TUUMUDIMA TUMA 28 - Mampruli

¹ Tɔ; ka tin daa ti paai tiŋŋa maa n‑tuligi maa, ti daa ti baŋŋi, ni, tingbaŋŋu maa yuuri boonni la Malita.

² Tiŋŋa maa niriba daa suŋŋi ti ni nirilim pam. Ba daa nyoaai bugum n‑kyɛ ka ti zaa kyɛ na n‑wuusi, saa maa ŋɔn buuri ti zugu, ni waari maa ŋɔn daa niŋi ti seem.

³ Ka Pɔla daa boori daari na n‑niŋni bugum maa ni, ka lala saha ka waafu daa bɛ daari maa sunsukkuni n‑gbisira, ka bugum maa tuulim daa neaai u, ka u yi na nti dum Pɔla nuu maa.

⁴ Tiŋŋa maa biisi ŋɔn daa ti nya ka waafu maa kpalim n‑kyɛ'ai u nuu maa, ba daa yɛli taaba, ni, “Mma! Ninvugkuura n nyɛ u. U tuligi n‑yi teeku koom maa ni na, amaa di bu sumni ni u kpalim m‑bɛ ni.”

⁵ Pɔla mun daa kpaasi waafu maa m‑basi bugum maa ni, ka kur kpalim m‑mari alaafɛa.

⁶ Niriba maa daa teesi, ni, di ku yuui ka u fuusi, bee, ka u lu tiŋŋa ya'abi ka kpi. Ka ba guusiri lala n‑yuui, ka sɛseela bu niŋi u, ka ba naayi takki ba teesa n‑yɛli, ni, wunsɔ n nyɛ u.

⁷ Ka dɔsɔ daa bɛ ni ŋɔn daa su tingbaŋŋu fukumsi maa, ka u yuuri daa boonni Publiyusi. Ŋɔn daa su puseesi an daa bɛ tin daa bɛ luginseaa la ni. Ka u daa booli ti ni ti kpɛ u yiri m‑bɛ bɛni n‑niŋi daba ata, ka gɔsi ti yɛla suŋŋasuŋŋa.

⁸ Di saha maa ka Publiyusi ba maa daa ka alaafɛa n‑dɔya - u puu n daa beera ka u niŋŋa zaa bii. Ka Pɔla daa kpɛ u saani n‑susi Naawunni ka zaŋŋi u nuusi m‑pa u zugu ka tibi u.

⁹ Ka din daa niŋi lala maa, tingbaŋŋu maa ninvugseeba ban kpalim ka kɔŋŋi alaafɛ daa kyɛ na, ni ba ti nya tippu.

¹⁰ Ba daa ti ti piini pam; ka tin daa nya soori ni ti yi bɛni maa, ba daa ti ti la bunseelli kam kan daa pɔsigi ti saani.

¹¹ Tɔ; ti daa niŋi gɔya ata bɛni, ka naayi nya nyarinseaa kan daa pun zɛ tingbaŋŋu maa lugri n‑guri waari saha baasigu. Alɛkzandiriya nyariŋŋu n daa nyɛ ka, ka ba daa puri ka yuseaa kan nyɛ ba Wungyaasi yuuri.

¹² Ti daa du n‑lɔŋŋi m‑paai Sairakuusi tiŋŋa n‑niŋi daba ata bɛni;

¹³ n‑yi bɛni n‑kyaŋŋi n‑gyili halli nti paai Rɛgyeoo tiŋŋa. N‑neaai beoo ka pɛsisuŋŋu daa piili n‑zeeri n‑yi ti nyaaŋŋa, ka ti daa gaari yooma n‑niŋi daba ayi kyɛnni ka naayi paai Putiyooli tiŋŋa.

¹⁴ Bɛni ka ti daa nya ti nyaandɔlitaaba, ka ba daa mukki ti ni ti kpalim m‑bɛ ba saani n‑niŋi daba ayɔpɔi. Dizugu ti daa niŋi lala pɔi, ka naayi gbaai soori ni ti kyaŋŋi ti Room maa.

¹⁵ Ka Yisa nyaandɔliseeba ban daa bɛ Room maa daa wum ti kyɛnni na lahabaari, ka daa yi na ni ba ti tuusi ti soori; ka paai ti Apiiya Daa ni na, ka baseeba mun daa paai ti Yirikpeera Ata tiŋŋa na. Ka Pɔla ŋɔn daa ti nya ba maa, u daa puusi Naawunni taari, ka u sufu daa maai.

