TUUMUDIMA TUMA 27 - Mampruli

¹ Tɔ; ka ban daa ti gbaai ti Room kyɛnni yɛla maa, ni, ti kpeem nyariŋŋu n‑dɔli teeku koom n‑kyaŋŋi, ba daa zaŋŋi Pɔla ni ban daa bɛ dansarika duu ni m‑paasi u zugu la, n‑niŋi langyima toondaansɔ nuu ni. Toondaana maa yuuri daa boonni Gyuliyusi: u daa su la langyinseeba fukumsi ban daa boonni ‘NaaAgasitisi Dima’ la.

² Ka ti daa nya nyarintitaseaa kan yi Addiramitiyum tiŋŋa ni na, ka ka ya kyaŋŋi Ɛseaa tingbaŋŋu ya'ari sa. Ti daa kpɛ ka ni, tirim ni Arisitaakusi, ŋɔn daa yi Tɛsalɔnika ni na, kan nyɛ Masidoonya tingbaŋŋu ni tinseaa.

³ Ka beoo ŋɔn daa ti neaai, ti daa paai Saidoon tiŋŋa. Bɛni ka Gyuliyusi daa ti Pɔla soori ni u sigi n‑kyaŋŋi nti kaai u zɔdima, ni ba gɔsi u yɛla; dama Gyuliyusi daa nyɛ la nirilim daana.

⁴ Tin daa yi bɛni sahanseaa maa, ti daa du m‑burigi n‑gaari Saapirusi tingbaŋŋu nyaaŋŋa sa, dama pɛsiŋŋu daa bu zeeri suŋŋa n‑ti ti.

⁵ Ka ti daa kyaŋŋi tooni n‑yakki teeku ziseaa kan bɛ Silisii ni Pamfilii tingbana ya'ari maa, halli nti paai Maayira tiŋŋa kan zɛ Lisii tingbaŋŋu ni.

⁶ Bɛni ka toondaana maa daa nya nyarinseaa kan yi Alɛkzandiriya tiŋŋa ni na, ni ka ti kyaŋŋi Italii tingbaŋŋu ni, ka daa kyɛ ka ti kpɛ kana.

⁷ Ti daa du n‑kyaŋŋi; ka di daa niŋi lala, ka ti kyɛnni daa mukki ti pam, ka ti kyɛnni beelabeela ka naayi paai Kunidoosi tiŋŋa. Di saha ka pɛsiŋŋu daa tuusi ti, ka dizugu ti daa ŋmaligi n‑yakki nti dɔli Kyiriti tingbaŋŋu ni. N‑kyɛnni n‑kyɛ ka tiŋŋa wa bɛ ti nudirigu ya'ari sa, n‑kyaŋŋi n‑gaari Salimooni tiŋŋa;

⁸ n‑dɔli beelabeela ka naayi paai ya'aseaa ban boonni Nyarima Ya'aveelli la - bɛni ni Lasaya tiŋŋa daa bu wɔ'a.

⁹ Ti daa yuui beela bɛni, ka saha daa bu laa n‑veeli ni ba kyɛnni teeku maa ni, dama Yɛhudiyadima nɔlɔri saha daa pun gaari. Dizugu ka Pɔla daa kpamsi ba

¹⁰ n‑yɛli, ni, “N zɔdima, m mi halli, ni, ti yi ti kyaŋŋi tooni yaasa di nin kyɛ ka ti yɛla sa'am zaa - pa nyariŋŋu ni neema kɔkɔa, amaa ni ti nyɔvuya gba.”

¹¹ Di zaa yɔri, dama langyima toondaana maa daa niŋi nyariŋŋu daana maa ni u nyarinduusira yɛla yɛdda, n‑deaai ba yɛligu ka za'asi Pɔla dinni.

¹² Ban daa bɛ seelli maa pa la zaazisuŋŋu, dama waari saha ka pɛsiŋŋu nin zeeri n‑kpeeri bɛni n‑daamni ba. Dizugu ba niriba pam daa ŋmɛ saawara n‑gbaai, ni, ba bakkma bɛni n‑du n‑kyaŋŋi; ni, di bu ya'ai ni ba ti paai Kyiriti tinseaa ban boonni Fiiniksi la, dama bɛni ba nin toaai n‑kpɛ ya'aseaa kan veeli n‑ti nyarima, waari saha maa, halli ni kan bɛ seem maa ku kyɛ ka lala pɛsima ti kpɛ na.

