لوقا 5 - مازندرانی

اولین شاگِردون عیسی

¹ اَتّا روز که عیسی دریاچۀ جِنیسارِت کنار هِرِسّا بی‌یِه و مردِم از هر طَرِف وِنه پَلی هجوم یاردِنه تا کِلام خِدا ره گوش هاکانِند،

² در کنار دریاچه دِتا قایق بَدی‌یه که صیادون وِنه دِله جه بیرون بی‌یَمونه و مشغول بَشوستِن شه تورها بیی‌نه.

³ پس سِوار اَتّاازاون قایق‌ها بَییه که مالِ شَمعون بی‌یِه و وِنجه بِخاسّه قایق ره اَتّا کمی ساحل جه دور هاکانه. بعد عیسی قایق دِله هِنیشته و مردِم ره تعلیم داهه.

⁴ وقتی وِنه حرف‌ها تِموم بَییه، شَمعون ره بائوته: «قایق ره بَوِرین جوله جا، و تورها ره دِمبِدین او دِله تا ماهی بَیرین.»

⁵ شَمعون جِواب هادا: «اِستا، اِما تموم شو سخت کار هاکاردِمی و هیچ چی نَیتّیمی. اِسّا که ته گانی، تورها ره اوُ دِله دِمدیمبی.»

⁶ وقتی اینتی هاکاردِنه، اَنده ماهی بَیتِنه که نزدیک بی‌یِه ویشون تورها پاره بَووشه!

⁷ همینِسّه شه رَفِقاجه که اَتّا دیگه قایق دِله دَیینه ره، با اشاره بِخاسِّنه تا ویشونه کمِک هاکانند. اونا بی‌یَمونه و هر دِتا قایق ره اَندِه ماهی جه پِر هاکاردِنه که نزدیک بی‌یِه اوُ دِله غرق بَووشِند.

⁸ شَمعون پطرس وقتی اینا ره بَدی‌یه، عیسی لینگه سَر دَکِته و بائوته: «خِداوندا، مه‌جه دور بَووش، اینِسّه که مردی گناهکارِمه!»

⁹ شَمعون و وِنه هِمراهون از اتّفاق ماهی بَیتّن در تعجب دَیینه.

¹⁰ یعقوب و یوحنا، زِبِدی ریکائون هِم که شَمعون هِمکار بینه، همین حال ره داشتِنه. عیسی شَمعون ره بائوته: «نَتِرس، از این به بعد مردِم ره صید کاندی.»

¹¹ پس اونا شه قایق‌ها ره بیاردِنه ساحل و همه چی ره وِل هاکاردِنه و وِنه دِنبال راه دَکِتِنه.

شفای مرد جذامی

¹² اَتّا روز که عیسی اَتّا از شهرهای دِله دَییه، اَتّا مردی اونجه بی‌یَمو که جذام تِمومِ وِنه تَن ره بَییته. وقتی عیسی ره بَدی‌یه، وِنه لینگه پَلی خاک دِله دَکِته و خواهش هاکارده، بائوته: «اِی آقا، اگه ته بخوای، توندی مِره جذام جه پاک هاکانی.»

¹³ عیسی شه دست ره دراز هاکارده و وِره لمس هاکارده و بائوته: «مِن خوامبه، پاک بَووش!» هَموندم جذام اون مرد جه برطَرِف بَییه.

¹⁴ بعد عیسی وِره دستور هادا: «هیچ کس ره هیچی نائور، ولی بور، شه ره کاهن ره نشون هاده و شه طهارتِسّه قِربونیهایی ره که، موسی دستور هاداهه، تقدیم هاکان تا اوناسّه گواهی بوئه.»

¹⁵ با این همه، وِنه کارها خَوِر بیشتِر پیچی‌یه، اَنده که جمعیِت زیادتِری وِنه پَلی اِمونه، تا وِنه حرفها ره گوش هاکانِند و شه مرض‌ها جه شفا بَیرِند.

¹⁶ امّا عیسی بیشتِر موقع دورِ جا شی‌یه و تنهایی دِعا کارده.

شفایِ اتّا فَلِج مردی

¹⁷ اتّا روز عیسی تعلیم داهه و فَریسیون و علِمایِ دینی از تموم شهرهایِ جلیل و یهودیه و اورشلیم بی‌یَمونه اونجه و هِنیشته بینه. قدرِت خِداوند با عیسی بی‌یِه تا مریض‌ها ره شفا هاده.

¹⁸ یکدفعه چند تا مردی راه جه بَرِسینه که اتّا فَلِج ره با وِنه تخت شه هِمراه یاردِنه. اونا سعی هاکاردِنه وِره بَوِرِند سِره دِله و عیسی جلو بی‌یِلِن.

