1 Kolinte 14 - Livulu lya Shukulu Kalunga

Mavwana a Munzinzime akwavo lalo

¹ Ngecivene, munapande kushakezeka cizemo. Akeni vimbunge vyeni ku mavwana a munzinzime, manene a vwana vwakwambulula lijwi lya Njambi.

² Omwo vaje vendeka mu vindaka vyeka kuvesi nakwendeka kuli vakwavo oloni kuli Njambi, omwo naumo wai avaziva. Vendeka vyuma vyakushweka na nzili ya Munzinzime.

³ Oloni vaje vambulula lijwi lya Njambi vendeka kuli vanu nakuvakwasa nakuvakolesa nakuvazembeleka.

⁴ Vaje vendeka mu vindaka vyeka valinakulikwasa lika vakevo vavenya, oloni vaje vambulula lijwi lya Njambi valinakukwasa cikungulukilo coshe.

⁵ Njishaka ngeci yeni voshe mwendeke mu vindaka vyeka, oloni njishaka nga mwakele na vwana vwakwambulula lijwi lya Njambi. Omwo munu uje ambulula lijwi lya Njambi ali na seo yakama manene kutuvakana uje endeka mu vindaka vyeka, kuvanga kukale uje asa kunungulula vije alinakwendeka, ngeci vikwase cikungulukilo coshe.

⁶ Ngecivene, omo njija kuli yeni, vavusamba vange, cikamikwasa vatijo nga njendeka mu vindaka vyeka? Kucinjikwasa embwe, kuvanga njimisholwele vimo vyakutunda kuli Njambi nambe mana amo nambe vuka-kwimanena nambe vimo vilongesa.

⁷ Yongoleni a vyakwimbisa vimo ngwe mbendo nambe kalyalya, vatijo munu azivuka muyoyo wa vweho vwavyo kujeneka muku wavyo kuutuula mwamuvwa?

⁸ Co nga munu kasa kwimba mwamuvwa lupembo lwakusana, iyajo alivwaesela kulwa nzita?

⁹ Mu ngila eyi vene, iyajo asa kuziva vimwendeka nga lijwi lyeni mwendeka vindaka vyeka kulyalumbunukile mwamuvwa? Omwo majwi eni apekumukila mu lihunzi!

¹⁰ Muno mu kaye muli vindaka vyakuliseza-seza, oloni kukwesi imo yakujeneka muyanungulukila.

¹¹ Oloni nga kunjizivuka ndaka valinakwendeka, vaje valinakuyipangesa vanapu vangenzi kuli yange, co lalo yange nji mungenzi kuli vakevo.

¹² Ngecivene, omo muli na cizango cakushakezeka mavwana a Munzinzime, akamwa ya vyuma vyoshe munapande kweseka manene kupangesa mavwana aje akwasa kutunga cikungulukilo.

¹³ Ngecivene, munu uje endeka mu ndaka yeka, napande kulombela vwana vwakunungulula vika vije vyendeka.

¹⁴ Omwo nga njilombela mu cifwa eci, munzinzime wange alombela, oloni mana ange kuwasa kukwasa mu cuma eci.

¹⁵ Ngecivene, vatijo njilinga? Njilombela na munzinzime wange, oloni njilombela lalo na mana ange, njiimba na munzinzime wange, co njiimba lalo na mana ange.

¹⁶ Omo mukandelela kuli Njambi mu munzinzime lika, vati vanu vaje vali neni mu cikungulukilo vendeka ngwavo, “Ewa” ku lilombelo lyeni lyakukandelela? Vakevo kuvazivuka vika mulinakwendeka.

¹⁷ Nambe nga lilombelo lyeni lyakukandelela kuli Njambi linapu lyalivwa, oloni ku vanu veka kulyasa kuvawasa embwe.

¹⁸ Njikandelela kuli Njambi omwo njikendeka mu vindaka vyeka kutuvakana vamo veni.

¹⁹ Oloni mu cikungulukilo akulemesa, cili kulutwe kwendeka majwi atanu aje vasa kuziva, mukulongesa veka, kutuvakana kwendeka majwi akupwa 1,000 mu vindaka vyeka.

²⁰ Vasamba vange, kesi mupwe ngwe mu vanike mu viyongola vyeni, pweni ngwe vanike mu vyuma vya vuvi, oloni pweni mu vakulunu mu viyongola vyeni.

