1 Kolinte 11 - Livulu lya Shukulu Kalunga

¹ Njitembunwineni, ngwe yange lalo njitembunwina Kilistu.

Kufwika ku mutwe a kulemesa

² Njimishangazala omwo simbu yoshe mukanjanuka nakukava vilongesa vinjamilongesele.

³ Oloni njishaka muzivuke ngeci Kilistu napu mutwe wa munalume woshe, munalume napu mutwe wa munakazi wendi, co Njambi napu mutwe wa Kilistu.

⁴ Ngecivene, munalume woshe omo alombela nambe kwambulula lijwi lya Njambi mu mbunga ya vanu vaje valemesa, co nafwiki ku mutwe wendi alinakushaula Kilistu.

⁵ Co munakazi woshe omo alombela nambe kwambulula lijwi lya Njambi mu mbunga ya vanu vaje valemesa, co kafwiki ku mutwe wendi alinakushaula munalume wendi, kukwesi kulitepesa mukati kendi na munakazi uje nateula ku mutwe wendi.

⁶ Nga munakazi kafwiki ku mutwe wendi, napande vene kuteula vin̄ambu ku mutwe wendi. Co omwo cinapu cuma ca shwamwa manene munakazi kuteula vin̄ambu nambe kukamba ku mutwe wendi, napande kufwika ku mutwe wendi.

⁷ Munalume kapandele kufwika ku mutwe wendi, omwo alinakusholola cifwa na vumpau vwa Njambi. Oloni munakazi alinakusholola vumpau vwa munalume,

⁸ omwo munalume kuvamutangele kutunda kuli munakazi, oloni munakazi ikeye watundile kuli munalume.

⁹ Nambe munalume kuvamutangele omwo lizina lya munakazi embwe, oloni munakazi vamutangele a lizina lya munalume.

¹⁰ Ngecivene, omwo ya tungelo, munakazi napande kufwika ku mutwe wendi kusholola ngeci ali mwisi ya mashiko a munalume wendi.

¹¹ Nameme ngoco, muli Kilistu, munakazi kalitepesa na munalume wendi nambe munalume kalitepesa na munakazi wendi embwe.

¹² Ngwe omwo munakazi watundile kuli munalume, mu ngila eyi vene, munalume nasemuka kuli munakazi, co vyuma vyoshe vyatunda kuli Njambi.

¹³ Liiluleni yeni vavenya nga cinapu cuma cacivwa kuli munakazi kulombela kuli Njambi mu mbunga ya vanu vaje valemesa kujeneka cuma cimo cakufwika ku mutwe wendi.

¹⁴ Omwo vikajo? Cisemwa cikeco vavenya cilongesa ngeci vin̄ambu vyavilaja vinapu cuma ca shwamwa kuli munalume,

¹⁵ oloni kuli munakazi cinapu vuvwa kuli ikeye. Vin̄ambu vyendi vyavilaja vanamwanavyo ngwe cifwiko kuli ikeye.

¹⁶ Oloni nga umo ali na vimata a cuma eci, nambe yange nambe vikungulukilo vya Njambi kutwesi na ngila yeka lalo yakulemesela.

Mesa ya Mwene

¹⁷ Oloni a vilongesa vimo kunjimishangazala, omwo akulikungulula kweni mukulemesa mukalingi mwamuvi kesi mukalingi mwamuvwa.

¹⁸ Omwo akulivanga, vananjileka ngwavo mu vikungulukilo vyeni muli vimunga vyakulitepa-tepa, co njakulaela eci cinapu ca vushunga vene.

¹⁹ (Omwo ali kulitepesa akati keni ngeci vaje vali na vushunga vavamone.)

²⁰ Omo mukungulukila amo, kumwesi nakwiija nakulya ku Mesa ya Mwene.

²¹ Omwo mulinakulya, munu na munu alinakulya vyakulya vyendi, ngecivene, vamo vakala na njala, veka vapenda.

²² Kuma kumwesi na vinjuvo vyeni ngeci mukalilemo nakunwilamo ndi? Nambe kuma mulinakushaula cikungulukilo ca Njambi nakuzivisa shwamwa vanu vaje vanajeneka ndi? Vikajo mushaka yange njendeke kuli yeni a cuma eci? Njimishangale ndi? Mwa vushunga vene kunjimishangala embwe!

²³ Omwo njatambwile kuli Mwene cilongesa cije cinjamyanene cikeco eci, Mwene Yesu, a vutsiki vuje vene vamwendele vungungu, wanonele likende,

²⁴ wakandelelele kuli Njambi, walipazwile, co wendekele ngwendi, “Ou ukewo muvila wange uvanamyana. Lingeni eci mukunjanuka.”

²⁵ Mu ngila eyi vene, omo vanamanesa kulya, wanonele nganja, co wendekele ngwendi, “Nganja eyi inapu lizivasano lyaliha lya Njambi, mu maninga ange. Omo mukanwako, lingeni visimbu vyoshe mukunjanuka.”

²⁶ Omwo eci cilumbununa ngeci a simbu na simbu omo mulya eli likende nakunwa ku nganja eyi mwambulula kutsa kwa Mwene noo akaija.

²⁷ Woshe alya likende eli nambe kunwa ku nganja eyi na cilika cacivi, ikeye ali na mulonga wakulinga vuvi ku muvila na maninga a Mwene.

²⁸ Ngecivene, munu na munu aliilule ikeye vavenya akulivanga, asinoni alye likende nakunwa ku nganja.

²⁹ Omwo nga kuwanangukile muunalumbunukila muvila wa Mwene omo ulya likende nakunwa nganja, ulinakulihisa yove vavenya omo ulya nakunwa.

³⁰ Omu mukemwo vavangi akati keni valinakuvinja nakuzeya, co vamo vanatsi.

³¹ Oloni nga tuliilula yetu vavenya akulivanga, co Njambi kakatuhisa.

³² Oloni Mwene alinakutuhisa nakutunyanyamesa, ngeci kesi vakatuhise amo na vaka-kaye.

³³ Ngecivene, vasamba vange, omo munakunguluka amo ku Mesa ya Mwene, livandameneni umo na mukwavo.

³⁴ Nga umo ali na njala, alivange kulya ku njuvo yendi, kutewa mukakovela mu cihiso ca Njambi omo mukunguluka. Ngwe a vin̄anda vyeka lalo, njakuvishungamesa omo njikaija.