1 Mizimbu 17 - Livulu lya Shukulu Kalunga

Lijwi lya Natane kuli Ndaviti

¹ Mwene Ndaviti wakele mu lipela lyendi. Co litangwa limo wasanene Natane muka-kwimanena na kwendeka kuli ikeye ngwendi, “Kenga, ololo yange njili mu njuvo yakutunga na Kendale, oloni Cikasa ca Cikumiiyo ca Shukulu Kalunga cili mu mbalaka!”

² Co Natane wamukumbulwile ngwendi, “Linga vyoshe viwushaka kulinga, omwo Njambi ali amo nove.”

³ Oloni ku vutsiki vuje vene, Njambi wendekele kuli Natane ngwendi,

⁴ “Ya ukaleke ngamba yange Ndaviti ngwove, Shukulu Kalunga nendeka ngwendi, ‘Kesi yove ukanjitungila njuvo ngeci njikalemo embwe.

⁵ Kutunda a simbu ije omo njapatwile vanu va Isalele ku Ingito kweta na lelo lino, nalumo lwai njinakala mu njuvo, oloni njinakala lika mu vimbalaka, co njinakala na kununguluka kutunda ku mwela umo na kuya ku mwela ukwavo.

⁶ Mu mitambela mwoshe munjinende na vanu va Isalele nalumo lwai njehwile umo wa vantwama va miyati ya Isalele vaje njaangwile kunyunga vanu vange ngwange omwo vikajo kumwanjitungilile njuvo yakutunga na kendale.’ ”

⁷ “Ngecivene, leka ngamba yange Ndaviti ngwove, yange Kalunga Muka-nzili yoshe, njendeka kuli ikeye ngwange, ‘Njakutundisile mukulisa vimanga mu shwata, co njakupwisile muka-kushwana vanu vange va Isalele.

⁸ Njakele amo nove kwoshe kuje kuwaile, co njafungulwile vitozi vove voshe ngwe omo wakele nakuya kulutwe. Co njikakutsimanesa kupwa ngwe vantwama vakama va mu kaye.

⁹ Njinaangwila vanu vange va Isalele mutambela, co njinavaakamo, muje mukemwo muvakakala, naumo wai akavayandesa lalo. Anga vakovelelele mu lifuti lino, vanakala nakuvalwisa kuli vaka-muuka, oloni eci kucikasholoka lalo.

¹⁰ Njikukulaesa kufungulula vitozi vove voshe nakukwana vatekulwila.

¹¹ Omo ukatsa nakukutsinda na vakukulwila vove, co njikapwisa umo wa ali vana vove mwene, njikakolesa vumwene vwendi.

¹² Ikeye akanjitungila njuvo, co njikakolesa litanda lya vumwene vwendi ku myaka yoshe.

¹³ Co yange njikapwa nji ishe, na ikeye lalo akapwa munange. Co kunjikatundisa livoko lyange kuli ikeye ngwe munjalingile kuli Saulu, uje injatundisile ngeci yove upwe u mwene.

¹⁴ Njikamwaka kupwa umo wakushika vanu vange, na vumwene vwange ku myaka yoshe. Co vumwene vwendi vukakala simbu yoshe.’ ”

¹⁵ Ngecivene, Natane walekele Ndaviti vyuma vyoshe vije Njambi wavijombolwele kuli ikeye.

Lilombelo lya Ndaviti lya cikandelela

¹⁶ Asinoni Mwene Ndaviti wakovelele mu Mbalaka Mwakuliwanena, watumbamene asi, co walombelele ngwendi, “Yange iyajo Shukulu Kalunga Njambi, na naanga yange ikeyo ikajo, ngeci unjilingile vyoshe evi?

¹⁷ Nameme ngoco na anga ucili nakuwezelelako lalo, unanjikulaesa cikulaeso ca vatekulwila ku myaka ya kulutwe, co yove, Shukulu Kalunga Njambi, lajoko unanjipwisa munu wakama manene.

¹⁸ Vikajo lalo njasa kwendeka kuli yove! Yove unjizivuka, co yove lalo wanjisingimika, yange ngamba yove.

¹⁹ Capwile cizango cove na vutumbe vwove kulinga evi kuli yange, nakunjimwesa vikulaeso vyove evi vyakama.

²⁰ Shukulu Kalunga kukwesi lalo weka wakufwa ngwe yove, simbu yoshe twazivuka ngeci yove lika wapwa u Njambi.

²¹ Kukwesi muyati weka lalo ano asi wakufwa ngwe Isalele, uje uwapatwile mu vunzinda nakuvapwisa vanu vove. Vyuma vije vyakama na vyakukomokesa vije viwavalingilile vinashandola lutsimo lwove mu kaye mwoshe. Wapatwile vanu vove mu Ingito nakusheka miyati yeka omo vanu vove vakele nakuya kulutwe.

²² Unalingisa vaIsalele kupwa vanu vove ku myaka yoshe, co yove Shukulu Kalunga, unapu Njambi yavo.

²³ “Co ololo, Shukulu Kalunga, simbu yoshe shulisa cikulaeso ciwakulaesele yange ngamba yove na vatekulwila vange, linga vije viwatumbwile kulinga.

²⁴ Lizina lyove likapwa lyakama, co vanu simbu yoshe vakendeka ngwavo, ‘Shukulu Kalunga Muka-nzili yoshe ikeye Njambi ya Isalele!’ Co ukanyunga vumwene vwange simbu yoshe.

²⁵ Njinasimpi akulombela lilombelo eli kuli yove, Njambi yange, omwo unasholola vyoshe evi kuli yange ngamba yove, co unanjileka ngeci ukapwisa vatekulwila vange vimyene.

²⁶ Yove Shukulu Kalunga, unapu u Njambi, co unalingi cikulaeso cakukomokesa kuli yange.

²⁷ Ngecivene, njikulomba uvezikise vatekulwila va ngamba yove, ngeci vayoye simbu yoshe ku mesho ove. Yove Shukulu Kalunga, unavavezikisa, co vivezikiso vyove vikakala ali vakevo simbu yoshe.”