لوقا 3 - مازندرانی

یحیی راه ره هِموار کانده

¹ در پانزدهمین سال فِرمانروایی تیبِریوسِ قیصر، اون زِمان که پُنتیوس پیلاتُس فِرماندارِ یهودیه بی‌یِه، هیرودیس حاکمِ جلیل، و وِنه بِرار فیلیپُس حاکمِ ایتوریه و تراخونیتیس، لیسانیوس حاکمِ آبیلینی،

² و حَنّا و قیافا کاهنان اعظم بینه، کِلام خِدا در بیابون بر یحیی، زِکریا ریکا نازل بَییه.

³ پس یحیی به سرتاسرِ نِواحیِ اردن شی‌یه و مردِمِسّه موعظه کارده که توبه هاکانِند و تعمید بَیرین تا شِمه گِناه بخشیده بَووهه.

⁴ در این باره در کتابِ اِشعیایِ نبی بی‌یَموهه که: «صدایِ اون کس که بیابونِ دِله داد کَشِنه که راه ره خِداوند وِسّه آماده هاکانین! مسیرِ وِره هِموار بسازین!

⁵ همۀ دره‌ها پِر، و همۀ کوهها و تپه‌ها پست وونه راههایِ کج راست و مسیرهایِ ناهِموار هِموار وونه.

⁶ اون لحظه تِموم مردِم نجات خِدا ره وینّه.»

⁷ یحیی به مردِمی که تعمید بَییتِنِسّه وِنه پَلی اِمونه، بائوته: «اِی افعی‌زاده‌ها، کی شِما ره آگاه بِساته که از غضبی که در پیش دَره، فِرار هاکانین؟

⁸ پس اون میوه‌هایی که لایقِ توبه هسّه، بیارین و شه پَلی نایرین که: ‹اَمه پی‌یِر ابراهیم هسّه، پس اِما نجات ره داریمبی›. اینِسّه که شِما ره گامبه، که خِدا قادر هسّه این سنگا جه وَچه‌هایی ابراهیمِسّه دِرِست هاکانه.

⁹ الان تیشه بر ریشۀ دارها بَزوهه بَییه. هر داری که خارِ میوه نده، بَوریه وونه و تَشه دِله دَشِنیه وونه.»

¹⁰ مردِم وِنجه بَپِرسینه: «پس چکار وِنه هاکانیم؟»

¹¹ یحیی جِواب هادا: «اون که دِتا جِمه دارنه، اَتّا رِه هاده به اونتا که نِدارنه. و اونکه غِذا دارنه هِم، اینتی هاکانه.»

¹² باجگیرون هِم بی‌یَمونه تا تعمید بَیرِند. وِنجه بَپِرسینه: «اِستا، اِما چکار وِنه هاکانیم؟»

¹³ ویشونه بائوته: «از اونچه که قِرار هسّه، ویشتِر مالیات نَیرین.»

¹⁴ سربازها هِم وِنجه بَپِرسینه: «اِما چکار هاکانیم؟» یحیی بائوته: «بِزور کسی جه پول نَیرین و هیچ کس ره تهمِت نَزَنین و به شه حقوق قانع بوئین.»

¹⁵ مردِم مشتاقانه منتظر بینه، شه پَلی فکر کاردِنه و گاتِنه «آیا ممکن هسّه یحیی همون مسیح بوئه؟»

¹⁶ جِواب یحیی به همۀ ویشون این بی‌یِه: «مِن شِما ره با اوو تعمید دِمبه، امّا اَتّا نَفِر مِجه گَتتِر اِنه که مِن لیاقِت نِدارِمبه حتی وِنه بند کُش ره واز هاکانِم. وِه شِما ره با روحِ خِدا و تَش تعمید دِنه.

¹⁷ وِه شه کَج‌بیل ره شه دست دِله داننه تا شه کَسو ره پاک هاکانه و گَندِم ره شه اِنبار دِله ذخیره هاکانه. امّا کَمِل ره با تَشی که خاموش نَوونه، سوزِندِنه.»

¹⁸ و یحیی با خَله پندها مردِم ره بشارت داهه.

¹⁹ امّا وقتی هیرودیسِ حاکم، بخاطر رابطه با هیرودیا، شه بِرارزَن و هِم کِثافِت‌کاریهای دیگه‌یی که هاکارده بی‌یِه، از طَرِف یحیی توبیخ بَییه،

²⁰ یحیی ره زندان دِله دِمبِدا و اینتی خطایی دیگه بر شه خطاها اضافه هاکارده.

تعمید و اصل و نسب عیسی

²¹ اون زِمان که همۀ مردِم تعمید گِتِنه، عیسی هِم تعمید بَییته. در همون موقع که وِه دِعا کارده، آسمون واز بَییه

²² و روحِ خِدا اَتّا کَوتِر واری وِنه سر هِنیشته و صدایی آسمون جه بی‌یَموهه که گاته: «ته هسّی مه جانِ ریکا و مِن ته جه راضی هسِّمه.»

