TUUMUDIMA TUMA 6 - Mampruli

¹ Sahanseaa Yisa nyaandɔliba maa ŋɔn daa zoaari m‑paasiri la, nangbankpeemni n daa lu ba puuni; di daa nyɛ la seeba ban tɔ'asiri Griiktiri la ni ban tɔ'asiri Hibruuli la sunsukkuni. Griiktiri dima maa daa galimni la Hibruuli dima maa, ni, “Ban yi tɔtti diibu n‑tisiri dabsa zaa la, ti pukɔya bu nyari ba tɔrli.”

² Lala zugu ka tuumudima piiya ni ayi la daa booli nyaandɔliba zaa ni ba la'amma taaba, ka yɛli ba, ni, “Tirima kyɛli Naawunni yɛligu tuma ka gɔsiri diibu yɛla, bee? Ay! - lala ka soori!

³ Dizugu, ti mabiisi, ya yiisim ya niriba ayɔpɔi, seeba ban bɛ ninvugsuma m‑mari Naawunni Sii Kasi yiiko, ni yɛm; ka ti ti kyɛ ka ba su diibu tuma maa.

⁴ Ka tirima mun zaŋŋi ti sufu zaa n‑niŋni Naawunni puusigu ni lahabasuŋŋu wulisigu ni.”

⁵ Ka ba zaa daa sakki n‑ti yɛligu wa, ka daa yiisi Sitiivin ŋɔn daa mari yɛdda pam ni Vuusim Kasi yiiko la, ni Filipi ni Pirɔkyɔrusi, ni Nikanoori, ni Taimoon, ni Paamɛnaasi, ni Nikɔlaasi ŋɔn daa yi Antiyɔkku ni na la, ka daa pun yi Griika dima gyeeŋŋu soori la ni, ni u ti dɔli Yɛhudiya dima dinni.

⁶ Niriba wa ka ba daa zaŋŋi n‑wulisiri tuumudima maa, ka ba daa susi Naawunni n‑ti ba ka zaŋŋi ba nuusi m‑pa ba zugri n‑diisi ba tuma maa.

⁷ Tɔ; ka di nyaaŋŋa ka Naawunni wulisigu wumpu maa daa kur yɛligri ni, ka ban daa dɔli Yisa soori maa kaaligu daa nɔbi Gyɛrusalɛm puuni, halli ka Yɛhudiyadima maalimaanniba pam daa sakki n‑deaai Yisa yɛdda.

⁸ Sitiivin muna - Naawunni daa zaŋŋi gyirima ni yiiko n‑ti u, ka u daa tum alahazibu tunkara ka Yɛhudiyadima niriba daa nya.

⁹ Amaa ninvugseeba daa doaai n‑ŋmɛ nangbankpeemni ni Sitiivin. Ninvugseeba ban daa la'amni ban daa boonni ‘Sumaŋŋa La'aŋŋu Duu’ la ni maa n daa nyɛ ba, ni Sairiini dima ni Alɛkzandiriya dima, ni seeba ban daa yi Silisii na, ni Ɛseaa.

¹⁰ Amaa ba daa bu nyaŋŋi Sitiivin, dama Naawunni Siiya yɛm daa bɛ u yɛttɔ'a maa ni.

¹¹ Dizugu ba daa bɔ dɔseeba ni ba yɛlima, ni, ba wumiya ka Sitiivin tɔ'asiri n‑galimni Musa yɛla, halli ni Naawunni yɛla gba.

¹² Ban daa tɔ'asi ba ziri yɛttɔ'a lala maa, ba daa kyɛ ka niriba zaa daa doaai n‑gbaai Sitiivin, ban ni ba kpamma ni ba karimbadima maa m‑paasi, m‑mari u n‑kyaŋŋi tiŋŋa maa kpambaya saani ni ba kari u sariya.

¹³ Ba daa kyɛ ka ninvugseeba kpɛ na n‑tɔ'asi m‑ma'ai ziri, ni, “Doo wa kur tɔ'asiri ni n‑galimni Naawunni Gyeeŋŋu Yiri la, ni zaaligu maa.

¹⁴ Ti wumiya ka u yɛli Yisa ŋɔn daa nyɛ Nazarɛti nira la yɛla, ni, ŋɔna nin sa'am Naawunni Gyeeŋŋu Yiri wa, ka takki ti kaya seesi Musa ŋɔn daa zaŋŋi n‑ti ti la.”

¹⁵ Ka seeba ban daa zi sariya karibu zii la ni zaa nini daa gɔsiri la Sitiivin la, ka ba daa ti nya u nindaa maa, ka ka ŋmanni la hoo malaaka dinni.