²¹ Vanasoneka mu Visoneka ngwavo, “Shukulu Kalunga nendeka ngwendi, njikendeka kuli vanu vange mukupangesa vanu vaka-kwendeka vindaka vyeka. Njikendeka navo na tunwa twa vangenzi, oloni nameme ngoco vanu vange kuvakanjitolilila.”

²² Ngecivene, vwana vwakwendeka mu vindaka vyeka vunapu vukaleo kuli vaka-kujeneka kukulaela, kesi kuli vaka-kukulaela embwe, omwo vwana vwakwambulula lijwi lya Njambi vunapu vukaleo kuli vaka-kukulaela, kesi kuli vaka-kujeneka kukulaela.

²³ Ngecivene, nga cikungulukilo coshe vanakunguluka, co munu na munu ashangumuka kwendeka mu vindaka vyeka, nga vanu veka nambe vaka-kujeneka kukulaela vakovelamo, kuma kuvendeka ngwavo yeni voshe munazaluka ndi?

²⁴ Oloni nga voshe valinakwambulula lijwi lya Njambi omo vamo vaka-kujeneka kukulaela nambe vanu veka vakovelamo, vimbunge vyavo vikavasholwela vuvi vwavo a vyuma vije vanazivi. Vyoshe vije vaziva vikavahisa,

²⁵ viyongola vyavo vyakushweka vikasholoka akujela, co vakatsikama a mavuli nakulemesa Njambi nakulitavela ngwavo, “Mwa vushunga Njambi ali neni kuno!”

Kasingimiko mu cikungulukilo

²⁶ Evi vikevyo njendeka, vavusamba vange. Omo mukunguluka amo nakulemesa, munu umo ali na mwaso, weka ali na cilongesa, weka asholola vya Njambi, weka ali na lijwi mu vindaka vyeka, co weka lalo anungulule vije vanendeka. Vyuma vyoshe vinapande kukwasa cikungulukilo.

²⁷ Nga munu umo alinakwendeka vindaka vyeka, vavali nambe vatatu vendeke, oloni vendeke umo ku umo, co mukwavo napande kunungulula.

²⁸ Oloni nga kukwesi umo asa kunungulula, asinoni uje nendeka mu vindaka vyeka napande kwoloka, co endeke lika kuli ikeye vavenya na kuli Njambi.

²⁹ Vavali nambe vatatu vaje vavanaana kwambulula lijwi lya Njambi vanapande kwendeka, simbu oyo vakwavo valinakwilula vije valinakwendeka.

³⁰ Oloni nga kuli umo mu munga atambula lijwi kuli Njambi, uje alinakwendeka napande kwoloka.

³¹ Yeni voshe mwasa kwambulula lijwi lya Njambi, umo na umo, ngeci voshe valilongese nakulitakamesa.

³² Co vwana vwakwambulula lijwi lya Njambi vunapande kukala na moko ya uje endeka,

³³ omwo Njambi katusanene tupwe vaka-kujeneka kwononoka, oloni mu lizivasano na mu kwoloka. Ngwe mu vikungulukilo vyoshe vya vanu va Njambi,

³⁴ vanakazi vanapande kwoloka kuluu mu cikungulukilo. Kuvavatavesele kwendeka, ngwe mulyendeka Lishiko lya vaYunda, kuvapandele kushika.

³⁵ Nga vashaka kwihula cuma cimo, vanapande kwihula vanalume vavo ku vinjuvo. Cinapu cuma ca shwamwa manene kuli munakazi kwendeka mu cikungulukilo.

³⁶ Nambe lijwi lya Njambi kuma lyatundile kuli yeni ndi? Nambe kuli yeni lika lyezile ndi?

³⁷ Nga umo ayongola ngwendi napu muluwa wa Njambi, nambe ali na vwana vwa munzinzime, napande kunanguka ngeci evi njilinakumisonekela vinapu lishiko lya Mwene.

³⁸ Oloni nga katolilila vyuma evi, co kesi mumutolilile.

³⁹ Ngecivene, vavusamba vange, akeni vimbunge vyeni akwambulula lijwi lya Njambi, oloni kesi muvindike vaje vendeka mu vindaka vyeka.

⁴⁰ Oloni vyuma vyoshe vinapande kulingiwa mu vuvwa na muje muvinapande.