¹³ Tɔ; ban daa ti nya ka pɛsisuŋŋu daa zeeri n‑yiiri ba nyaaŋŋa na, ba daa teesi, ni, ba nin toaai n‑kyaŋŋi ba kyɛnni ban daa gbaai seem la, ka daa foaai buntibsiri kan ta'ari kyɛnni la, n‑du n‑dɔli Kyiriti tingbaŋŋu gbiriŋŋu ziiya.

^14-15 Amaa di daa bu yuui ka pɛsinkpeeŋŋu daa yisigi Kyiriti tingbaŋŋu ya'ari sa, n‑zɛ n‑daai ti, ni ti yi tingbaŋŋu maa ziiya n‑kyaŋŋi teeku sunsukkuni. Ba boonni lala pɛsiŋŋu, ni, ‘Dirinyaaŋŋa’ la. Ti daa bu nyaŋŋi n‑tuusi pɛsiŋŋu maa, ka kur kyɛ ka ka daari ti n‑kyɛnna.

^16-17 Ti daa ti paai tingbambila kan zɛ teeku kooma sunsukkuni, ka ka yuuri boonni Kɔdaa la. Ka daa gaari ka nyaaŋŋa, ka moori n‑nyari wahala pam n‑darigri nyarimbila maa n‑kpeesiri buntitaari la puuni n‑lɔ ka suŋŋa; ka laa n‑nyaŋŋi n‑zaŋŋi mikara n‑lɔ n‑gyiligi nyarintitaari maa sunsukka, hoo sɛlooriga ŋɔn loori nira seaa seem. Dabeem daa mari ba, ni, di pa seelli ti nin paai zibɛseaa ban daa boonni Siritisi la. Dizugu ba daa sigsi nyariŋŋu tantiseaa kan daa kyɛ ka ka kyɛnni la, ka kyɛ ka pɛsiŋŋu zeeri ka daari ti yɔri.

¹⁸ Di daa niŋi dabsiri yinni yaasa ka ti daa diri wahala pɛsiŋŋu maa zugu, ka dizugu ba daa gbaai la neema maa basibu.

¹⁹ M‑paai dabsa ata daari ka ba zaa daa zaŋŋi ba nuusi n‑yiisi nyariŋŋu maa neema zaa m‑basira.

²⁰ Di daa yuui lala ka ti daa bu nya wuntaŋŋa neesim, bee saŋmariwuusi; ka pɛsibeoo daa kpalim n‑zeeri ti, ka ti daa laa n‑ka tama, ni, ti nin tuligi halli beela.

²¹ Tɔ; ka tin daa bu di diibu ka di yuui la, Pɔla daa zɛ saazugu ba zaa sunsukkuni n‑yɛli, “N zɔdima, ya yi daa wum n noori la ka daa bu yisigi Kyiriti tin daa bɛ seela maa, di naa n‑sɔa. Lala yisigri zugu ka ti yɛla sa'am maa.

²² Amaa pampaŋŋɔ n kpamsiri ya, ni, ya kyɛ ka ya sufu dɔya; ya sɔ ku basi yɔri, kulla nyariŋŋu maa kɔkɔa.

²³ Dama n sa zaasi zaasimni ka malaaka yi Naawunni saani na - man gyeemni Naawunni sɔ ka u su n yɛla zaa. Ka malaaka maa sa zɛ n‑tabli n saani na,

²⁴ ka yɛli ma, ni, ‘Pɔla, di zɔri dabeem! See ka i nin ti zɛ NaaTitaari tooni: ka dizugu Naawunni zaŋŋi la ninvugseeba ban la'am m‑bɛ i saani nyariŋŋu wa puuni zaa n‑ti i.’

²⁵ Dizugu, n zɔdima, ya kyɛ ka ya sufu dɔya. N niŋi Naawunni yɛdda, ni, u nin tum hoo ŋɔn sa yɛli ma seem la.

²⁶ Ti nin baasi m‑paai tingbanseaa kan bɛ teeku kooma sunsukkuni maa ni.”

²⁷ Tɔ: di daa niŋi lala, halli nti paai dapiiya ni anaasi daari, yuŋŋu: ti daa kur kyɛnni ka labri na Addiriya teeku maa puuni. Di dabsiri yuntasuusi saha maa ka nyariŋŋu dima maa daa teesi, ni, ti ti pɔtti tinseaa zii na.

²⁸ Ba daa ma'asi m‑baŋŋi koom ŋɔn zulim seem, ka di na zulim pam. Ka kyaŋŋi tooni beela ka laa m‑ma'asi n‑nya, ni, di bu laa n‑zulim hoo ban daa daŋŋi m‑ma'asi seem la.

