1 Mizimbu 12 - Livulu lya Shukulu Kalunga

Vaka-kukava Ndaviti vakulivanga va ku muyati wa Mbenjemani

¹ Ndaviti wakele mu Zikelange, kuje kwaile nakukavanda kutewa Mwene Saulu. Co kuje wakalipandakanene na vanu vavangi vaka-mana, mashwalale va nzili vaje vamukwasele kulwa nzita,

² vapwile vanu va ku muyati wa Mbenjemani, kuje kwakundamene Saulu. Vakevo vazivukile kwasha na mikili na mamanya a mu cipapa ca kenya, nambe na livoko lya cilyo nambe lya cimoshwe.

³ Vantwama vavo vapwile Ahiyezele, na Yowashe, vana va Shemaa, wa ku Ngimbeya. Ava vakevo vapwile mashwalale, Njezeyele, na Pelete, vana va Azemavete, na Mbelaka, na Yehu wa ku Anatote,

⁴ na Ishemaya wa ku Ngimbiyone, lishwalale wa lutsimo, co ikeye lalo wapwile umo wa vantwama va vaje “Makumi Atatu.” Njelemiya, na Njazele, na Yohanane, na Yozavande wa ku Ngandela,

⁵ na Eluzai, na Njelimote, na Mbeliya, na Shemaliya, na Shefatiya, wa ku Halife,

⁶ na Elekana, na Isheya, na Azalele, na Njoezele, na Njashombeyame wa ku cikota ca Kola,

⁷ na Njoela, na Zevandiya, vana va Njelohame wa ku Ngendole.

Vaka-kukava Ndaviti va ku muyati wa Ngande

⁸ Awa akewo mazina a mashwalale va lutsimo va mana, va ku muyati wa Ngande vaje valipandakanene mu nzita na mashwalale va Ndaviti omo wakele mu cimpaka mu mambo. Vakevo vazivukile kulwa manene na vintelo, na makunga, co vihanga vyavo vyapwile vya kuluvala ngwe vindumba, co vakele na lumbisi ngwe vishonge va ku munkinda.

⁹ Ezele ikeye wapwile mukulunu, na Ovandiya, na Elyave,

¹⁰ na Mishemana, na Njelemiya,

¹¹ na Atai, na Elyele,

¹² na Yohanane, na Elezavande,

¹³ na Njelemiya, na Makembanai.

¹⁴ Co vamo vanu va ku muyati wa Ngande vapwile vakulunu vaka-kushika mashwalale 1,000, co vakwavo vapwile vakwata ku vakulunu mukushika mashwalale 100.

¹⁵ Co mu ngonde yakulivanga ku mwaka, a simbu ije omo Ndonga ya Yondau yashulile livazi na ku ngenge, co vajavukile, vashandwele vanu vaje vakele mu vyana vya mu ngangela na mu kangombe ka yambi.

Vaka-kukava Ndaviti va ku muyati wa Mbenjemani na Yunda

¹⁶ A simbu imo mbunga ya vanu va ku miyati ya Mbenjemani, na Yunda vaile ku cimpaka kuje kwakele Ndaviti.

¹⁷ Co Ndaviti waile kuli vakevo wendekele navo ngwendi, “Nga munaija kupwa vasamba mukunjikwasa, co njamitambula mwamuvwa, lipandakaneni netu! Oloni nga munaija nakunjenda vungungu kuli vitozi vange ni, nameme yange kunjamivulumwine, Njambi ya vakukulwila vetu akacizivuka, co akamihisa.”

¹⁸ Co Munzinzime wa Njambi wezile ali Amasai, muka-kushika vaje “Makumi Atatu.” Co watambekele ngwendi, “Ndaviti muna Njesi, yetu tunapu tu vanu vove! Tunemana amo nove! Kwoloka, kukale amo nove! Kwoloka kukale kuli vaka-kukukwasa, omo Njambi akakukwasa.” Co Ndaviti wavatambwile, nakuvapwisa vakulunu va nzita yendi.

Vaka-kukava Ndaviti va ku muyati wa Manase

¹⁹ Mashwalale vamo va ku muyati wa Manase vakele kumo na Ndaviti omo waile amo na vaFilisitiya mukulwisa Mwene Saulu. Oloni kakwasele vaFilisitiya embwe, omwo vimyene vavo vakele na lyova ngeci amo akavenda vungungu kuli shukulu yendi walaja Saulu, ngecivene, vamwilwisile ku Zikelange.

