1 Mizimbu 15 - Livulu lya Shukulu Kalunga

Cikasa ca Cikumiiyo vacinena ku Yelusalema

¹ Ndaviti watungile vinjuvo vyendi mu Nganda ya Ndaviti. Wavwaesele lalo mwela wa Cikasa ca Cikumiiyo ca Njambi, co wacishimbikilile mbalaka.

² Asinoni Ndaviti wendekele ngwendi, “Naumo wai akambata Cikasa ca Cikumiiyo kuvanga vaLevi, omwo Shukulu Kalunga navaangula vakevo kwambata Cikasa ca Cikumiiyo nakumupangela myaka yoshe.”

³ Ngecivene, Ndaviti wakungulwile vanu va Isalele voshe ku Yelusalema ngeci vanene Cikasa ca Cikumiiyo nakucaka ku mwela uje wacivwaeselele.

⁴ Co Ndaviti wakungulwile vatekulwila va Alone na vatekulwila va vaLevi.

⁵ Co ku cikota ca vaLevi kuli Kohate kwezile Uliyele, uje wapwile mukulunu wa vanu 120 va ku cikota cendi,

⁶ co ku cikota ca Melali, kwezile Asaya mukulunu wa vanu 220,

⁷ co ku cikota ca Ngeleshone, kwezile Njwele mukulunu wa vanu 130,

⁸ co ku cikota ca Elizafane, kwezile Shemaya, mukulunu wa vanu 200,

⁹ co ku cikota ca Hevelone, kwezile Elyele, mukulunu wa vanu 80,

¹⁰ co ku cikota ca Uziyele, kwezile Aminandave, mukulunu wa vanu 112.

¹¹ Co Ndaviti wasanene vaka-kukombelela, Zandoke, na Aviyatale, na vaLevi vatanu na umo mazina avo, Uliyele, na Asaya, na Njwele, na Shemaya, na Elyele, na Aminandave.

¹² Co wendekele kuli vaLevi ngwendi, “Yeni munapu mu vantwama va cikota ca vaLevi. Lijeleseni yeni vavenya nakujelesa lalo vakweni vaLevi, ngeci mukashake Cikasa ca Cikumiiyo ca Shukulu Kalunga Njambi ya Isalele nakucinena ku mwela kuje kunjacivwaesela.

¹³ Omwo yeni kumwacambatele a simbu yakulivanga, co Shukulu Kalunga Njambi yetu watuhisile omwo kutwamulemesele ngwe mutwapandele kulinga.”

¹⁴ Asinoni vaka-kukombelela na vaLevi valijelesele ngeci vakashake Cikasa ca Cikumiiyo ca Shukulu Kalunga Njambi ya Isalele.

¹⁵ Co vaLevi vacambatelele a mikambo a vitsili vyavo, ngwe muje mwashikile Shukulu Kalunga ali Mosesa.

¹⁶ Co Ndaviti washikile vantwama va vaLevi ngwendi, “Anguleni vavushoko vweni vaLevi vaimbe myaso nakwimba myaso yakuvwaelela a tulyalya, na vingenjo.”

¹⁷ Ngecivene, vaLevi vaangwile Hemane muna Njwele, na kavushoko kendi Asafe muna Mbelekiya, na Etane muna Kushaya wa ku cikota ca Melali.

¹⁸ Co vaangwile lalo vandolome vavo ngeci vavakwase mu cipangi eci, mazina avo, Zekaliya, na Njaziyele, na Shemilamote, na Njehiyele, na Uni, na Elyave, na Maseya, na Mbenaya, na Matitiya, na Elifelehu, na Mikeneya, na Ovende Endome, na Njeyele.

¹⁹ Vaka-kwimba vingenjo vya vunengu vapwile Hemane, na Asafe, na Etane.

²⁰ Vaka-kwimba tulyalya twakutendeka manene vapwile, Zekaliya, na Njaziyele, na Shemilamote, na Njehiyele, na Uni, na Elyave, na Maseya, na Mbenaya.

²¹ Vaka-kwimba tulyalya twakutendeka kamandondo vapwile, Matitiya, na Elifelehu, na Mikeneya, na Ovende Endome, na Njeyele, na Azaziya.

²² Kenaniya vamwangwile kupwa muka-kwimbisa vaLevi omwo akusungika kwendi.

²³ Co Mbelekiya, na Elekana, amo na Ovende Endome, na Njehiya, vavaangwile kupwa vaka-kunyunga Cikasa ca Cikumiiyo.

²⁴ Co vaka-kukombelela, Shembaniya, na Njosifate, na Netanela, na Amasai, na Zekaliya, na Mbenaya, na Elyazale, vavaangwile kupwa vaka-kwimba malupembo kulutwe lwa Cikasa ca Cikumiiyo.

Cikasa ca Cikumiiyo vacinena ku Yelusalema

²⁵ Ngecivene, Mwene Ndaviti, na vantwama vaIsalele, na vaka-kushika mashwalale vaile ku njuvo ya Ovende Endome nakukashaka Cikasa ca Cikumiiyo, vavwaelelele manene.

²⁶ Co vakombelelele vingombe vatanu na vavali, na vimanga vatanu na vavali, ngeci Njambi akwase vaLevi vaje vambatele Cikasa ca Cikumiiyo.

²⁷ Ndaviti wazalele cikoveyo cacilaja ca linyu lyalivwa, co vaka-kwimba, na ntwama yavo Kenaniya, na vaLevi vaje vambatele Cikasa ca Cikumiiyo navo lalo vazalele vikoveyo vyavilaja vya linyu. Co Ndaviti lalo wazalele kangamuna ka linyu.

²⁸ Ngecivene, vaIsalele voshe vatwalele Cikasa ca Cikumiiyo ku Yelusalema na tuwelele twakuvwaelela, nakwoya kwa malupembo, na vimbinga, na vingenjo, na myaso ya a tulyalya.

²⁹ Omo Cikasa ca Cikumiiyo cakovelele mu nganda, Mikale, muna Saulu, wakengele anja mu njanena, co wamwene Mwene Ndaviti alinakukina nakujombozoka kusingimika Shukulu Kalunga, co wamushendumwine mu mbunge yendi.