²³ عیسی حِدود سی ساله بی‌یِه که شه خدمِت ره شِروع هاکارده. وِه به گمان مردِم یوسفِ ریکا بی‌یِه و یوسف هِلی ریکا بی‌یِه،

²⁴ هِلی مَتّات ریکا بی‌یِه، مَتّات لاوی ریکا بی‌یِه، لاوی مِلکی ریکا بی‌یِه، مِلکی یَنّا ریکا بی‌یِه، یَنّا یوسف ریکا بی‌یِه،

²⁵ یوسِف مَتّاتیا ریکا بی‌یِه، مَتّاتیا عاموس ریکا بی‌یِه، عاموس ناحوم ریکا بی‌یِه، ناحوم حِسْلی ریکا بی‌یِه، حِسْلی نَجّی ریکا بی‌یِه،

²⁶ نَجّی مَعَت ریکا بی‌یِه، مَعَت مَتّاتیا ریکا بی‌یِه، مَتّاتیا سِمِعین ریکا بی‌یِه، سِمِعین یُسِک ریکا بی‌یِه، یُسِک یهودا ریکا بی‌یِه،

²⁷ یهودا یوحَنان ریکا بی‌یِه، یوحَنان ریسا ریکا بی‌یِه، ریسا زروبابِل ریکا بی‌یِه، زروبابِل شِئَلتیئیل ریکا بی‌یِه، شِئَلتیئیل نیری ریکا بی‌یِه

²⁸ نیری مِلکی ریکا بی‌یِه، مِلکی اَدّی ریکا بی‌یِه، اَدّی قوصام ریکا بی‌یِه، قوصام اِلمادام ریکا بی‌یِه، اِلمادام عیر ریکا بی‌یِه،

²⁹ عیر یوشَع ریکا بی‌یِه، یوشَع اِلعازار ریکا بی‌یِه، اِلعازار یوریم ریکا بی‌یِه، یوریم مَتّات ریکا بی‌یِه، مَتّات لاوی ریکا بی‌یِه،

³⁰ لاوی شَمعون ریکا بی‌یِه، شَمعون یهودا ریکا بی‌یِه، یهودا یوسف ریکا بی‌یِه، یوسف یونام ریکا بی‌یِه، یونام اِلیاقیم ریکا بی‌یِه،

³¹ اِلیاقیم مِلیا ریکا بی‌یِه، مِلیا مِنّا ریکا بی‌یِه، مِنّا مَتّاتا ریکا بی‌یِه، مَتّاتا ناتان ریکا بی‌یِه، ناتان داوود ریکا بی‌یِه،

³² داوود یَسا ریکا بی‌یِه، یَسا عوبید ریکا بی‌یِه، عوبید بوعِز ریکا بی‌یِه، بوعِز سَلمون ریکا بی‌یِه، سَلمون نَحشون ریکا بی‌یِه،

³³ نَحشون عَمّیناداب ریکا بی‌یِه، عَمّیناداب رام ریکا بی‌یِه، رام حِصْرون ریکا بی‌یِه، حِصْرون پِرِص ریکا بی‌یِه، پِرِص یهودا ریکا بی‌یِه،

³⁴ یهودا یعقوب ریکا بی‌یِه، یعقوب اسحاق ریکا بی‌یِه، اسحاق ابراهیم ریکا بی‌یِه، ابراهیم تارَح ریکا بی‌یِه، تارَح ناحور ریکا بی‌یِه،

³⁵ ناحور سِروج ریکا بی‌یِه، سِروج رِعو ریکا بی‌یِه، رِعو پِلِج ریکا بی‌یِه، پِلِج عِبِر ریکا بی‌یِه، عِبِر شِلَخ ریکا بی‌یِه،

³⁶ شِلَخ قینان ریکا بی‌یِه، قینان اَرفَکشاد ریکا بی‌یِه، اَرفَکشاد سام ریکا بی‌یِه، سام نوح ریکا بی‌یِه، نوح لَمِک ریکا بی‌یِه،

³⁷ لَمِک مَتوشالَح ریکا بی‌یِه، مَتوشالَح خَنوخ ریکا بی‌یِه، خَنوخ یارِد ریکا بی‌یِه، یارِد مَهَلَلئیل ریکا بی‌یِه، مَهَلَلئیل قینان ریکا بی‌یِه،

³⁸ قینان اَنوش ریکا بی‌یِه، اَنوش شِیث ریکا بی‌یِه، شِیث آدم ریکا بی‌یِه، آدم خِدا ریکا بی‌یِه.