1 Kolinte 10 - Livulu lya Shukulu Kalunga

Kunangula a tumponya

¹ Njishaka ngeci muzivuke vavusamba vange vije vyalingiwile kuli vakukulwila vetu vaje vakavele munima ya Mosesa. Voshe vavanyungilile mu lishelwa, co voshe vetile mu Lishali lya Mema Akuvenga kujeneka vushonde.

² Mu lishelwa na mu lishali voshe vavambwitikile kupwa vandongisi va Mosesa.

³ Voshe valile likende lyakulifwa lya munzinzime,

⁴ nakunwa kwakulifwa kwa munzinzime. Vanwile vyakutunda ku limanya lya munzinzime lije livendele nalyo, co limanya lije lyapwile Kilistu vavenya.

⁵ Oloni nameme ngoco Njambi kavwaelelele na vavangi, ngecivene, vivimbi vyavo vyalishandokelele mu mambo mwoshe.

⁶ Ololo, vyuma vyoshe evi vinapu cimweso kuli yetu, mukutunangula kesi tukale na mashungu akulinga vyuma vyavivi, ngwe muvalingile vakevo,

⁷ kesi tulemese tumponya, ngwe muvalingile vamo vavo. Ngwe muvyendeka visoneka ngwavyo, “Vanu vatumbamene ku ciwano cije, oloni vacipwisile ciwano ca kupenda nakulinga vupangala.”

⁸ Kutwapandele kulinga vupangala, ngwe muvalingile vamo vavo, co mu litangwa limolika vanu vakupwa 23,000 vatsile.

⁹ Kutwapandele kweseka Mwene, ngwe muvalingile vamo vavo, co vatsile ku manyoka.

¹⁰ Nambe kutwapandele kulinyenga, ngwe muvalingile vamo vavo, co vavanyongesele kuli Kangelo wa Kutsa.

¹¹ Vyuma vyoshe evi vyalingiwile kuli vakevo kupwa cimweso ngeci veka vamweneko, co vavisonekele mukutunangula yetu. Omwo tulinakuyoya a simbu ije ili kuyehi na mamaneselelo.

¹² Ngecivene, uje aliyongola ngwendi nemana mbe anyanyame manene kutewa awa.

¹³ Vyeseko vyoshe vilinakwija kuli yeni vinapu ngwe vije vakeseka navyo vanu voshe. Oloni Njambi akanyungu cikulaeso cendi, co katava ngeci vamyeseke na vyeseko vyakutuvakana nzili yeni ngeci mwimane mbe, a simbu ije vamyeseka, ikeye akamyana nzili yakukolesa, co amisholwela ngila ngeci mwase kutundamo.

¹⁴ Ngecivene, vavusamba vange va cizemo, teweni kulemesa tumponya.

¹⁵ Njendeka kuli yeni ngwe vanu vaka-mana, iluleni yeni vavenya vije vinjendeka.

¹⁶ Nganja ije tukapangesa ku Mesa ya Mwene, ije itukakandelela kuli Njambi, omo tuyinwa tulinakulipangela maninga a Kilistu. Na likende lije tukapazula, omo tulilya, tulinakulipangela muvila wa Kilistu.

¹⁷ Omwo kuli likende limolika, yetu voshe, nambe tunapu tuvavangi, tunapu muvila umolika, omwo tulinakulipazwila likende limolika.

¹⁸ Anukeni vanu va Isalele, vaje vakali vya n̄ombelo yakukombelela ku mutula na vakevo vakalipangela na mutula mu vipangi vya Njambi.

¹⁹ Kuma eci cinalumbunuka ngwange kamponya nambe vyakulya vyakukombelela ku kamponya vinakundama ku cuma cacivwa ndi?

²⁰ Embwe! Njilinakwendeka ngwange cije vanakombelela a mutula wa tumponya cinapu cakukombelela ku minzinzime yakujwala, kesi kuli Njambi. Co kunjishaka mulitombole nakupangela amo na tumponya.

²¹ Yeni kumwasa kunwa ku nganja ya Mwene nakunwa lalo ku nganja ya minzinzime yakujwala, kumwasa kulya ku mesa ya Mwene nakulya lalo ku mesa ya minzinzime yakujwala.

²² Kuma tushaka kulingisa Mwene lifuwa ndi? Kuma tuyongola ngwetu tuli na nzili kutuvakana ikeye ndi?

²³ Ngecivene, vendeka ngwavo, “Vanatutavesa kulinga coshe-icoshe.” Eyo, mwa vushunga vene, oloni kesi vyuma vyoshe vyavivwa. “Vanatutavesa kulinga vyuma vyoshe,” oloni kesi vyuma vyoshe vikwasa embwe.

²⁴ Naumo wai napande kulishakezekela vuvwa vwendi ikeye vavenya, oloni napande kuyongola vuvwa vwa vakwavo.

²⁵ Munapande kulya cuma coshe cakulandesa mu mwela wavulandeselo vwa situ, kesi mwihule vihula vimo omwo a citaku-taku ceni.

²⁶ Ngwe muvyendeka visoneka ngwavyo, “Asi na vyoshe vije vilimo vyapwa vya Shukulu Kalunga.”

²⁷ Nga muka-kujeneka kukulaela akulanya kukulya, co utava kuya, lya vije vanakwakela, kesi wihule vihula vimo omwo a citaku-taku cove.

²⁸ Oloni nga umo akuleka ngwendi, “Evi vyakulya vinapu vyakukombelela ku tumponya,” asinoni kesi uvilye, omwo ali uje nakuleka, co lalo omwo a citaku-taku,

²⁹ eci kucapwile citaku-taku cove vavenya embwe, oloni ca munu uje nakuleka. Umo ehula ngwendi, “Omwo vikajo kupatuka kwange kwakulinga vyoshe njishaka vacivindike omwo a citaku-taku ca munu weka?

³⁰ Nga njikandelela kuli Njambi a vyakulya vyange, omwo vikajo munu weka anjana mulonga a vyakulya vije njinakandelela?”

³¹ Ngecivene, vyoshe ulinga, nambe ulya nambe unwa, vilinge mukwana Njambi vumpau.

³² Yoya mu ngila ije kuyasa kwana vukalu nambe kuli vaYunda nambe kuli vaje kesi vaYunda nambe ku cikungulukilo ca Njambi.

³³ Pangeni ngwe muje munjikapanga, njikeseka kuvwaelelesa voshe mu vyoshe vije njikalingi, kunjesi kuyongola vuvwa vwange vavenya, oloni vuvwa vwa voshe, ngeci vakovoke.