¹⁶ Tɔ; ka tin daa ti kpɛ Room timpuuni maa, ba daa ti Pɔla soori ni u bɔ yiri seaa u mammaŋŋa n‑kpɛa; see ka ba kyɛ ka langyinsɔ daa kpalim u saani n‑guri u.

¹⁷ Ka Pɔla daa niŋi daba ata bɛni, ka naayi booli Yɛhudiyadimseeba ban daa bɛ bɛni toondaandima maa, ni ba kyɛ u saani na. Ka ban daa ti paai na maa, u daa yɛli ba, ni, “M mabiisi, man bu tum taaliseaa n‑ti ti butiri, bee, ti yaadima kaya maa; amaa di zaa yɔri, ba daa gbaai ma Gyɛrusalɛm tiŋŋa maa ni, n‑lɔ ma n‑niŋi Room dima nuusi ni.

¹⁸ Room dima mun daa viisi n yɛla ka daa boori ni ba kyɛ ma m‑basi, dama ba daa bu nya taaliseaa n saani kan sumsi ni kum.

¹⁹ Amaa Yɛhudiyadima daa bu sakki lala, ka dizugu n daa bu nya soori see ka n ti susi, ni, ba zaŋŋi n yɛttɔ'a maa n‑zaali NaaTitaari saani na. Di pa la man mari la yɛttɔ'aseaa ni n ti galimni n Yɛhudiyataaba.

²⁰ Ka dizugu m boonni ya, ni ya kyɛm na ka ti ti di azama; ka ya nin ti nya ka baŋŋi din m bɛ seem, ni, Izraɛli dima ban mari tama seaa zugu ka n kpalim n‑lɔ kyɔrimi wa.”

²¹ Ka ba daa labsi n‑yɛli u, “Ti na bu deaai gbana zaŋŋi n‑kyaŋŋi i yɛla, Gyuudiiya dima ŋɔn sɔbi seesi n‑ti ti na, ka ti mabisɔ na bu paai ti na ni u ti tɔ'asi yɛttɔ'aseaa n‑galim i.

²² Amaa ti boori ni ti ti wum din bɛ i saani, dama ti mi, ni, niriba zaa galimni la wɔligri soori wa yɛla tinsi zaa puuni.”

²³ Ka ba daa zaali dabsiri, ka daa kyɛ u yirikpeetiri na ni niriba pampam. Ka Pɔla daa wulisi ba ni nimmoosi zaŋŋi n‑kyaŋŋi Naawunni naam yɛla. U daa tɔ'asiri Musa sɔppu yɛla, ni u ti kyɛ ka ba baŋŋi Yisa yɛla a puuni n‑niŋi u yɛdda - halli anabidima sɔppu gba ka u daa wulisi ba lala - wuntaŋŋa saha halli nti paai yuŋŋu.

²⁴ Tɔ; ka ba mun seeba daa niŋi u yɛligu yɛdda, baseeba mun daa za'asi yɛdda niŋbu.

²⁵ Ka ban daa ka nangbanyinni ni taaba maa, ba daa doaai ni ba bakki n‑kuli; ka Pɔla daa yɛli ba yɛligu yinni m‑paasi, ni, “Yɛlimaŋni ka Naawunni Sii Kasi daa tɔ'asi ya yɛla; u daa kyɛ ka anabi Aizaaya yɛli ya yaadima,

²⁶ ni, Naawunni yɛliya#:- ‘Kyɛma butiri wa niriba saani n‑yɛli ba, ni, “Ya nin wum, m‑maali n‑wum, Amaa ya ku baŋŋi di gbinni. Ya nin gɔsi m‑maali n‑gɔsi, Amaa ya ku nya di.”

²⁷ Dama n niriba wa muna - Ba sufu ni teesa bu zulima, Ba ligi la ba tuba, Ba mumni ba nini: Dama di yi pa lala Ba nini naa n‑nyara, Ba tuba naa n‑wumna, Ba sufu ni teesa naa n‑neaara, Ka ba ti labi n saani na Nti nya tippu n saani.’

^28-29 Tɔ; ya baŋŋma! Dizugu ba tɔlim tuliginsim wa lahabasuŋŋu n‑ti ban pa Yɛhudiyadima maa; ban nin ti wum ka.”

³⁰ Ka Pɔla daa kpalim m‑bɛ lala halli n‑niŋi yuuma ayi bɛni. U daa yoori u maŋtoori ligri n‑kuuri u bukaata, ka daa deaari sɔkam zaa ban daa kyɛ u saani na.

³¹ Ka daa moonni Naawunni naam lahabaari ka wulisiri ti Dugma Yisa Masiiya yɛla ni nimbiri moaa, ka sɔsɔ daa bu za'asi u.