1 Kolinte 13 - Livulu lya Shukulu Kalunga

Cizemo

¹ Nga njendeka mu vindaka vya vanu nambe vya tungelo, oloni nga kunjesi na cizemo, njinapu ngwe kutenda kwa vutale nambe kwoya kwa ngenjo.

² Co nambe njili na vwana vwakwambulula nakuzivisisa vyuma vyakushweka, co nga njili nakukulaela kwoshe ngeci njase kushwenyesa minkinda, oloni nga kunjesi na cizemo njinapu wangoco.

³ Nga njana vyoshe vije njilinavyo, co nga njana muvila wange mukuwenyeka, oloni nga kunjesi na cizemo, eci kucinjikwasa embwe.

⁴ Cizemo cili na lukakateya na kutetela, cizemo kucesi na lifuwa nambe kulyalesa,

⁵ cizemo kucesi kulilwisa, cizemo kucesi kulitondela vyaco cikeco vavenya, nambe kucesi kuluvala, cizemo kucesi kukala na likiti-kiti a vyuma vyavivi,

⁶ cizemo kucesi kujolela vuvi, oloni cijolela vushunga.

⁷ Cizemo kucesi kwonwa, co kukulaela kwaco, kukengelela na lukakateya kuvyesi kwonwa embwe.

⁸ Cizemo capwa ca myaka yoshe. Kuli vuka-kwimanena, oloni vwa kasimbu lika, kuli mavwana akwendeka vindaka vyaviha, oloni nao akahwa, kuli mana, oloni akahwa.

⁹ Omwo mavwana etu a mana na akwambulula vinapu vya kasimbu lika,

¹⁰ oloni omo vije vyakulumbunuka vikaija, asinoni vije vya kasimbu lika vikahwa.

¹¹ Omo njapwile nji mwanike, endekesi yange nakukala kwange na viyongola vyange vyoshe vyapwile vya vwanike, oloni omo njinakolo, kunjesi nakupangesa lalo vingila vya vwanike.

¹² Evi tulinakumona ololo tuvimona a kalikengelo ngwe kavwivwi, oloni kulutwe tukamona mesho na mesho. Vije njazivuka ololo vinapu vyavindondo, oloni kulutwe vikapwa vyakushula mwa vushunga, vikapwa vyakushula ngwe muje mwananjizivukisilavyo Njambi.

¹³ Ngecivene, ololo, vyuma evi vitatu vinasala, kukulaela, cinyangavili na cizemo, co cinatuvakana ku vyuma vyoshe evi cinapu cizemo.