1 Kolinte 15 - Livulu lya Shukulu Kalunga

Kusanguka kwa Kilistu

¹ Co ololo njishaka kumyanukisa, vavusamba vange, a Vin̄anda Vyavivwa vije njambulwile kuli yeni, vije mwatambwile, a vikevyo kukulaela kweni kunemanao mbe.

² Uje ukewo muzimbu, lijwi lije njambulwile kuli yeni. Munovoka a muzimbu nga mukakateyao mbe, kuvanga amo eci munakulaela cinapu cangoco.

³ Njamyanene vije vinjatambwile, vije vinapu vya seo yakama manene, Kilistu watsililile vivi vyetu, ngwe muvanasoneka mu Visoneka

⁴ ngwavo vamutsindile, co munima ya matangwa atatu wasangukilile ku mwonyo, ngwe muvanasoneka mu Visoneka,

⁵ washolokele kuli Petulu, co asinoni kuli vaje miluwa likumi na vavali.

⁶ Asinoni washolokele a simbu imolika kuli vaje vaka-kumukava vakupwa ngwe 500, vamo vavo vacili nakuyoya, nameme vamo vanatsi.

⁷ Asinoni washolokele kuli Yakomba, co munima kuli miluwa voshe.

⁸ Co akukotoka washolokele lalo kuli yange, nambe ngoco njinapu ngwe uje wasemukile omo simbu yendi kanda yete mu vulemu.

⁹ Omwo yange njapwa wakukotokela kuli voshe miluwa, kunjapandelemo mukunjitumbula muluwa, omwo njapakesele cikungulukilo ca Njambi.

¹⁰ Oloni a kutetela kwa Njambi njinapu muje munjinapu, co kutetela kuje wanjanene kucapwile cangoco. Oloni mu ngila ikwavo, njinaundangana manene kutuvakana miluwa voshe, nameme eci kucapwile cipangi cange vavenya, oloni capwile kutetela kwa Njambi cije cakele nakupanga nange.

¹¹ Ngecivene, nambe catundile kuli yange, nambe catundile kuli vakevo, eci cikeco yetu voshe tulinakwambulula, co eci cikeco munakulaela.

Kusanguka kwetu

¹² Ololo, nga lijwi lyetu linapu ngeci Kilistu wasangukile ku vatsi, vati vamo veni vendeka ngwavo vatsi kuvakasangukila ku mwonyo?

¹³ Nga eci cinapu ca vushunga, cinalumbunuka ngeci Kilistu nendi kasangukile ku vatsi,

¹⁴ co nga Kilistu kasangukile ku vatsi, cooni kwambulula kwetu kunapu kwangoco, co yeni kukulaela kweni kunapu kwangoco.

¹⁵ Kutuvakana cuma eci, citumwesa ngeci yetu tuvakaleo va makuli va Njambi, omwo twendekele ngwetu wasangwile Kilistu ku vatsi, oloni nga mwa vushunga vatsi kuvakasangukila ku mwonyo, co Njambi kasangwile Kilistu.

¹⁶ Omwo nga vatsi kuvakasanguka, kuma na Kilistu nendi kasangukile.

¹⁷ Nga Kilistu kasangukile, co kukulaela kweni kunapu kwangoco, co yeni anga munazimbala mu vivi vyeni.

¹⁸ Co lalo cinalumbunuka ngeci vaka-kukulaela kuli Kilistu vaje vanatsi navo vanazimbala.

¹⁹ Nga cinyangavili cetu muli Kilistu cinapu cacivwa a mwonyo ou lika kunau, co kutuvakana vanu voshe ano a kaye cinapande vatuteteleko.

²⁰ Oloni vushunga vwa vyuma evi vunapu ovu, Kilistu vamusangwile ku vatsi, ngwe vemikile ngeci ngwavo vaje vanalala tulo twa kutsa vakavasangula lalo.

