1 Kolinte 8 - Livulu lya Shukulu Kalunga

Vihula a vyakulya vyakukombelela ku tumponya

¹ Ololo, a vyuma vyakukombelela ku tumponya vije vimwasonekele. Mwa vushunga, twazivuka ngeci, “tuvavoshe tuli na mana.”. Mana akalingisa munu ngeci alyalese, oloni cizemo citungisa.

² Vaje vayongola ngwavo vazivuka cuma cimo, oloni kuvacizivuka ngwe muvanapande kucizivukilamo.

³ Oloni nga munu azema Njambi nendi vanamuzivuka kuli Njambi.

⁴ Ngecivene, a vyakulya vyakukombelela ku tumponya, twazivuka ngwetu kamponya, co twazivuka lika ngwetu kwali Njambi umolika.

⁵ Nameme nga kuvali vaje vavakatumbula ngwavo“vinjambi”, nambe mwilu nambe ano asi, co nambe kuvali “vinjambi” vavangi vangacije na “vashukulu”,

⁶ oloni kuli yetu kwali Njambi umolika, Tatetu, ikeye Ishamatanga wa vyuma vyoshe, muli ikeye mukemwo mutuli nakuyoyela, co kuli Mwene umolika, Yesu Kilistu, muli ikeye vyuma vyoshe vavitangele, co muli ikeye mukemwo mutuli nakuyoyela.

⁷ Oloni kesi ngwe vanu voshe vali na mana awa. Oloni vamo vanezilila tumponya nalelo lino omo valya vyakulya vyangacije vakayongola ngwe vyakundama ku kamponya, citaku-taku cavo cinazeye, co vayongola ngwe valinakulijwalesa omo valya vyakulya vyangacije.

⁸ Nameme ngoco, vyakulya kuvyasa kutuvwaesa ku mesho a Njambi, nacimo cai citukwasa nambe kutuli, co nacimo cai tuwanao nambe tulya.

⁹ Oloni nyanyameni kutewa moko yeni ikapwa cimbundi cakutanukisa vaje vanazeye mukukukulaela ngeci vawile mu vuvi.

¹⁰ Omwo nga munu umo uje citaku-taku cendi cinazeye amona yove uli na “mana,” unatumbama mu kazangu ka tumponya ulinakulya, kuma mbunge yendi isimpa kulya vyakulya vyakukombelela ku tumponya ndi?

¹¹ Co munu ou wakuzeya, mukweni uje Kilistu wamutsililile, akanyonga omwo “mana ove”!

¹² Co mu ngila eyi vene, ulinakulinga vuvi kuli Kilistu akulinga vuvi ku vakweni vaka-Yesu nakuvulumuna citaku-taku cavo cakuzeya.

¹³ Ngecivene, nga vyakulya vilingisa mukwetu ngeci alinge vuvi, co kunjikali situ lalo, kutewa njilingisa mukwetu kuwila mu vuvi.