwaesela kulwa.

⁸ Omo Ndaviti wazivile vije vyalingiwile, watumineko Yowave na mashwalale voshe nakuvalwisa.

⁹ VaAmoni vatuukile nakulikwalaleka ku vukovelelo vwa ku cikolo ca Lamba, nganda yavo yakama, co vimyene vaje vezile mukuvakwasa valikwalalekele mushandangala yangoco.

¹⁰ Omo Yowave wamwene ngeci vitozi vakamulwisila kulutwe na kunima, co waangwile mashwalale va nzili mu Isalele, wavakwalalekele ngeci valikenge na vaSilya.

¹¹ Wakundikile mashwalale voshe vaje vasaleleo mu mavoko a ndolome yendi Avishai, ikeye wavakwalalekele ngeci valikenge na vaAmoni.

¹² Co Yowave wendekele kuli Avishai ngwendi, “Nga umona vaSilya valinakunjihyana, co ija wakunjikwase, oloni nga njimona vaAmoni valinakukuhyana, co njiija njakukukwase.

¹³ Kala na nzili nakusimpa! Tulwile na nzili vanu vetu na vinganda vya Njambi yetu. Co cizango ca Shukulu Kalunga cilingiwe.”

¹⁴ Ngecivene, Yowave na vanu vendi vaile nakulwa, co vaSilya vatewele.

¹⁵ Omo vaAmoni vamwene vaSilya valinakutewa, co navo lalo vatewele kutunda kuli Avishai, nakwiluka mu nganda. Asinoni Yowave welukile ku Yelusalema.

¹⁶ Omo vaSilya vamwene ngeci vanavafungulula kuli vaIsalele, co vanenele vimbunga vya nzita vyakutunda ku mafuti a vaSilya mu ngangela ya Ndonga ya Yufuleti, co vavaakele mu mavoko a Shovake, muka-kushika nzita ya Mwene Handandezele wa ku Zova.

¹⁷ Omo Ndaviti wazivileko, wakungulwile mashwalale va Isalele, vajavukile Ndonga ya Yondau, co wavakwalalekele mukulwa na vaSilya. Co vashangumukile kulwa,

¹⁸ vaIsalele vashekele mbunga ya mashwalale va vaSilya. Co Ndaviti na vanu vendi vatsiile vanu 7,000 vaka-kwendesa matemba a vaSilya na mashwalale 40,000 vaka-kwenda asi. Co lalo vatsiile Shovake, muka-kushika mashwalale va vaSilya.

¹⁹ Omo vimyene vaje vapwile vindungo va Handandezele vamwene ngeci vanavafungulula kuli vaIsalele, valikumiiye cikumiiyo ca kwoloka na Ndaviti ngeci vapwe vinzinda vendi. Co kutunda aje vene, vaSilya kuvakele lalo na cizango cakukwasa vaAmoni.