¹⁹ امّا وقتی به خاطر شولوغی، راهی پِدا نَکاردِنه، بوردِنه پوشته‌بوم و وِره سفالها میون جه با وِنه تخت پایین بَرِسینه، و در وسط جمعیت وِره بی‌یِشتِنه عیسی جلو.

²⁰ وقتی عیسی ایمان اوناره بَدییه، بائوته: «اِی مرد، ته گِناه ببخشییه بَییه!»

²¹ امّا فَریسیون و علِمایِ دینی شه پَلی فکر هاکاردِنه: «وِه کی هسّه که کفر گانه؟ کی بجز خِدا بتونده گِناهون ره ببخشه؟»

²² عیسی بِفهمِسّه ویشون به چی شی فکر کانّه، ویشون جه بپورسیه: «چه اینتی فکر شه دل دِله راه دینّی؟

²³ بائوتِنه کدوم آسونتِره: ‹ته گِناه ببخشییه بَییه›، یا اینکه ‹راست بَووش، راه بور؟›

²⁴ اِسّا مِن این کارها ره کامبه تا بدونین که انسان ریکا بر روی زمین اقتدار بِبَخشییِنه گِناهون ره دانّه...» فَلِج مردی رِه بائوته: «ته ره گامبه، راست بَووش، شه تخت ره جمع هاکان، بور شه سِره!»

²⁵ هَموندم ویشون جلو هِرِسّا و اونچی ره که وِنه رو بَخاته بی‌یِه ره، جمع هاکارده و خِدا ره شکرکنون بورده شه سِره.

²⁶ همه این اتّفاق جه در تعجب دَیی‌نه، خِدا ره شکر کاردِنه و در حالی که خَله بَتِرسینه، گاتِنه: «امروز چیزهای عجیبی بَدیمی.»

دعوت از لاوی

²⁷ بعد عیسی اون سِره جه بیرون بی‌یَمو و اَتّا خِراجگیر ره بَدی‌یه که وِنه اسم لاوی بی‌یِه. لاوی خِراجگاه دِله نیش بی‌یِه. وِره بائوته: «مه دِنبال جه بِرو.»

²⁸ لاوی راست بَییه، همه چی ره وِل هاکارده و عیسی دِنبال راه دَکِته.

²⁹ وِه شه سِره دِله بخاطر عیسی مهمونی بَییته و خَله از خِراجگیرون و مردمون دیگه با ویشون سِفره‌سر هِنیشتِنه.

³⁰ امّا فَریسیون و علِمایِ دینی‌شون، شاکی بَیینه. اونا عیسی شاگِردون ره بائوتِنه: «چه ایسّه با خِراجگیرون و گناهکارون خارِنّی و نوشِنّی؟»

³¹ عیسی جِواب هادا: «مریض‌ها هسِّنه که دکتر لازم دارِنِنه، نا سالمون.

³² مِن نی‌یَمومه تا صالِحون ره به توبه دعوِت هاکانِم، بلکه گناهکارون ره.»

سؤال دربارۀ روزه

³³ وِره بائوتِنه: «یحیی شاگِردون ویشتِر روزها روزه گِرِنّه و دِعا کانّه، فَریسیون شاگِردون هِم این کار ره کانّه، امّا ته شاگِردون همیشه در حال بَخوردِن و بَنوشتِن هسِّنه.»

³⁴ عیسی جِواب هادا: «آیا وونه مهمونهای عروسی ره تا موقعی که داماد با اونا دَره، مجبور هاکانند روزه بَیرِن.

³⁵ امّا موقعی رِسِنه که داماد ویشون جه بَییته وونه. در اون روزها روزه گِرِنّه.»

³⁶ پس این مَثِل رِه ویشون اِسّه بیارده: «هیچ‌کس نو جِمه‌ره نَورینده تا اونتارِه بر کهنه جمه پینه بزنه. اینِسّه که اگه این کاره هاکانه، هِم نو جمه ره پاره هاکارده و هِم نو پارچه، کهنه جمه اِسّه ناجور هسته.

³⁷ هیچ کس هِم شِراب تازه ره مشکهای کهنه دِله نَشِندِنه. اینِسّه که اگه این کار ره هاکانه، شِراب تازه مشکها ره پاره کانده و شِراب دشنی‌یه وونه و مشکها هِم از بین شونه.

³⁸ شِراب تازه ره مَشکهای تازه دِله شَندِّنه.

³⁹ و هیچ کس بعد از بَخاردِنه کهنه شِراب، شِراب تازه نِخانه، اینِسّه که گانه: ‹کهنه شِراب بهتر هسّه.›»