²¹ Omwo kutsa kwezile ali munalume umo, mu ngila eyi vene kusanguka ku vatsi cinaija ali munu umo.

²² Omwo vanu voshe vatsa omwo vali amo na Andama, mu ngila eyi vene voshe vakavasangwila ku mwonyo omwo vali amo na Kilistu.

²³ Oloni munu na munu akasangukila na ngila yendi, Kilistu ikeye mushoke wakulivanga ku voshe, asinoni na vaje vanakundama kuli Kilistu, vakasanguka omo akaija.

²⁴ Asinoni kukotoka kukaija, Kilistu akafungulula voshe vaka-kushwana, vaka-moko, na vaka-nzili, co akana Vumwene kuli Ishe Njambi.

²⁵ Omwo Kilistu napande kushika noo Njambi nafungulula vitozi vendi voshe nakuvaka mwisi ya myanja yendi.

²⁶ Citozi wakukotokela yakafungulula ikeye kutsa.

²⁷ Omwo visoneka vyendeka ngwavyo, “Njambi naaka vyuma vyoshe mwisi ya myanja yendi.” Casholoka, mwa vushunga vene, ngeci lijwi eli “vyuma vyoshe” kuvyakumbasaneneko Njambi embwe, omwo Njambi ikeye naaka vyuma vyoshe mwisi ya Kilistu.

²⁸ Oloni omo vyuma vyoshe vanavyaka mwisi yakushwana kwa Kilistu, asinoni Mwana vavenya, akalyaka ikeye vavenya mwisi ya Njambi, uje naaka vyuma vyoshe mwisi yendi, co Njambi akashwana akamwa ya vyoshe.

²⁹ Ngecivene, vikajo vanu valinakuvambwitika ali vavushoko vwavo vaje vatsa laja? Vakevo vanayongola ngwavo vawanao vimo ndi? Nga eci cinapu ca vushunga, ngwe muvali nakwendeka vamo ngwavo vatsi kuvakavasangwila ku mwonyo, omwo vikajo vanu ava valinakuvambwitika ali vavushoko vwavo vaje vatsa laja?

³⁰ Co ali yetu, omwo vika tulinakulyaka mu vushonde yetu vavenya a simbu na simbu?

³¹ Vavusamba vange, njilinakukengelela kutsa a litangwa na litangwa! Kulyalesa kwange muli yeni, mu mwonyo wetu amo na Kilistu Yesu Mwene yetu, cinjilingisa kwambulula evi.

³² Vika njiwanao, nga njendeka vya ku cisemwa ca vanu ngwange njalwile na tusitu muno mu Efeso? Nga cili vatsi kuvasangukila ku mwonyo, co ngwe muvyaya vyendeka ngwavyo, “Tulyeni nakunwa, omwo imene tutsa.”

³³ Kesi vamikwise, “Vwilanyo vwavuvi vuviisa vilinga vyavivwa.”

³⁴ Ilukeni ku vushunga vwa mana eni, co eceleni vingila vyeni vya vuvi. Njendeka evi mukumizivisa shwamwa ngwange vamo veni kuvazivuka Njambi.

Kusanguka kwa muvila

³⁵ Umo ehula ngwendi, “Vatijo vatsi vakasangukila ku mwonyo? Muvila wa cifwa muka vakakala nawo?”

³⁶ Yove cilema! Omo ukakunu mbuto yove mu livu kuyesi kutuuka nonge yayo ya mwonyo kuvanga noo inatsi.

³⁷ Co cije ukakunu mu livu cikeco mbuto yangoco, amo nona ya tiliku, nambe ya muyati weka, kesi ngwe unakunu muvila woshe wa mbuto uje utuuka mu livu.

³⁸ Njambi akana ije mbuto muvila ngwe mwashaka, akana ku mbuto imo na imo muvila wayo.

