1 Kolinte 3 - Livulu lya Shukulu Kalunga

Vangamba va Njambi

¹ Oloni vakwetu, kunjasele kwendeka neni ngwe njendeka kuli vanu vaje vali na Munzinzime, njendekele kuli yeni ngwe mu vaka-kaye, ngwe vanike vaje kanda vakole mu vuYesu.

² Njamilisile na mavele, kesi ngwe na vyakulya vyakukola, omwo te kanda mwete a simbu yakuvilya. Co nambe vene ololo kanda mucipweo kuvilya,

³ omwo mucili nakuyoya ngwe vaka-kaye kano. Omwo akati keni ali lifuwa, co mulinakulizunga umo na mukwavo, kuma eci kucimwesa ngeci munapu vaka-kaye kano nakuyoya ngwe ku futisi ya kaye ndi?

⁴ Omwo umo endeka ngwendi, “Yange nji muka-Paulu,” weka lalo ngwendi, “Yange nji muka-Apolo” kuma kumwalifwile ngwe muvakalingi vanu va ano a kaye ndi?

⁵ Apolo ikeye iya? Co Paulu ikeye iya? Tunapu vangamba va Njambi, ali yetu vene yeni mwakulaelele. Yetu tulinakupanga vipangi vije vyatwanene Mwene ngeci tuvilinge,

⁶ yange njakunine mbuto, Apolo watukumwinine, oloni Njambi ikeye wakulisile mbuto.

⁷ Ngecivene, uje akuna nambe uje atukumwina kuvesi na vulemu vwai. Oloni vulemu vuli kuli Njambi, omwo ikeye muka-kumenesa mbuto.

⁸ Kukwesi lyangununo akati ka uje akuna na uje atukumwina, Njambi akaana cikandelela ku munu na munu ngwe ku vipangi vyendi vyanalingi.

⁹ Omwo tulinakupangela amo kuli Njambi, co yeni munapu lihya lya Njambi. Co lalo munapu kutunga kwa Njambi.

¹⁰ Akupangesa vwana vuje vwanjanene Njambi, njalingile vipangi vya muka-kutunga wa vutongwe nakujala luvula, co munu weka lalo alinakutungilao. Oloni munu na munu napande kunyanyama omo alinakutungila a luvula luje.

¹¹ Omwo Njambi naaka laja Yesu Kilistu kupwa luvula lumo, co kukwesi lalo luvula lweka vasa kujala lwai.

¹² Vamo vapangesa ngolinde nambe siliva nambe mamanya a seo yakama mukutungila a luvula luje, vamoco vapangesa mavaya nambe mwila nambe vishati.

¹³ Co vipangi vya munu na munu vikasholoka a Litangwa lya Kilistu lije likavisholola. Omwo a Litangwa omwo vakavimwesa lije tuhya tukasholola vipangi vya munu na munu, tuhya tukavyeseka nakusholola seo yavyo.

¹⁴ Nga vipangi vije vyanatungila munu a luvula vikasholoka mwamuvwa ku tuhya, co muka-kutunga akatambula cikandelela.

¹⁵ Oloni nga vipangi vyove vikenya, co nacimo cai ukatambula, oloni yove vavenya ni ukovoka, ngwe unaputumuka mu tuhya.

¹⁶ Mwa vushunga mwazivuka ngeci munapu Njuvo ya Shukulu Kalunga na Munzinzime wa Njambi alinakuyoya muli yeni!

¹⁷ Nga umo anyongesa Njuvo ya Shukulu Kalunga, nendi Njambi akamunyongesa. Omwo Njuvo ya Shukulu Kalunga yapwa yakujela, co yeni lalo munapu Njuvo ya Shukulu Kalunga.

¹⁸ Kesi ulikwise yove vavenya. Nga umo akati keni aliyongola ngwendi ali na mana a ano a kaye, co pwa cilema, ngeci ukale na mana.

¹⁹ Omwo vije vayongola vaka-kaye ngwavo vinapu vya mana, ku mesho a Njambi vinapu vya vulema. Ngwe muvyendeka visoneka ngwavyo, “Njambi akakwata vaka-mana mukunyanyama kwavo”,

²⁰ co lalo visoneka vikwavo vyendeka ngwavyo, “Shukulu Kalunga azivuka ngeci viyongola vya vaka-mana vinapu vyangoco.”

²¹ Ngecivene, naumo wai alishashe a vije vivalinga vanu. Omwo vyuma vyoshe vinapu vyeni,

²² nambe Paulu nambe Apolo nambe Petulu nambe kaye kano nambe mwonyo nambe kutsa nambe vyuma evi viliko nambe vije vikaija kulutwe, vyoshe evi vinapu vyeni,

²³ co yeni munakundama kuli Kilistu, co Kilistu nakundama kuli Njambi.