1 Mizimbu 11 - Livulu lya Shukulu Kalunga

Ndaviti apwa mwene wa mu Isalele na mu Yunda

¹ Asinoni miyati yoshe ya Isalele vaile kuli Ndaviti ku Hevelone nakwendeka kuli ikeye ngwavo, “Yetu tunapu tu vavushoko vwove.

² A simbu ya kunima, nameme omo Saulu wapwile mwene yetu, yove watwamenenene vanu va Isalele mu nzita, co Shukulu Kalunga Njambi yove wakukulaesele ngeci ukatwamenena vanu vendi nakupwa mwene yavo.”

³ Ngecivene, vantwama voshe va Isalele vezile kuli Mwene Ndaviti ku Hevelone. Ngecivene, walikumiiye cikumiiyo cakujela navo, co vamuvwavesele, wapwile mwene wa mu Isalele, ngwe mwavakulaesele Shukulu Kalunga ali Samwele.

⁴ Mwene Ndaviti na vaIsalele voshe vaile nakulwisa nganda ya Yelusalema. A simbu ije yapwile Njevushi, co vaNjevushi, vaje vapwile vavenya lifuti, vakele muje.

⁵ VaNjevushi valekele Ndaviti ngeci kakasa kukovela muje mu nganda, oloni Ndaviti wafungulwile cimpaka cavo ca Siyone, vacitumbwile ngwavo, “Nganda ya Ndaviti.”

⁶ Co Ndaviti wendekele ngwendi, “Munu uje akalivanga kutsiya kaNjevushi akapwa muka-kushika nzita!” Co Yowave, muna Zeluya, ikeye watwamenenene nzita, co wapwile muka-kushika nzita.

⁷ Co Ndaviti waile nakukakala mu cimpaka cakukola, ngecivene, vacitumbwile “Nganda ya Ndaviti.”

⁸ Co ikeye watungulwile nganda kushangumukila ku mwela uje vofwelele livu ku mutambela wa mu ngangela ku lilundu, co Yowave watungulwile nganda kuje kwoshe kwasalele.

⁹ Co nzili ya Ndaviti yatwaleleo ku simbu na simbu, omwo Shukulu Kalunga Muka-nzili yoshe wakele amo nendi.

Mashwalale va Ndaviti va lutsimo

¹⁰ Awa akewo mazina a mashwalale va Ndaviti va lutsimo. Amolika na vungi vwa vanu va Isalele, vakevo vamukwasele apwe mwene, ngwe mwakulaesele Shukulu Kalunga, co vakolesele vumwene vwendi.

¹¹ Wakulivanga wapwile Njashombeyame wa ku cikota ca Hakemone, ntwama ya vaje “Vanu Vatatu.” Ikeye walwisile vanalume 300 na likunga lyendi, co voshe wavatsiile mu nzita ije.

¹² Co wakwatako akati ka vaje vaka-lutsimo “Vatatu” wapwile Elyazale muna Ndondo wa ku cikota ca Aho.

¹³ Ikeye wakele amo na Ndaviti kulwisa vaFilisitiya ku nzita ya ku Pase Ndamime. Ikeye wakele mu lihya lya mbale ya maumwa omo vaIsalele vashangumukile kutewa,

¹⁴ ngecivene, ikeye na vanu vendi vemanene mukati ka lihya, valwile na vaFilisitiya. Co Shukulu Kalunga wamuhyanesele na nzili ya kama.

¹⁵ Litangwa limo vantwama vatatu va vaje mashwalale makumi atatu vaile ku limanya kuje kwakele Ndaviti kuyehi na linzenzengoma lya ku Andulame, a simbu ije mbunga ya vaFilisitiya vakele nakutunga cilombo cavo mu Cana ca Lefaime.

¹⁶ A simbu ije Ndaviti wakele mu cimpaka ca a lilundu, co mbunga imo ya vaFilisitiya vakele mu Mbetelehema.

¹⁷ Ndaviti wakele na mangunge akwiluka kwimbo, co wendekele ngwendi, “Tawe, nga na munu wakunjiilako akanjishakeleko mema akunwa a mu lisima lya kuyehi na cikolo ca ku Mbetelehema!”

