1 Mizimbu 16 - Livulu lya Shukulu Kalunga

¹ Co vatwalele Cikasa ca Cikumiiyo mu mbalaka ije yatungile Ndaviti, co vacakele mukati. Asinoni vakombelelele vin̄ombelo, na milambu ya kulitombola kuli Njambi.

² Omo Ndaviti wamanesele kukombelela vin̄ombelo, co wavezikisile vanu mu lizina lya Shukulu Kalunga,

³ waanene vanu voshe vyakulya. Co waanene munu na munu munalume na munakazi mu Isalele mukasha wa likende, na cipuka ca situ yakwoca, na likasha-kasha lya vinyu vyakuma.

⁴ Co Ndaviti wemikile vaLevi vamo mukutwamenena kulemesa Shukulu Kalunga, Njambi ya Isalele, kulutwe lwa Cikasa ca Cikumiiyo, mukumwimbila nakumushangazala.

⁵ Co Asafe vamwimikile kupwa ntwama, co Zekaliya wapwile mwato wendi. Njeyele, na Shemilamote, na Njehiyele, na Matitiya, na Elyave, na Mbenaya, na Ovende Endome, na Njeyele vakevo vapwile vaka-kwimba tulyalya. Co Asafe ikeye wapwile muka-kwimba vingenjo,

⁶ na vaka-kukombelela vavali, Mbenaya, na Njazele, vapwile vaka-kwimba malupembo simbu yoshe kulutwe lwa Cikasa ca Cikumiiyo.

⁷ Lije likelyo lyapwile litangwa lyakulivanga Ndaviti kwana moko Asafe na vaLevi yakwimba nakushangazala Shukulu Kalunga.

Mwaso wakushangazala

⁸ Kandeleleni kuli Shukulu Kalunga, ambululeni vukama vwendi, tsimaneseni vilinga vyendi akati ka vanu.

⁹ Shangazaleni Shukulu Kalunga, ambululeni vyuma vyoshe vyakukomokesa vije vyanalingi.

¹⁰ Vwaeleleni nakulemesa lizina lyendi lyakujela, voshe vaje vaka-kumulemesa vajolele.

¹¹ Kulaeleni kuli Shukulu Kalunga na nzili yendi, mulemeseni simbu yoshe.

¹² Yeni vatekulwila va Yakomba, ngamba ya Njambi, vatekulwila va Isalele, vaje vaangwile Njambi,

¹³ anukeni vizivukiso vije vyalingile Njambi, na visompeselo vije vyaanene.

¹⁴ Shukulu Kalunga ikeye Njambi yetu, akanene vushunga kwoshe-ikwoshe ano a kaye.

¹⁵ Kesi mwivale cikumiiyo ca Njambi, cije calingile ngeci cikale ku myaka yoshe.

¹⁶ Cikumiiyo cije calingile na Avilahama, na cikulaeso cije calingile kuli Isake.

¹⁷ Shukulu Kalunga walikumiiye cikumiiyo na Yakomba, cije ca ku myaka yoshe.

¹⁸ Ikeye wendekele ngwendi, “Njikakwana lifuti lya Kanana, likelyo likapwa vushwana vwove.”

¹⁹ Vanu va Njambi vapwile vavandondo lika akuvalava, co vakevo vapwile vangenzi mu lifuti lya Kanana.

²⁰ Vakele nakwendangana mu lifuti na lifuti, kutunda ku vumwene vumo nakweta ku vumwene vukwavo.

²¹ Oloni Njambi katavesele umo ngeci avayandese, co wanangwile vimyene ngeci vavanyunge.

²² Wendekele kuli vakevo ngwendi, “Kesi muvulumune vangamba vange vakwangula, co kesi muvulumune vaka-kwimanena vange.”

²³ Imbileni Shukulu Kalunga, yeni vaka-kaye voshe! A litangwa na litangwa ambululeni kwamena kwendi.

