1 Mizimbu 13 - Livulu lya Shukulu Kalunga

Cikasa ca Cikumiiyo vacitundisa ku Kilyate Njealime

¹ Mwene Ndaviti walizivasanene na vakulunu voshe vaka-kushika vanu 1,000 na vaka-kushika vanu 100.

² Co Ndaviti walekele vanu va Isalele voshe ngwendi, “Nga yeni munatava, co lalo nga eci cinapu cizango ca Shukulu Kalunga Njambi yetu, co tutumeni miluwa mu membo kuli vandolome vetu vaje vanasala mu lifuti lyoshe lya Isalele na kuli vaka-kukombelela na kuli vaLevi, ngeci tuvaleke vakukungulukile kuno amo netu.

³ Asinoni twakuye nakukashaka Cikasa ca Cikumiiyo ca Njambi, cije civombwanesele omo Saulu wapwile mwene.”

⁴ Co vanu voshe vavwaelelele a viyongola evi, vatavele kulingamo.

⁵ Ngecivene, Ndaviti wakungulwile vanu va Isalele vaje vatundile mu lifuti mwoshe, kushangumukila ku nginga ya va Ingito ku mbwela kutwala ku Ngila ya ku Hamate ku kunto, vakashake Cikasa ca Cikumiiyo citunde ku Kilyate Njealime vacitwale ku Yelusalema.

⁶ Co Ndaviti na vanu vaile ku nganda ya Mbala, ikeyo Kilyate Njealime, mu lifuti lya Yunda, kukashaka Cikasa ca Cikumiiyo ca Njambi, cije vatumbwile mu lizina lya Shukulu Kalunga Muka-nzili yoshe uje natumbama akamwa ya vakelumbi va mambava.

⁷ Co vatundisile Cikasa ca Cikumiiyo mu njuvo ya Avinandave, vacakele a litemba lyaliha. Co Uza, na Ahiyo vakele nakwendesa lije litemba,

⁸ co Ndaviti na vanu voshe va Isalele vakinine na nzili yavo yoshe nakusingimika Njambi. Vembile myaso na tulyalya, na vingoma, na vingenjo, na malupembo.

⁹ Omo vetele ku lijungwilo lya ku Kindone, vingombe vatanukile, co Uza wolwele livoko lyendi wakwatele ku Cikasa ca Cikumiiyo.

¹⁰ Aje vene Shukulu Kalunga waluvalele na Uza, co wamutsiile omwo wakwatele livoko lyendi ku Cikasa ca Cikumiiyo. Uza watsililile ku messho a Njambi,

¹¹ Ndaviti waluvalele manene omwo Shukulu Kalunga wanyanyamesele Uza. Co kutunda a litangwa lije mutambela uje vautumbwile ngwavo Peleze Uza.

¹² Ngecivene, Ndaviti wakele na lyova lya Njambi, co wendekele ngwendi, “Vati njambata Cikasa ca Cikumiiyo?”

¹³ Ngecivene, Ndaviti kaile naco ku Yelusalema. Oloni wacisezele ku njuvo ya munalume umo lizina lyendi Ovende Endome, wa mu nganda ya Ngate.

¹⁴ Cakele kuje vingonde vitatu, co Shukulu Kalunga wavezikisile naanga ya Ovende Endome na vyuma vyoshe vije vyakele navyo.