1 Kolinte 12 - Livulu lya Shukulu Kalunga

Mavwana akutunda kuli Munzinzime Wakujela

¹ Ololo, a vin̄anda vije mwanjisonekelele vya mavwana a ku Munzinzime Wakujela. Vasamba vange, njishaka ngeci muzivuke vushunga vwawo.

² Mwazivuka ngeci omo laja mwakele vaka-kujeneka kukulaela, vamitwamenenene nakumisevwisa mu vingila vyavingi mukulemesa tumponya kutwesi na mwonyo.

³ Ngecivene, njishaka muzivuke ngweni naumo wai uje yatwamenena Munzinzime wa Njambi endeka ngwendi, “Yesu apwe wakusinga!” Co lalo naumo wai asa kulitavela ngwendi, “Yesu ikeye Mwene,” kuvanga Munzinzime Wakujela amutwamenene.

⁴ Kuwali mavwana a munzinzime akuliseza-seza, oloni Munzinzime umolika muka-kuwaana.

⁵ Kuvili vingila vyavingi vyakupanga, oloni Mwene umolika ivalinakupangela.

⁶ Kuli nzili yakuliseza-seza yakupanga vipangi, oloni Njambi umolika ikeye muka-kwana nzili kuli voshe ku vipangi vyavo vyakupanga.

⁷ Kuli umo naumo vanamwana vwana vwa Munzinzime mukukwasa vakwavo mu vyoshe.

⁸ Munzinzime aana munu umo muzimbu wa mana, co umo lalo Munzinzime amwana muzimbu wakuzivisisa.

⁹ Munzinzime umolika vene aana kukulaela kuli munu umo, co lalo kuli munu weka amwana nzili yakukangwisa.

¹⁰ Munzinzime aana munu umo nzili yakulinga vizivukiso, kuli weka vwana vwakwambulula lijwi lya Njambi, co kuli weka lalo nzili yakulumbununa kutepesa akati ka mavwana aje atunda kuli Munzinzime na aje kuwatundile kuli ikeye. Kuli munu umo amwana nzili yakwendeka vindaka vyaviha, kuli weka lalo amwana nzili yakulumbununa vindaka vyaviha vije vendeka.

¹¹ Oloni ikeye umolika Munzinzime uje alinakulinga vyoshe evi, ngwe kukushaka kwendi, ikeye aana kuli munu na munu vwana vwakuliseza-seza.

Muvila umo oloni vilyo vyavingi

¹² Kilistu wapwa ngwe muvila umo, uje uli na vilyo vyavingi, oloni anga vene muvila umo, nameme vanaupanga mu vilyo vyavingi.

¹³ Mu ngila eyi vene, yetu voshe, nambe vaYunda na vaje kesi vaYunda, nambe vindungo nambe vanu vakupatuka, Munzinzime umo natumbwitika mu muvila umolika, co yetu voshe vatunwisile Munzinzime umolika.

¹⁴ Omwo muvila awo lika kuvaupangele a cilyo cimolika, oloni uli na vilyo vyavingi.

¹⁵ Nga lindi lyendeka ngwalyo, “Yange kesi nji livoko, kunjakundamene ku muvila,” eci kesi cikeco cikalivindika ngeci kesi lipwe cilyo ca muvila.

¹⁶ Co nga litwi lyendeka ngwalyo, “Yange kesi nji lisho, kunjakundamene ku muvila,” eci kesi cikeco cikalivindika ngeci kesi lipwe cilyo ca muvila.

¹⁷ Nga muvila woshe wapwile lisho, co ukaziva vati? Co nga wapwile lika litwi, co ukaziva vati vweko?

¹⁸ Ngecivene, ngwe omo muvinapu, Njambi naaka vilyo vyoshe vyakuliseza-seza mu muvila ngwe mwayongwele.

¹⁹ Nga vyoshe evi vyapwile cilyo cimolika nga kukwesi muvila!

²⁰ Ngwe omo muvinapu, kuli vilyo vyavingi oloni muvila wapwa umo.

²¹ Ngecivene, lisho kulyasa kwendeka ku livoko ngwalyo, “Kunjikushaka!” Nameme mutwe kuwasa kwendeka ku lindi ngwawo, “Eyo, kunjikushaka!”

²² Mu ngila ikwavo, kutwasa kulinga mwamuvwa nga tujeneka vilyo vya muvila vije visholoka kupwa vyakuzeya,

²³ Co vilyo vije tuyongola ngwetu kuvyesi na seo manene vikevyo tukapangesa manene nakunyanyama, omo vilyo vya muvila vije kuvisholoka ngwe vyavivwa manene vikevyo tukapangesa manene nakunyanyama,

²⁴ vikevyo kuvavishaka ku vilyo vije vya seo. Njambi ikeye vavenya nanungasana muvila ngeci waane kasingimiko kakama ku vilyo vije kuvyesi na seo.

²⁵ Co kukwesi kutepesa mu muvila, oloni cilyo cimo na cimo cili na cishota-mbunge ku cilyo cikwavo.

²⁶ Nga cilyo cimo ca ku muvila cilinakuyanda, co vyoshe vilyo viyandela amo naco, nga cilyo cimo vacishangala, co vyoshe vilyo vivwaelela amo naco.

²⁷ Yeni voshe munapu muvila wa Kilistu, co munu na munu napu cilyo ca muvila ou.

²⁸ Mu cikungulukilo, Njambi naaka vyoshe mu mwela umo, mu mwela wakulivanga miluwa, mu mwela wamucivali vaka-kwimanena, co mu mwela wamucitatu valongisi, asinoni vaje vaka-kulinga vizivukiso, kwatako vaje vavanaana nzili yakukangwisa nambe kukwasa vakwavo nambe kuvatwamenena nambe kwendeka vindaka vyaviha.

²⁹ Kesi ngwe voshe vanapu miluwa nambe vaka-kwimanena nambe valongisi. Kesi munu woshe ali na nzili ya vipangi vyakulinga vizivukiso

³⁰ nambe kukangwisa mishongo nambe kwendeka vindaka vyaviha nambe kunungulula vije vanendeka.

³¹ Ngecivene, akeni vimbunge vyeni ku mavwana a seo yakama. Co njikamimwesa ngila yakuhyana manene.