²⁴ Ambululeni vumpau vwendi kuli vanu, na vilinga vyendi vyakukomokesa kuli vanu voshe.

²⁵ Shukulu Kalunga wapwa wakama, co vanapande kumushangazala, ikeye lika vanapande kusingimika kuhyana vinjambi voshe.

²⁶ Omwo vinjambi voshe va vanu vapwa tumponya lika, oloni Shukulu Kalunga ikeye watangele melu.

²⁷ Singimikeni nakushangazala Shukulu Kalunga, nzili yendi na vuvwa vwendi vili mu Njuvo yendi yakujela.

²⁸ Yeni vanu voshe va ano asi, shangazaleni Shukulu Kalunga, shangazaleni vumpau vwendi na nzili yendi.

²⁹ Shangazaleni lizina lyendi lya vumpau, neneni milambu, co ijeni mu Njuvo yendi. Yeni vaka-kaye voshe, tsikameni nakulemesa Shukulu Kalunga,

³⁰ co jajeni ku mesho endi! Kaye anga vakemikilile mu mwela wako, kukesi kushwenya embwe.

³¹ Melu ajolele, na asi avwaelele, lekeni vanu voshe ngeci Shukulu Kalunga ikeye Mwene.

³² Mema a kalunga akume na vyoshe vije vilimo, mahya avwaelele ngwe vanu, na vije vyoshe vilinakumenamo!

³³ Co miti ya mu shwata itambeke nakujolela ku mesho a Shukulu Kalunga, omwo aija nakusompa vanu voshe vali ano asi.

³⁴ Kandeleleni kuli Shukulu Kalunga, omwo ikeye wapwa wamuvwa, omwo cizemo cendi cije kucesi kutenguluka cakala ku myaka yoshe.

³⁵ Endekeni kuli ikeye ngweni, “Twamene yove Njambi Muyoyesi wetu, tukungulwile amo, twamene ku miyati, ngeci tukukandelele nakushangazala lizina lyove lyakujela.”

³⁶ Shangazaleni Shukulu Kalunga, Njambi wa Isalele. Mushangazaleni ololo na ku myaka yoshe! Asinoni vanu voshe vendekele ngwavo, “Ewa.” Co valemesele Shukulu Kalunga.

Kulemesa ku Yelusalema na ku Ngimbiyone

³⁷ Mwene Ndaviti waakele Asafe na vavushoko vwendi vaLevi kupwa vaka-kupanga vipangi vyakulemesa simbu yoshe ku mwela kuje kuvanyungilile Cikasa ca Cikumiiyo. Co vapangele vipangi vyavo kuje a litangwa na litangwa.

³⁸ Co Ovende Endome muna Njendutune na vanalume makumi atanu na limo va ku cikota cendi vakele nakuvakwasa. Co Hosa, na Ovende Endome vakele nakunyunga ku vikolo.

³⁹ Zandoke muka-kukombelela na vakwavo vaka-kukombelela, vakevo vakele na moko ya a kulemesa Shukulu Kalunga ku Ngimbiyone.

⁴⁰ Co a litangwa na litangwa ku mutondo na ku cingwezi, vakele nakukombelela vin̄ombelo vya kwenyeka vyoshe vyamutunu a mutula, ngwe na vije vivasonekele mu Mashiko aje aanene Shukulu Kalunga kuli Isalele.

⁴¹ Amo navo, kwakele Hemane, na Njendutune, na vakwavo vaje vavaangwilile kwimba nakulemesa Shukulu Kalunga a cizemo cendi cije kucesi kuhwa.

⁴² Hemane, na Njendutune lalo vakele na moko ya malupembo, na vingenjo, na vyakwimbisa vikwavo vije vakele nakwimba omo vembile myaso yakulemesa. Co vanu vaka-cikota ca Njendutune vakele na moko yakunyunga ku vikolo.

⁴³ Co vanu voshe velukile ku membo avo, na Ndaviti lalo welukile kwimbo lyendi kukakala amo na naanga yendi.