²⁰ Ava vakevo mashwalale va ku muyati wa Manase vaje valipandakanene na Ndaviti omo welukile. Mazina avo, Andena, na Yozavande, na Njendiyele, na Mikaele, na Yozavande, na Elihu, na Ziletai. Co muli Manase voshe vakele nakushika vanalume vakupwa 1,000.

²¹ Co vakwasele Ndaviti akupwa vakulunu va nzita yendi, omwo voshe vapwile mashwalale va lutsimo. Co akukotoka vapwile vakulunu va nzita ya va Isalele.

²² A litangwa na litangwa kwakele nakukovela vanu vavaha ku vushwalale vwa Ndaviti, co vwasi-vwasi mashwalale vendi vatumine manene.

²³ Omo Ndaviti wakele ku Hevelone, co mashwalale vavangi vakulilongesa valipandakanene ku nzita yendi mukumukwasa ngeci apwe mwene ainge mu mwela wa Saulu, ngwe muje mwakulaesele Shukulu Kalunga. Ovu vukevwo vungi vwavo.

²⁴ Kuli Yunda kwatundile vanalume 6,800 vakulivwaesela cimweja, vakushwela vintelo na makunga.

²⁵ Kuli Simyoni kwatundile vanalume 7,100 vakulilongesa mwamuvwa.

²⁶ Kuli Levi kwatundile vanalume 4,600.

²⁷ Vaka-kukava Yehoyanda, mutekulwila wa Alone, kwatundile vanalume 3,700.

²⁸ Co vavushoko vwa Zandoke, mukwenje muka-kwasa kulwa kwatundile vanalume 22, vaje vapwile vamyata.

²⁹ Kuli Mbenjemani, (muyati wa Saulu,) kwatundile vanu 3,000, (oloni vungi vwavo vaMbenjemani vakele kuli Saulu.)

³⁰ Kuli Efalime kwatundile vanalume 20,800 vakutsimana mu vikota vyavo.

³¹ Co kuli Manase wa mu kangombe ka yambi kwatundile vanalume 18,000 vaje vavaangwile kuya nakukapwisa Ndaviti mwene.

³² Kuli Isakale kwakele vaje vazivukile myaka, mukuzivuka muvanapande kulinga vaIsalele. Vantwama vavo vapwile 200.

³³ Kuli Zembuloni kwatundile vanu 50,000 va ku vumwene, vakunyanyama vaje valivwaeselele cimweja kulwa, vavalongesele kupangesa miyati yoshe ya vitwa.

³⁴ Kuli Nafetali kwatundile vantwama 1,000, amolika na vanalume 37,000 vakupangesa vintelo na makunga.

³⁵ Kuli Ndani kwatundile vanalume 28,600 vakulilongesa mwamuvwa.

³⁶ Kuli Ashele kwatundile vanalume 40,000 vaje valivwaeselele cimweja kuya ku nzita.

³⁷ Miyati ije yakele mu ngangela ya Yondau, yapwile Luvena, na Ngande, na Manase wa mu ngangela kukekwo kwatundile vanalume 120,000 vaje vavalongesele kupangesa miyati yoshe ya vitwa.

³⁸ Co mashwalale voshe ava, valivwaeselele cimweja nzita, vaile ku Hevelone, vayongwele kupwisa Ndaviti mwene mu Isalele mwoshe. Co vanu va Isalele voshe valizivasanene mu vutumbe ovu.

³⁹ Co vakele matangwa atatu kuje amo na Ndaviti, co valile nakunwa vije vivavavwaeselele vavushoko vwavo.

⁴⁰ Co vanu vaje valyatele navo kushangumukila ku miyati ya Isakale ya ku kunto, na Zembuloni, na Nafetali, vanenele vyakulya a vimulu, na tumelo, na vimula, na a vingombe vaje vambatele vunga vwa tiliku, na vushuka vwa mikuyu vwakuma, na makasha-kasha a mikolovozi ya vushuka vwa vinyu, na mazi a olive. Co vanenele lalo na vingombe, na vimanga vakutsiya ngeci valye. Vyoshe evi vyalingiwile omwo akuvwaelela kuje kwakele mu lifuti lyoshe.