1 Kolinte 9 - Livulu lya Shukulu Kalunga

Moko na vipangi vya muluwa

¹ Kuma kesi nji munu wakupatuka ndi? Kuma kesi nji muluwa ndi? Kuma kunjamwene Yesu Mwene yetu ndi? Kuma yeni kesi munapu vipangi vyange muli Mwene ndi?

² Nameme nga kuli veka kuvanjitambwile ngwe nji muluwa, oloni yeni munanjitambula! Omwo a myonyo yeni amo na Mwene yeni vavenya munapu vakaleo ngeci yange njinapu nji muluwa.

³ Omo vanu vanjiyeluwisa, omu mukemwo munjikalyamena yange vavenya.

⁴ Kuma kunjesi na moko yakunjana kulya nakunwa a vipangi vyange ndi?

⁵ Kuma kunjesi na moko yakulinga vije vivalinakulinga vakwetu miluwa na vandolome va Mwene na Petulu kuya amo na munakazi wa muka-Yesu mu mangenzi ange ndi?

⁶ Nambe Mbanambase nange yetu lika vaje vanapande kupanga vipangi vyakuliyoyesa yetu vavenya ndi?

⁷ Kuma mashwalale vakalifwetela vakevo vavenya mu vipangi vyavo vya vushwalale ndi? Nambe ndimi muka uje kesi kulya ku vushuka vwa mikolovozi ya vinyu vwa mu lihya lyendi? Nambe kanyungi muka uje kesi kunwa mavele a ku vimanga vendi?

⁸ Kunjasa kwimika simbu a vije vya a litangwa na litangwa mukuvipwisa cimweso, omwo Lishiko lyendeka cuma cimo.

⁹ Tulava mu Lishiko lya Mosesa ngwetu, “Kesi mukute ngombe ku kanwa omo alinakujungula vimbuto.” Co ololo, kuma Njambi akayongola a vingombe ndi?

¹⁰ Kuma ikeye katumbwile yetu omo wendekele eci ndi? Mwa vushunga eci vacisonekelele yetu. Omwo uje munu alinakulima na uje alinakuteja vanapande kulinga vipangi vyavo a cinyangavili cakutambula mutambela wa vimbuto vyavo.

¹¹ Nga tunakunu vimbuto vya munzinzime akati keni. Kuma cinapu cakama nga tuteja vwana kuli yeni ndi?

¹² Nga veka vali na moko yakutambula eci kuli yeni, kuma yetu kutwesi na moko yakutuvakana ndi? Oloni kutwapangesele moko yetu. Oloni tunalitakamesa mu vyuma vyoshe kutewa twaka citanukiso mu ngila ya vipangi vya Vin̄anda Vyavivwa vya ali Kilistu.

¹³ Mwa vushunga mwazivuka ngweni vanu vaje vakapanga mu Njuvo ya Shukulu Kalunga vakawana vyakulya vyavo ku Njuvo ya Shukulu Kalunga, co vaje lalo vakakombelela a mutula vakawana lalo mutambela wavo ku vije vanakombelela ndi.

¹⁴ Mu ngila eyi vene, Mwene nashiki ngeci vaje valinakwambulula muzimbu wauvwa vanapande kuwana vyakuyoya kwavo kutunda kukwambulula muzimbu wauvwa.

¹⁵ Oloni kunjapangesele moko yange a vyuma evi embwe, nambe kunjesi nakusoneka evi ololo ngeci njilombe kukala na moko eyi. Mwamuvwa nga njinatsile akulivanga! Naumo wai atengulula moko yakulishasha kwange mu majwi amupulungwa!

¹⁶ Omwo kunjesi na moko yakulishasha omwo akwambulula muzimbu wauvwa. A vyoshe evi, njili mwisi ya mashiko akulinga ngacije. Ngongo yange nga kunjambulula muzimbu wauvwa!

¹⁷ Omwo nga njilinga vipangi vyange ngwe akwangula kwange vavenya, nga njasa kutambula fweto, oloni njilinakupanga ngwe vipangi vyange vije vinanjipande, omwo Njambi nanjikundika cipangi eci.

¹⁸ Ngecivene, fweto mukajo njiwana? Inapu vwana vwakwambulula Vin̄anda Vyavivwa kujeneka kutambula fweto, kujeneka kwendeka a moko yange ya vipangi vyange vyakwambulula muzimbu wauvwa.

¹⁹ Omwo nameme njinapu munu wakupatuka, kunjapwile nji ndungo ya munu naumo wai, oloni njalipwisa yange vavenya ndungo ya voshe ngeci njiwane vanu vavangi nga citava.

²⁰ Omo njipanga na vaYunda, njiyoya ngwe kaYunda vene ngeci njivawane, nambe yange vavenya kunjakundamene ku Lishiko lya Mosesa, njiyoya ngwe munjayoyele omo njakele nakupanga na vaje vakundamene ku Lishiko lya Mosesa, ngeci njivawane.

²¹ Mu ngila eyi vene, omo njipanga na vaje kesi vaYunda, njiyoya ngwe uje kesi kaYunda anja ya Lishiko lya vaYunda ngeci njikoke vaje kesi vaYunda. Eci kucalumbunukile ngeci kunjapandele kwononoka lishiko lya Njambi embwe, oloni, mwa vushunga vene, yange njili mwisi ya lishiko lya Kilistu.

²² Akati ka vaje vanazeye mukukulaela kwavo nange lalo njipwa ngwe umo wavo mu kuzeya, ngeci njivawane. Ngecivene, njilipwisa umo mu vyoshe kuli vanu voshe, ngeci njovoleko vamo nga citava kulingamo.

²³ Njilinga evi vyoshe omwo muzimbu wauvwa, ngeci tuwanenemo vivezikiso muli ukewo.

²⁴ Mwa vushunga mwazivuka ngweni mu vweho vwa vaka-kushatuka, vaka-kushatuka voshe vashatuka amo, oloni umolika wavo ikeye atambula fweto. Ngecivene, shatukeni, mu ngila eyi vene ngeci mutambule fweto.

²⁵ Munu woshe mu vyakweha alilongesa kulyononwesa, alinga ngacije ngeci atambule cilongo cije casa kuvola, oloni yetu tulinakulinga eci ngeci tukatambule cilongo cije cikakala simbu yoshe.

²⁶ Omu mukemwo njilinakushatuka nakushungamesa ku mamaneselelo, omu mukemwo munjinafu ngwe muka-kulwa na vin̄ome uje kesi kupupa ngoco mu lihunzi.

²⁷ Oloni Njilinakukolesa muvila wange na vin̄ombe nakuwononwesa, kutewa omo njinasana veka ku vweho, co yange vakanjivyane.