1 Kolinte 2 - Livulu lya Shukulu Kalunga

Lijwi ali Kilistu wakushukika

¹ Omo njezile kuli yeni, vasamba vange, nakwambulula vushunga vwa Njambi vwakushweka kunjapangesele majwi akama, nambe kumwesa kulilongesa kwange kwakama.

² Omwo simbu njakele neni, njevalele vyuma vyoshe kuvanga Yesu Kilistu, co manene kutsa kwendi a cilindakano.

³ Ngecivene, omo njezile kuli yeni, njazeyele nakujaja na lyova,

⁴ co kulongesa kwange na muzimbu wange kuvyakele njavyanene na majwi a vutongwe a mana a vanu, oloni na cizivukiso ca nzili ya Munzinzime wa Njambi.

⁵ Ngecivene, kukulaela kweni kesi kukundame ku mana a vanu oloni a nzili ya Njambi.

Mana a Njambi

⁶ Oloni njambulula muzimbu wa mana kuli vaje vanakolo mu munzinzime. Oloni kesi mana aje anakundama muno mu kaye nambe ku vaka-kushwana va kaye kano, vaka-kushwana vaje nzili yavo ilinakuvatunda.

⁷ Mana awa njambulula anapu mana a Njambi akushweka, aje vanashwekesela vanu, oloni Njambi waangwile laja ku vumpau vwetu simbu kanda vatange kaye.

⁸ Naumo wai muka-kushwana wa ano a kaye wazivukile mana awa. Nga vawazivukile, nga kuvashukikile Mwene wa vumpau.

⁹ Nameme ngoco, ngwe muvyendeka visoneka ngwavyo, “Vije naumo wai wavimwene nambe kuviziva, vije naumo wai waviyongwele ngeci vikalingiwa, vikevyo vyuuma vije vyavwaeselele Njambi vaje vamuzema.”

¹⁰ Oloni Njambi natusholwela vyakushwekesa ali Munzinzime wendi. Munzinzime akashakezeka vyuma vyoshe, nameme vizango vya Njambi vyakulova.

¹¹ Omwo Munzinzime wetu lika uje ali muli yetu ikeye lika azivuka vyetu vyoshe, mu ngila eyi vene, kuvanga Munzinzime wa Njambi ikeye azivuka vyoshe vya ali Njambi.

¹² Kutwatambwile munzinzime wa ano a kaye embwe, oloni tunatambula Munzinzime uje utunda kuli Njambi, ngeci tuzivuke vyoshe vije vyanatwana Njambi.

¹³ Ngecivene, kutwendeka na majwi a vilongesa vya mana a vanu, oloni na majwi aje atulongesa Munzinzime, omo tulumbununa vushunga vwa munzinzime kuli vaje vali na Munzinzime.

¹⁴ Woshe uje kesi na Munzinzime kasa kutambula mavwana aje atunda kuli Munzinzime wa Njambi. Munu wangacije kasa kuwazivisisa, anapu angoco kuli ikeye, omwo seo yawo vanaiseteka na munzinzime.

¹⁵ Woshe uje ali na Munzinzime asa kuseteka seo ya vyuma vyoshe, oloni naumo wai asa kumuhisa.

¹⁶ Ngwe muvyendeka visoneka ngwavyo, “Iyajo azivuka viyongola vya Shukulu Kalunga? Iyajo asa kumunangula?” Yetu nameme ngoco, tuli na viyongola vya Kilistu.