1 Mizimbu 18 - Livulu lya Shukulu Kalunga

Kuhyana kwa mashwalale va Ndaviti

¹ Munima yevi, Mwene Ndaviti walwile na vaFilisitiya lalo, wavafungulwile. Watambwile nganda yavo ya Ngate na membo ayo aje ayizengelekele.

² Co lalo wafungulwile vaMowavi, nakuvapwisa vindungo vendi, co vafwetele lisimu.

³ Co kutunda aje, Ndaviti walwisile lalo Mwene Handandezele wa lifuti lya Silya ku Zova, kuyehi na lifuti lya Hamate, omwo Handandezele wesekele lalo kukala na moko ya lifuti lya ku Ndonga ya Yufuleti.

⁴ Ndaviti wafungulwile matemba a Handandezele 1,000, na vaka-kulonda a tuvalu vakupwa 7,000, na mashwalale vendi vakupwa 20,000. Co wasezele lika tuvalu vakupwamo vakupwa mu matemba 100, co vaje vasaleleo voshe wavatetangele matenga.

⁵ Omo vaSilya va ku Ndamasiku vatumine mbunga ya mashwalale vakakwase Mwene Handandezele, co Ndaviti wavalwisile, watsiileo vanalume 22,000.

⁶ Asinoni ikeye watungile vilombo vya mashwalale mu lifuti lyavo, co vanu vamwo vapwile vindungo vendi, co vafwetele lisimu kuli ikeye. Ngecivene, Shukulu Kalunga wahyanesele Ndaviti kwoshe-ikwoshe kuje kwaile.

⁷ Co Ndaviti wafungulwile vintelo vya ngolinde vije vivambatele vamyata va Handandezele, wavitwalele ku Yelusalema.

⁸ Co lalo wambatele vunengu vwavungi vwa kutunda ku Timbehate na Kune, vinganda vije vyashwanene Handandezele. (Co munima yevi Solomoni wapangesele vunengu vuje kupwa lilonga lyakama lya mema, na vimanda, na vivala vya vunengu vya mu Njuvo ya Shukulu Kalunga.)

⁹ Omo Mwene Toi wa ku Hamate wazivile ngeci Ndaviti nafungulula mashwalale voshe va Handandezele,

¹⁰ co watumine munendi Njolame nakwindwisa Mwene Ndaviti nakumushangazala akuhyana nakufungulula Handandezele, omwo Handandezele walwisile Toi visimbu vyavingi. Co Njolame watwalelele Ndaviti vwana vuje vuvapangesele na ngolinde, na siliva, na vunengu.

¹¹ Co Mwene Ndaviti wavukundikile kuli Shukulu Kalunga mukuvupangesa akulemesa, amo na siliva, na ngolinde ije ku miyati ije yafungulwile, miyati ya vaEndome, na vaMowavi, na vaAmoni, na vaFilisitiya, na vaAmaleke.

¹² Co Avishai, vaina Zeluya, wafungulwile vaEndome mu Cana ca Mwongwa, co watsiile vanu vakupwa 18,000.

¹³ Watungile vilombo vya mashwalale mu Endome mwoshe, co vanu vamwo vapwile vindungo va Ndaviti. Co Shukulu Kalunga wahyanesele Ndaviti kwoshe-ikwoshe kwaile.

¹⁴ Ngecivene, Ndaviti washwanene Isalele yoshe, co walingile mwamuvwa na vushunga kuli vanu vendi.

¹⁵ Yowave ndolome ya Avishai wapwile muka-kushika mashwalale, Njosefati muna Ahilunde ikeye wapwile muka-kusoneka mizimbu,

¹⁶ Zandoke muna Ahituve, na Ahimeleke muna Aviyatale vapwile vaka-kukombelela, co Selaya wapwile muka-kusoneka wa mu mbanja,

¹⁷ co Mbenaya muna Yehoyanda wapwile mukulunu wa vaka-kunyunga Ndaviti, co vana va Mwene Ndaviti vakele na vitumbamo vyakama mu vipangi vya Ndaviti.