1 Kolinte 1 - Livulu lya Shukulu Kalunga

¹ Mukanda wakutunda kuli Paulu, uje ivasanene ku cizango ca Njambi kupwa muluwa wa Kilistu Yesu, na ndolome yetu Sosetenese.

² Ku cikungulukilo ca Njambi cije cili mu Kolinte, kuli vaje voshe vavanasana ngeci vapwe vanu va Njambi vakujela, vaje vanakundama kuli ikeye amo na Kilistu Yesu, amolika na vanu voshe kwoshe-ikwoshe vaje vakalemesa Mwene yetu Yesu Kilistu, Mwene yavo na Mwene yetu.

³ Njambi Tatetu na Mwene Yesu Kilistu vamyane kutetela na kwoloka.

Vivezikiso muli Kilistu

⁴ Simbu yoshe njikakandelela kuli Njambi omwo yeni, omwo kutetela kuje kwanamyana Njambi ali Kilistu Yesu.

⁵ Omwo muli Kilistu vanamipwisa vaka-kufuka mu vyuma vyoshe, kuwezelelako na endekesi yoshe na mana oshe.

⁶ Lijwi lya Kilistu vanalikolesa nakulitakamesa muli yeni

⁷ ngecivene, kumwonwene kutambula civezikiso cimo, omo mulinakuvandamena kusholoka kwa Mwene yetu Yesu Kilistu.

⁸ Ikeye lalo akamikolesa mbe na ku shongo, ngeci kesi vakamiwane na mulonga a Litangwa lya Mwene yetu Yesu Kilistu.

⁹ Njambi vanapande kumukulaela, Njambi uje wamisanene ngeci mukale mu kulitombola amo na Munendi Yesu Kilistu Mwene yetu.

Kulyangunuka mu cikungulukilo

¹⁰ Njimilambelela vavusamba vange, na moko ya Mwene yetu Yesu Kilistu ngwange, lizivasaneni mu vyoshe vimwendeka, ngeci kesi kukakale kulyangunuka akati keni. Oloni litomboleni mwamuvwa, na viyongola vimo na cizango cimo.

¹¹ Omwo vanu vamo va ku naanga ya Koloe vananjileka ngwavo akati keni vavusamba vange ali vimata.

¹² Njilinakulumbununa ngwange, akati keni munu na munu alinakwendeka vyuma vyakulyangunuka. Umo endeka ngwendi, “Yange nji muka-Paulu”, mukwavo ngwendi, “Yange nji muka-Apolo”, weka ngwendi, “Yange nji muka-Petulu”, co weka ngwendi, “Yange nji muka-Kilistu.”

¹³ Kuma Kilistu vanamwangununa ndi mu mitambela! Kuma Paulu ikeye wamitsililile a cilindakano ndi? Kuma vamimbwitikile mu lizina lya Paulu ndi?

¹⁴ Njikandelela Njambi omwo kunjambwitikile umo wa ali yeni kuvanga lika Kilisipase na Ngayase.

¹⁵ Ngecivene, naumo wai endeka ngwendi vamimbwitikile kupwa vandongisi vange.

¹⁶ (Eyo, kuma njambwitikile lalo Setefanase na naanga yendi, oloni kunjasa kwanuka nga njambwitikile weka lalo.)

¹⁷ Omo Kilistu kanjitumine mukumbwitika. Oloni wanjitumine mukwambulula Vin̄anda Vyavivwa, nakuvyambulula kujeneka kupangesa endekesi ya mana a vanu, kutewa cilindakano ca Kilistu cipwa cangoco.

Kilistu ikeye nzili na mana a Njambi

¹⁸ Omwo lijwi lya kutsa kwa Kilistu a cilindakano linapu lyangoco kuli vaka-kuzimbala, oloni kuli yetu vaka-kwovoka linapu nzili ya Njambi.

¹⁹ Omwo visoneka vyendeka ngwavyo, “Njikanyongesa mana a vaka-kunyanyama, nakuzimangana mana a vaka-kulilongesa.”

²⁰ Ngecivene, muka-mana ali kuli? Nambe vaka-kulilongesa? Nambe muka-vimata wa mutongwe wa ano a kaye? Njambi namwesa ngeci mana a ano a kaye anapu a vulema!

²¹ Omwo Njambi mu mana endi nalingisa vanu ngeci kesi vamuzivuke mu mana avo. Oloni mu ngila eyi ya muzimbu vatumbula ngwavo wa “vulema” tulinakwambulula, Njambi wayongwele kwamena vaje vakulaela.

²² Omwo vaYunda vashakezeka vizivukiso kupwa vukaleo, co vaje kesi va Yunda vashakezeka mana.

²³ Oloni yetu, tulinakwambulula Kilistu wakushukika a cilindakano, muzimbu uje unapu citanukiso kuli vaYunda na vulema kuli vaje kesi vaYunda,

²⁴ oloni kuli vaje vaanasana Njambi, vaYunda na vaje kesi vaYunda, muzimbu ou ukewo Kilistu, ikeye napu nzili ya Njambi na mana a Njambi.

²⁵ Omwo vije visholoka ngwe vulema vwa Njambi vili na mana manene kutuvakana mana a vanu, co vije visholoka ngwe kuzeya kwa Njambi vinapu vya nzili manene kutuvakana nzili ya vanu.

²⁶ Omwo ololo vavusamba vange, anukeni mumwafwile laja, omo Njambi wamisanene. Kweseka na viyongola vya vanu, vavandondo lika akati keni vapwile vaka-mana, nambe vaka-nzili, nambe vaka-vulemu.

²⁷ Oloni Njambi mu cizango cendi waangwile vije vivayongwele vaka-kaye ngwavo vyangoco ngeci azivise shwamwa vaka-mana, co lalo waangwile vije vivayongwele vaka-kaye ngwavo vyakuzeya ngeci azivise shwamwa vaka-nzili.

²⁸ Ikeye waangwile vije vivashawile vaka-kaye nakuviyeluwisa nakuviyongola ngeci vinapu vyangoco, ngeci anyongese vije vivayongola vaka-kaye ngwavo vinapu vya vulemu.

²⁹ Ngecivene, naumo wai asa kulishasha ku mesho a Njambi.

³⁰ Oloni Njambi namyaka amo muli Kilistu Yesu, co Njambi napwisa Kilistu mana etu. Ali ikeye tunapu vaka-vushunga ku mesho a Njambi, tunapu vana va Njambi vakujela, co vanatupatula.

³¹ Ngecivene, ngwe muvyendeka visoneka ngwavyo, “Woshe uje ashaka kulishasha napande kulishashela a vije vyanalingi Mwene.”