¹⁸ Co vaje mashwalale va lutsimo vatatu valicikininine kwita mukati ka cilombo ca vaFilisitiya, kuya nakutekula mema mu lisima, co vawanenele kuli Ndaviti. Oloni kaanwile, waetilile kuwapwisa ngwe n̄ombelo kuli Shukulu Kalunga,

¹⁹ co wendekele ngwendi, “Yange kunjasa kuwanwa! Cipwa ngwe njilinakunwa maninga ava vanu valambwile myonyo yavo!” Ngecivene, wavyanene kuwanwa. Evi vikevyo vyapwile vilinga vyakwamuka vya mashwalale vaje vatatu vakutsimana.

²⁰ Co Avishai ndolome ya Yowave wapwile ntwama ya mashwalale “Makumi Atatu va Lutsimo.” Ikeye walwile na vanalume 300 na likunga lyendi, co wavatsiile, watsimanene akati ka vaje “Makumi Atatu.”

²¹ Watsimanene manene kuli vaje “Makumi Atatu”, co wapwile ntwama yavo, oloni ikeye katsimanene ngwe vaje “Vatatu.”

²² Mbenaya muna Yehoyanda wa ku Kambizele wapwile lishwalale mukwavo wa lutsimo, walingile vilinga vyavingi vya nzili, watsile vaMowavi vavali vakele na nzili. A litangwa lya mema akukonda washelumukile mu mbulu, wakatsiilemo ndumba.

²³ Co lalo watsiile munalume umo wa kaIngito, munalume wa kutunuka uje watuvakanene mamita avali mu vulaja vwendi, co wakele na likunga lya muyunda mu livoko lyendi. Co Mbenaya wamulwisile na mulamu wendi, wanyangwile likunga mu livoko lya kaIngito, wamutsiisilevyo.

²⁴ Evi vikevyo vilinga vyakwamuka vya Mbenaya, ikeye wapwile umo wa ali vaje “Makumi Atatu!”

²⁵ Ikeye watsimanene akati ka vaje “Makumi Atatu.” Oloni kakele na lutsimo ngwe vaje “Vatatu” embwe. Co Ndaviti wamupwisile mukulunu wa vaka-kumunyunga.

²⁶ Awa akewo mazina a mashwalale vakwavo va lutsimo. Ashahele, ndolome ya Yowave, na Elehanane muna Ndondo wa ku Mbetelehema,

²⁷ na Shamote wa ku Halonde, na Heleze wa ku Petele,

²⁸ na Ila muna Ikesha wa ku Tekowa, na Aviyezele wa ku Anatote,

²⁹ na Simbekai wa ku Husha, na Ilai wa ku Aho,

³⁰ na Mahalai wa ku Netofate, na Helende muna Mbana wa ku Netofate,

³¹ Itai muna Limbai wa ku Ngimbeya mu lifuti lya Mbenjemani, na Mbenaya wa ku Pilatone,

³² Hulai wa mu vyana vya kuyehi na Ngasha, na Aviyele wa ku Alamba,

³³ na Azemavete wa ku Mbahulime, na Elyahamba wa ku Shalembone,

³⁴ na Hasheme wa ku Ngizone, na Yonatana muna Shangee wa ku Halale,

³⁵ na Ahiyame muna Sakale wa ku Halale, na Elifale muna Ule,

³⁶ na Hefele wa ku Mekela, na Ahiya wa ku Pelone,

³⁷ na Hezelo wa ku Kalemele, na Nalai muna Ezevai,

³⁸ na Njwele ndolome ya Natane, na Mimbehale muna Hangeli,

³⁹ na Zeleke wa ku Amoni, na Nahalai wa ku Mbelote muka-kwambata ntelo ya Yowave,

⁴⁰ na Ila na Ngalembe va ku Njatile,

⁴¹ na Uliya kaHiti, na Zavande muna Ahelai,

⁴² na Andina muna Shiza, (ntwama wa muyati wa Luvena na munga yendi ya mashwalale makumi atatu,)

⁴³ na Hanane muna Maka, na Njosifate wa ku Mitane,

⁴⁴ na Uziya wa ku Ashetela, na Shama, na Njeyele, vana va Hotame, va ku Aloele,

⁴⁵ na Njendiyele na Njoha, vana va Shimeli, va ku Tize,

⁴⁶ na Elyele wa ku Mahave, na Njelivai, na Njoshaviya, vana va Elename, na Itema wa ku Mowavi,

⁴⁷ na Elyele, na Ovende, na Njasiyele va ku Zova.