²⁹ Di saha ka dabeem daa gbaai ba, ni, di pa seem ba nin ŋmɛ n‑firi luginseelli din bu veeli puuni, ka dizugu ba daa zaŋŋi buntibsa anaasi n‑lɔ miisi n‑lɔ nyariŋŋu nyaaŋŋa n‑sigsi koom maa ni, ni a ti ta'ai nyariŋŋu kyɛnni; ka naayi kpalim n‑susiri wunsusigu n‑guri bɛkyikyeoo saha.

³⁰ Di saha ka nyariŋŋu dima daa yɛtti, ni, ba ya zɔ ni ka kyɛ ti; dizugu ba daa lɔrigi nyarimbila maa n‑sigsiri ka n‑niŋni teeku koom maa ni; ka ma'ari ziri, ni, ba ya sigsi buntibsa tooni sa m‑paasi an bɛ nyaaŋŋa zugu.

³¹ Amaa Pɔla daa yɛli toondaana maa ni u niriba maa, ni, “Bana yi bu kpalim m‑bɛ nyariŋŋu maa ni, ya sɔ ku ti tuligi.”

³² Ka langyimadima daa ŋmaai nyarimbila miisi maa ka kyɛ ka ka lu m‑basi.

³³ Ka beoo ŋɔn daa ti ya neaai, Pɔla daa tɔ'asi n‑ti niriba maa, ni, ba kpaŋŋma ba mansi n‑di diibu beela, ni, “Ya loori la ya nɔya ka di paai dabsa piiya ni anaasi, ka kur guusiri ka bu diri seela.

³⁴ Ya bu ya di diibu pampaŋŋɔa? Lala nin suŋŋi ya, ka ya ti yi ya wahala wa puuni ni alaafɛa. Ya sɔsɔ ku basi yɔri - halli ni ya ninvugsɔ zɔbgu yinni gba.”

³⁵ Ka ŋɔn daa yɛli lala n‑naai maa, u daa zaŋŋi diibu m‑puusi Naawunni di zugu ba zaa tooni, ka ŋmaai n‑ŋɔbi.

³⁶ Di saha ka ba zaa sufu daa kpaŋŋi, ka ba gba daa deaai diibu n‑di.

³⁷ Ti daa nyɛ la ti niriba kɔbsiyi ni pisiyɔpɔi ni ayoobu nyariŋŋu maa puuni.

³⁸ Ka ban daa di diibu n‑naai, ba daa zaŋŋi kyi an daa bɛ nyariŋŋu maa puuni n‑yiisi m‑basi koom maa ni, ni di kyɛ ka nyariŋŋu maa ku laa n‑tibsa pam.

³⁹ Ka beoo ŋɔn daa ti neaai, ti daa nya ka tingbaŋŋu bɛ ni, amaa ba daa bu baŋŋi ka. Amaa ba nya ya'aseaa ban teesi, ni, mɔ'abisigu m bɛ ni ka tampikara ka ni; ka daa boori ni ba ti kpɛ bɛni n‑kyɛ ka nyariŋŋu maa firi tanni maa ni n‑zaani.

⁴⁰ Dizugu ba daa lɔrigi buntibsa maa m‑basi koom maa ni, ka lɔrigi nyarimpaari la ni ba ti laa m‑piili n‑duusiri; ka zaŋŋi tantibila n‑duusi n‑tabli nyariŋŋu tooni, ni ka ti gbaai pɛsiŋŋu n‑daai ba ka ba kyaŋŋi.

⁴¹ Amaa ba daa paai ya'aseaa ka kooma daa kyɛnni n‑tuusiri taaba ka labra, ka ba daa burigi n‑firi, halli ka nyariŋŋu maa toonni ku sakki n‑kyaŋŋi bee n‑labi, sahanseaa ka kooma maa daa ŋmeeri ka nyaaŋŋa n‑kabri ka.

⁴² Di saha ka langyimadima daa boori ni ba ku dansarika niriba maa, ni, di bu ya'ai ba sɔ nin ti dugi koom m‑paai tingbaŋŋu n‑zɔa.

⁴³ Amaa ba toondaana daa bu sakki lala, ŋɔn daa boori ni u tuligi Pɔla zugu. U daa yɛli, ni, ban mi koom dugbu la, ni, ba kpeem koom puuni n‑dugi m‑paai tingbaŋŋu maa.

⁴⁴ Ni, ban kpalim muna - ba gbaam taabudaari, bee, nyariŋŋu dakyɛra maa, m‑mari n‑kyaŋŋi: ka lala zugu ba zaa naayi paai teeku duuri maa ni alaafɛa.