³⁹ Co situ yoshe ya vyuma vyakuyoya kuyafwile mumo yapwa ya miyati-yati, vanu vakala na situ ya muyati umo, tusitu vakala na situ ya muyati weka, tuzila vakala na situ ya muyati weka, na visi vakala na situ ya muyati weka.

⁴⁰ Co kuli mivila ya melu na mivila ya asi, vuvwa vwa mivila ya melu kuyafwile mumo na vuvwa vwa mivila ya asi.

⁴¹ Litangwa lili na vuvwa vwalyo, co ngonde lalo ili na vuvwa vwayo, co na vingongonosi lalo vili na vuvwa vwavyo, lalo nambe akati ka vingongonosi vili na miyati-yati ya vuvwa vwavyo.

⁴² Eci cikeco cikakalako omo vatsi vakasangukila ku mwonyo. Omo muvila vanautsindi, uvola, omo ukasanguka, ukapwa wakujeneka kuvola.

⁴³ Omo vautsinda, unapu wauvi nakuzeya, omo ukasanguka, ukapwa wauvwa na nzili.

⁴⁴ Omo vautsinda, unapu muvila wa vunu, omo ukasanguka, ukapwa muvila wa munzinzime. Mwa vushunga kuuli muvila wa vunu, co kunapande kukala muvila wa mu munzinzime lalo.

⁴⁵ Omwo visoneka vyendeka ngwavyo, “Munu wakulivanga Andama, vamutangele munu wakuyoya”, oloni Andama wakukotokela ikeye mukakwana mwonyo wa Munzinzime.

⁴⁶ Kesi vya ku munzinzime viija akulivanga, oloni vya ku muvila vilivanga, co asinoni vya ku munzinzime.

⁴⁷ Andama wakulivanga wakutanga ku livu, watundile ku livu, Andama wamucivali watundile mwilu.

⁴⁸ Vaje vanapu va asi vanalifu ngwe uje watundile ku livu, vaje vanapu va mwilu vanalifu ngwe uje watundile mwilu.

⁴⁹ Ngwe omo tuli na cifwa ca uje munalume watundile ku livu, ngecivene, mutukalifwa na cifwa cimo ca uje Munalume watundile mwilu.

⁵⁰ Eci njilumbununa, vavusamba vange, cikeco eci ngwange cije cinatundu ku situ na maninga kucasa kukovela mu Vumwene vwa Njambi, co cije cakuvola kucasa kuswana cije cakujeneka kuvola.

⁵¹ Tolilileni vushunga ovu vwakushwekesa, kutukatsi tuvavoshe, oloni yetu voshe tukemuka,

⁵² vwasi-vwasi, ngwe kukapula kwa lisho, omo lupembo lwakukotoka lukaimba. Omo lupembo lukaimba, co vatsi vakasanguka, kuvakatsi lalo, co yetu voshe tukemuka.

⁵³ Omwo cije cakuvola cinapande kuzala cije cakujeneka kuvola, cije ca kutsa cinapande kuzala cije cakujeneka kutsa.

⁵⁴ Ngecivene, omo eci cikalingiwa, co cije ca kutsa cikazala cije cakujeneka kutsa, asinoni visoneka vikapwa vya vushunga, “Kutsa vanacinyongesa, kuhyana cinaija!”

⁵⁵ “Ove Kutsa, kuhyana kwove cilikulijo? Ove Kutsa, nzili yove yakuvulumuna ilikulijo?”

⁵⁶ Kutsa cilinakutambula nzili yaco ku vuvi, co vuvi vulinakutambula nzili yavwo ku Lishiko.

⁵⁷ Oloni kukandelela kuli Njambi uje alinakutwana kuhyana ali Mwene yetu Yesu Kilistu!

⁵⁸ Ngecivene, vavusamba vange va cizemo, imaneni mbe kujeneka kuwa. Simbu yoshe pangeni na nzili mu vipangi vyeni kuli Mwene, omwo munazivuka ngweni vipangi vyeni mulinakupanga muli Mwene kuvyesi nakuya mwangoco.